Hindutva is for real

“BJP hian hma­sawnna a keng tel a, anni thawhpui hi a hlauhawm lova, Mizo kristian te hi Hindu sakhuaah min inlehtir dawn lo, ram hmasawnna a pawimawh,” tih hi Mizorama BJP te thusawi kan hriat tlanglawn tak a ni a, heng mite hian BJP website-te hi an chhiar ve tawhin an din chhan leh an innghahnate hi an en ve tawh ṭhin em? tih hi ka zawhna a ni.

Hindutva sawi hmain BJP-a hma­sawnna thleng an tih fo pawh hi ‘myth’ an tih ang hi a ni a, chu chu a tak awm lo siam chawp thil mai mai niin mithiamte chuan an hria.

Indian economy thlir la, i hriatthiam phak chuan BJP sorkar chet chhiatzia hi i man ang. India pawisa hlutna a maka makin a tlahniam a, ramin a tuar mek. Petrol leh diesel man hi ‘record’ siamin a to tawh a, kan eirawngbawlna gas (LPG) hi a to far far tawh a, heng hi chhut chiang la, BJP chuan khawiah hian nge hmasawnna chu an thlen le?

Kan PM Narendra Modi pawh hi inhâm puar satliah tiin BJP rau rauvah Atal Bihari Vajpayee kha a phak lo an ti asin. Hengte hi Mizote hian kan hriat a, a chhût a kan chhût a ngai a ni.

Wikepedia lamah chuan, “BJP is a right-wing party, and its policy has historically reflected Hindu-nationalist positions. It has close ideological and organisational links to the Rashtriya Swayamsevak Sangh,” tih a ni a, RSS nen an inzawm tlat thu hi chiang takin a inziak. An official website http://www.bjp.org/ lamah chuan RSS aṭanga lo piang chhuak an nih thu chiang takin a lang.

Khawvelin hriat duh a neiha a keu ber Encyclopedia Bri­tannica chuan BJP a hrilhfiahnaah chuan, “Bharatiya Janata Party (BJP), English Indian People’s Par­ty, pro-Hindu poli­ti­cal party of postindependence India,” a ti mai.

Mizorama eng eng emaw behchhana BJP hlauhawm loh thu pleh Hindu sakhaw thehdarhna tur a nih loh thu lo sawi hi chuan an chhiar tlem a ni. BJP hian Hindutva hi an din chhan a ni tih an zep lova, chu chu India ram hi Hindu sakhuaa siam a ni. Tunah hian BJP tum ber chu India rama Hindu sakhaw chawi san a ni a, an la luh thuk ve theih lohna awm chhun tlem te zinga mi Mizoramah theihtawp an rawn chhuah ta a ni.

Chumi hmanrua atan chuan MNF nen a rukin an inzawm tih thawm awm hian rilru a tinâ a, Tripura BJP General Secretary-in Tripurainfo lama a lo sawi kha a tak a nih ngei hmel si a, MNF hian ngaihtuah chiang leh se, BJP nen an inzawmna hi titawp lul rawh se, a chhan chu ‘Hindutva is for real’ tih hi a ni.

- John Hnamte