'Retheite retheih chhan'
Kum 1990 chho vel aṭanga kan ram loneitute thlai chin kan buaipui dan, Synod-te Hmeithai Association te, Lalchhanhima Sailo, CIPC President leh Pu Lalduhoma teho hmalak tawh dan ka buaipui laiin, Pu Lalramnghinglova (L) in ‘Kan ram thlaphang’ tih hla a phuah, Nl. Rebek Lalruatfelin Pathianin aw ṭha tak a pek hmanga thiam em em leh mittui tla zawih zawih chunga a rawn puang chhuak hian min ei ral a. Pu Lalramnghinglova hian Pathianin kan ram tan a pek amah awm tawh lo mahse Pathian bawkin Nl. Rebeci hmang hian a rawn puang chhuak ni berin ka hria a, i han thlir ho tlang teh ang u.
Chang 3-naa, ‘Retheite retheih chhan dawn chianin lung a awi lo,’ a tih hi kan ram kuthnathawktute retheih chhan chu kan ram hruaituten dawmchhuah tumin hma an la lo, tumna tak tak pawh an nei lo. North East-a State dangte chuan an ram kuthnathawktute thlai thar phurhna man te an tum sak a, state tam tak phei chuan an loan lak te an ngaidam hial ṭhin. Kan ram loneitute hi chuan chutianga chhantu an nei ṭhin lova, anmahni chhan tura pawl lo piang thar hi an va mamawh em. Tun huna kan ṭanrual loh chuan tho leh turin kan tlu hlen mai ang tih a hlauhawm a, he hla hian min rawn au harh mawlh teh se.
Tin, ‘Hausate hausak chhan dawn chiangin lung a awi lo,’ a tih hi dik taka sum laluta hausa te chu awm bawk mahse, mi tam tak hausak chhan hi development sum te, miretheite dawm kanna tur sum te an hlep ruk vang te, damdawi ṭha lo leh khehpuam vang te a nih hmel a. Kan per capita income sannna pawh zu man vang te a nih hmel bawk si a, kristian ram tan a lungawi thlak loh hle mai ni lovin a lungchhiat thlak zawk a ni tiin Pu Ramnghinglova hian hlain a rawn puang chhuak a. Amah awm tawh lo mahse Rebeci kaltlang hian kan ram inthlan dawnah chunglamin a rawn puang ta a ni.
Chang 4-naah, Dik lo leh pamhamte endawnga hnawl ngam tur leh ram an hruai tawh dan a, hmangaihtu derte huai taka do ngam turin rethei leh chan hai te lo pen chhuak turin min rawn sawm nasa hle a nih hi. I vote thlak lai hi kan ram siam ṭhat nana kuthnathawktu leh miharsa zawkte hian tha kan thawh vena hun awm chhun a ni tih hriain ṭawngka chauhva sawi mai mai lova Pathian chakna rinchhana ram hruai tura pawl rawn piang thar lam hawi turin min au a ni.
Miten Pathian chawimawi nan leh thlarau bo te chhanchhuak turin Pathian hnen aṭanga dawngin Pathian fakna hla ṭha tak tak an phuah a, Pathian chawimawia lam leh mittui tla zawih zawih chungin an sa ṭhin a. Chutiang tho chuan Pu Ramnghinglova hian kan ram tluchhe mek tungding turin Pathian pekin a rawn phuah chhuak a, chutiang zel chuan Nl. Rebeki pawh hian Pathianin aw ṭha tak a pek leh a ruat angin Mizo hnam tluchhe mek hruai chhuak turin chunglam thiltihtheihnain a thuam a ni. A va ropui em!
Mizo hnam huaisen kan ni ṭhin lawm ni kha, hei te hi kan ram neih chhun a ni a, chhim leh hmar, chhak leh thlang lamah nen hmelmain min bei mek a, chhung lamah Aids natna leh thil ṭha lovin Mizo hnam thianghlim leh taima ṭhin kha min ei chhiain min chim mek a, chung lam aṭanga chhanchhuak tur hian a kawng chhuk chho hle mahse mut mai mai theih a ni tawh lo, ṭhalaite i harh chhuak ang u tiin min au a ni.
Pu Ramnghinglovan Pathian hnen aṭanga a dawn hla hian, Pu Rokunga hla phuahin amah a awm tawh loh hnu pawha kan rama thu a la sawi zel angin thu a la sawi zel dawn niin a lang a, a satu tura belruat Rebek Lalruatfeli pawh hi chung Pathian khian hruai zel rawh se.
- Khualluna Pautu