Eizawnna nghet nei lo tan Laptop leh zu khap thu

Manifesto kan nei ropui ṭan leh ta hle a, Congress Party chuan Manifesto an puang chhuak a. A ṭhen hi ṭha fe fe a awm laiin ṭhenkhat hi chu 'Sum kan sem ang' tih ang deuh bawk thil a ni. Manifesto-a an tarlan zawng zawng kan sawi lo ang a, ṭhenkhat chauh hi han sawi zui ka châk.

Congress Party-in Health Care scheme changtlung zawk siam an tumna hi a ṭha hle mai. Thingtlang mi retheite tan chuan a pawimawh a, an sorkar leh a nih chuan tihhlawhtlin hmasak bera nei turin hma la se a duhawm hle.

Natna khirh zawk tuarte tana cheng nuai nga bill theihna turte pawh hi mi retheite tan chuan Tlumtea thlira thlir tham a tling âwm e.

NLUP leh NEDP hi an sawi teh fo a; hlawhtlinpui anga an tarlan ṭhenkhatte hi chu NLUP hmu miah lo pawh ni se an eizawnnaa hlawh­tling tur sa a ni. Ka mi hriat chian tak pakhat pawh NLUP hlawhtlinpuitu angin an tarlang naa a nihna takah chuan NLUP sem hma aṭanga lo in-settle tawh a ni. NLUP aṭanga a sum hmuh kha chuan a hmanrua tur pahnih khat a lei ve chauh tawh zawk.

HSLC leh a chung lam pass, eizawnna ngelnghet nei lote tana laptop sem hi ka ngaihtuah a, ka nuih a za; eizawnna nei lo khan laptop dawng ringawt ta se eng nge a tih ang?

Laptop a neih avang khan eng ei­zawn­na mah a hmuh phah dawn hauh lo a, a hna dilna atana thil ṭul, Computer lama thiamna certificate a chhawm tel dawn bawk si lo; film en nan leh game khelh nante chuan a hmang mah na! Laptop ṭha tak tak an sem chuang lo ang a, a lo thlâwna sorkar sum tihralna mai mai a ni.

Zu khap leh zawrh chungchang sawi chhuah fo a ni a, zu khapna dan hlih a nih chhan sawi a ni fo bawk. Zu khapna dan hlih a nihna chhanah khan a hlawhchham vang nia sawi a ni a, sorkar hian kha dân kha tihhlawhtlin tum takin a ken kawh ka hre ngai lo.

Zu khuahkhirhna dân thar hman tak pawh hi sorkarin a kengkawh chuang lo a; ṭhenkhatin zu permit za chuangte an nei thei a. Khap a nih laia kan sawi tho, mi rethei zu zuar chauh an man ngam tih kha, zu zawrh a nih hnuah pawh a danglam chuang lo a nih hi!

Dân kan lek kawh ṭha tak tak peih chuang lo a, chuvang chuan, kenkawh ṭhat loh rau rauah chuan zu kha khap leh bur ila kan ṭhatpui mah zawkin a lang.

- Ramropuia