AMC hian engnge an tih tak ber?

Aizawl khawpui enkawltu AMC hi kan hre lar ta viau a, hna pawh an thawk hnem tawh narawh e. Free Wifi pek an han tum chiah phei kha chuan ṭhalai zingah an tla na sauh a, an ekchhe lar ti dawn ila a dik si lo - an ṭha lar thut a ni ber zawk a.

Kum 2019 aṭang khan AMC hian polythene hman a khap a, mipui hnenah sum tak tak sengin awareness te pein an campaign ngawrh hle a ni. Hun engemaw kha chu polythene hmuh tur pawh a vang pharh a ni.

Aizawl Municipal Corpo­ration hian 2019 khan polythene/ plastic pan chi micron 50 chin hnuailam bakah vawi khat hmana paih nghal chi te hman leh zawrh a khap a, sumdawng tam takin buaina an tawk kha a ni a....

Tichuan sum­dawng ṭhenkhatin poly­thene thlakna tur khawl te leiin sumdawnna bul an ṭan ve leh nghal a, anni hi a hun lai kha chuan thil ṭha tak rawn tichhuaktu an ni nghal deuh mai a, fak pawh an hlawh hman deuh viau a ni. Mahse kum a vei meuh chuan polythene thlakna tur siamtute hi an in hralh leh hleithei ta lo a, an mangang a ni. Enge a chhan ni ta ber pawh ka hre lo, AMC hian polythene a khap peih tawh loh vang a ni thei em?

Bawlhhlawh paih dan leh sawngbawl dan, bawlhhlawh thliar hran danah pawh AMC hian dan eng engemaw a lo siam tawh a, mahse mipui lam aṭangin kan zawm ṭhat loh vang nge ni, bawlh­hlawh paihna hmun­ah khuan paih fin leh vek a ni lawi si a, kei zawng AMC kalphung leh kan chet vel dan hian min ti luhai riau mai.

Bawlhhlawh ṭawih thei leh ṭawih thei lo kha engemaw ti chhung chu kan han thliar hrang ve chiam chiam a, bawlhhlawh phurtu motor te pawh khan kan thliar hran loh chuan kan bawlhhlawh min phurh sak duh lo hial ṭhin a, an kalphung kha a ṭha dawn riaua hriatna ka lo nei hman a ni. Mahse kum pawh a vei hmain bawlhhlawh thliar hran hi thil awmze nei loah kan chhuah leh ta a ni ber em le, tunah hian?

Tichuan AMC bawk hian municipal area-ah lei laih khapna dan a siam leh ta bawk a, mahse hei pawh hian awm­zia a nei thui viau lo leh mai ang tih ka hlau ru leh deuh.

Food Truck/ Street vendor te dinna tur area pawh Aizawl khawpui chhungah a rin kual ve duah tawh a, khang te kha tunah hian a nih tur angin a function thei ta em? AMC kal dan phung hian ka lu a ti hai a ni.

- Ramdinmawia Fanai