Traffic jam leh Parking-a Buai lohna Aizawl min tiam hi

Kum 10 chhung zet Chief Minister lo ni tawh MNF President Pu Zoramthanga’n Aizawl traffic jam buai ṭhin hi tihtawp vek a intiamah duhtawk mai lovin parking-ah pawh harsatna awm lohnaa siam a tiam a, chu chu “Tuna in awih loh pawhin kum thum hnuah chuan in awih tawh ang,” ti lam hawiin a sawi a, a video a darh chuai chuai a, a hria apiangin an awih lova, MNF pawhin an awih chuang lo niin a lang.

Kan ram hruai tumtute ‘vision’ hi mumang mai mai hi a ang ṭhin a, a thil sawi nuihzatthlak leh hlimawm tam tak zingah tun hnaiah hetiang thu awihawm lo lutuk leh harsatna lian em em awlsam taka a sawia sawi fel vek a han tum leh ngam mai hi chu ‘Old Fashioned Politician’ an tih ang tak kha a ni a, thu sawi tlawr leh sawi ngaihnawm tih mai mai hi ṭhangtharte hi chuan an duh tawh lova, fiamthu zawngin an la tawh a, chuvangin kan ram hruai tumtute hi chuan hetiang thu lawi lo hi chu sawi tawh lul suh se.

Kum thum chhunga ei leh bara intodelh tir min tum thu a sawite khan facebook hi lo awm tawh se chu mipui hi an nui nasain a rinawm a, a nui lo zawng chu an thinrim hle thung ang a, mipui min dah mawl lutuk ṭhin hi a buaithlak zozai a ni. Chakma District Councin ṭhiah a tum thu a sawite kha chu ṭhangtharte muih tiza leh thintiurtu mai a chang zo dawn ta chu a nih hi mawle. “Mizoram hi vai buh ring lovin ka siam ang,” tihte tun hnaiah a sawi leh tawh a, kan rama buh chin theihna hian a daihin a daih lo hrim hrim a, mipui hi duh duh hrilha tiam mai mai chi an ni tawh lo tulai khawvel changkang zelah hian.

Mau ṭha chi a sawi uar lutuk kha February 19, 2013 khan Pu Lalṭhakima in, Phullen-ah zawhna a dawng ta a lawm le, “Ka Pu, mau ṭha chi i sawi hi kum 10 CM i nih chhung khan ngati nge min chin tir mai loh?” an ti a, Pu Zorama chuan, “A dik chiah, a chhan chu khatih hunlai khan scientist ten a chin dan tissue culture an tih hi an la hmu chhuak lo a ni,” a ti a, hman deuh khan ‘Zoram Thlirtu’ tih group Facebook-ah an rawn dah a, ngaihtuah chian hian lung a awi lo khawp asin.

Hetiang deuh hian Congress President Pu Lal Thanhawla pawh hian thu awihawh lo pui pui a sawi fo a, ani hi chu a ṭawng tam vak lova pawi a sawi tam lo deuh a, a ṭawng chhunah mipui thinlung khei leh kohhran rilru tina tak tak hi a awm nual mai. Pu Lalduhoma pawh hi a thawhpuite azirin a ṭawng dan hi a thlak kual a thlak kual ve bawk a, “Dawt a sawi e,” zuk tih dawp tur ni si lo hian finfiah hleihtheih loh, awihawm chuang si lo, ngaihnawm tak si hian a sawi thiam roh a, heng zinga tute emaw ber hi kan CM an la ni dawn chu a nih hmel a, a la lal lo chhun hi chuan a la lal ve miau loh avangin kan pawi chu a sawi nêp deuh ber niin a lang.

Kan thupuiah khian let leh ta ila, Pu Zoramthanga’n Aizawl khawpui hi traffic jam awm lohna leh parking-a buaina awm lohnaah din a tum a, hemi a sawi hian a party hi Aizawl Municipal Corporation-a roreltu an ni tih a theihnghilh a nih loh pawhin a ngaihtuah chhuak lo palh a nih a rinawm. Tunah hian Aizawla parking vel buaipui hi AMC kutah a awm a, parking hmun pawh hi anmahni rel a ni tawhin parking fee te an khawn a, traffic jam leh parking awm lohna khawpui nih hi thil theih loh a ni. Khawvel hmun dangah pawh tlang ram khawpuiah hi chuan hmun zawl a tlem avangin parking hi harsatna lian tak a ni a, kawng chhawng tihte hi a taka hman theih chu ni se tlang ram hmun dangah hian an hmang fer fur ang tih hi a chiang reng mai. State pachhia leh thawhchhuah nei lo hian khawia sum mahin kawngpui chhawng hi kan siam dawn lova, kan ram leilungin a zir loh bakah thil theih a ni lova, amah bawk hi lei verh sawitu kha a ni tawh bawk a, ngaihtuahna seng lo chuan mipui hmaah hian thu hi sawi ve mai mai tawh suh se.

Ṭawngkam hleihluak deuh han hmang ta ila. MNF hian AMC inthlan dawn khan Aizawlah Free Wifi an tiam a, chu thil awlsam leh man pawh to lo tak chu an tihlawhtling thei lova, traffic jam leh parking-a harsatna awm lohna siam chu a la hla mai ni lovin thil theih loh a ni a, khawpui dangah pawh an theih loh hi keini tehlul hian kan thei dawn lo tih chu kum 10 Chief Minister a nih chhunga a chet vel danah khan kan lo hmu tawh a ni. Chuvangin, mipuite hi duh duh sawia min buma kan vote hip hi tum tawh lo se a ṭha ang, kan politician zawng zawng hian theih loh tur chu tiam tawh suh se.

Traffic jam leh Parking-a buai lohna Aizawl min tiam hi chu ṭhangthar zawkte hi chuan Aizawl mipuite hmuhsitna, engmah hre lo anga ngaihna leh duh duha bum theiha ngaihna angin an la daih thei a, ṭawngkam hi fimkhur a ngai a nia.

- K. Lalruatsanga