Pan lovah tho a fu lo

Mizo upain “Pan lovah tho a fu lo,” tiin an sawi mathlawn lova, tun hnaia politics inchirh thehna kal velah hian mipui mimir hian a dik ber hre thei lo mah ila, Tripura BJP hruaitu thusawi nia an tih, “MNF nen hi chuan inthlan hmaa thawh dun ngam chi a ni lova, Mizo mipui nawlpui hian BJP hi an la duh lova, inthlan zawh lamah chuan thawh ho hi harsatna a awm lo vang,” a ti a nih kha.

Kha thu kal zelah khan party lamin an han sawi nak naka, mi hrang hrangin an ngaihdan an ziak tawh bawk a, thudik leh a nihna tak hi hriat theihin a awm tawh si lova, BJP lam ṭang nih loh dan phet zawng mekte hian BJP lama ṭan dan phet an zawng leh lo vang tih hi a sawi theih si lova, he thuziak hi lo dah ṭha ngei ula, kan la ennawn leh dawn a ni.

Mipui hi kan khawngaihthlak ṭhin a, mipui hi thudik pawh hre thei lova dah kan ni a, hei vang hian party pakhatin, “A ni” a han tih hian pakhatin, “A ni lo reng reng,” a rawn tih leh ta a awih tur hi kan hre miah ta lo a ni. Tuna mi hi thlirna dangin a thlir theih a, chu chu a sawitu hian Mizoram news atan a sawi lova, Mizorama media te tihchhuah atan a sawi miah lova, Tripura chhunga media atan chauh a sawi a ni a, chumi awmzia chu Tripura BJP hruaituin BJP len tawhzia leh Mizoramah pawh an len zel turzia Tripura lama mite a hrilhna a ni daih zawk a, chu chu eng tin tin emaw an website lama mi kha Mizoram lamin an lo zawng chhuak a, an vawrh darh ta a, party pakhat chuan an pha ruai mai tih chu kan hmu ta a ni.

Tripura-a BJP inham puarna atan Mizoramah pawh BJP an sorkar theih thu a sawi a, chutah chuan BJP chu MNF nen thawk ho an nih thu a sawi hi Mizo­ram lamah hriat ni lo se Tripura atan chuan thil ṭha a niin Tripura BJP tan thu hriat nuam tak a ni a. Mizoram lamin an lo hriat ve hnu-ah chuan MNF tan a pawi thei ta thung a ni.

Tuna taka, “Kan thawkho lo,” tih hi a theih lova, BJP thu­hnuaia awm NEDA aṭanga inhnuk dawk duh lo tan chuan BJP nen kan thawkho lo han tih ngawt hi a theih lova, chuvangin BJP leh MNF an thawk ho nge thawk ho lo tih hi chu, “Pan lovah tho a fu lo,” tih hian a chiang ta ber mai awm e, tih hi ngaihtuah peihte tan a ni.

- Lalrosiama (RSA)