Kristianah leh Mizovah ngei Vote ang che

Tun hnaia Election Commission official pakhat huangtàu ngam dan han en hian, a phènah, tharum thawhna thleng se, Mizo leh Mizo hi inep se, Kristian tamna state hi hming chhia se, buaina hi chhuak se tih duhtu an awm niin a lang. Mizo hnatlang leh Mizoram police an inep vaih chuan, hnam politics lian leh pawimawh zawk aiah, “Engati nge min vuak?” tih velah Mizo leh Mizo kan buai leh ang. Chutih hlanin, verther taka Hindu party vohbikna remchang zawn tum an awm a ni maithei. An game-ah inhruailuhtir lovin, an game plan i thlâksak zawk ang u.

Kan officer chhuanawm tak hetianga min tihming­chhiatsak dan aṭang hian Mizo hnam min tham lohzia leh Kristianna palzùt an tumzia a lang. Hei hi political party thuneih inchuhna thil piah lam a ni.

A thil tum hi hlawhchham se kan duh chuan Mizoram mipuite hi Mizovah leh Kris­tian sakhuaah kan inpum­khat lehzual a ngai. Mizo min ṭhendarh tumna game hian Mizo hi min tipumkhat sauh zawk rawh se.

Pu Lalnunmawia an sawn avang hian President’s Rule nghawng chhuak khawpa buaina a thleng thei tih hi, a sawntute hian an hmu lawk vek ang. Chu chu an duhthusam a ni hial maithei. An game letling chiahin, buaina chawk chhuak lovin, inthlanna muanawm tak neih tum tlat ila. Hindu party-in vote tlém thei ang ber an hmuh theih nan Kristianten theihtawp i chhuah ang u.

1966 chhovah politics-a independence kan súal hlawhchham a. 2018-ah hian, suangtuah pawh kan lo la suangtuah phak ngai loh: sakhuaa kan independence kan sùal a lo ngai ṭan ta der mai. Kan hlawhchham leh ang maw? Kan hlawhchham vaih chuan tuna Mizo generation hi kumkhuain kan thlahten min dem tawh ang.

Eng nge kan tih theih? Tharum leh silai tel lovin Indona Thianghlim kan puang thei alawm. A hringhranin Defender of the Faith kan nih a ngai ta a nih hi. An tih theih dodal theih loh kan nei ang bawkin kan tih theih dodal theih loh an nei ve. Verther taka politics leh sum hmanga Hindu culture leh sakhua-a min hnuh lum tumtu party member hi vertherna tel hauh lova huai taka hmachhawnin, khawtlang leh kohhran hian kan endawng thei a lawm.

Tun ṭuma inthlan kan hmabak hi tunhmaa MLA thlanna satliah ang kha a ni lo. Sakhaw Indona a ni tih a chiang ta. Kan mi hmasate tih dik loh tih velah i buai lo vang u. Hmar, Paite, Lai leh Mara hi Mizo an ni em? - tih velah pawh i buai lo ang u. He ram hi Kristian ram nihtir zel kan duh em tih zawk hi kan ngaihtuah tur chu a ni. Kan thlahte Kristianna hmabak hi 2018 MLA vote ah hian thûk takin a innghat a ni.

Vote thlak vek turin theih­tawp chhuah ila, Kristianah leh Mizovah ngei i vote vek ang u.

- Vanneihtluanga