Kawng chhawng hi fly over a ni lo

Elevated high­way/ eleveted road hi kawng chhawng a ni a, tun hnaia kan sawi mawi leh tak fly over hi chu lei tawi te te hmun remchang laia dawh a nih avangin sawi pawlh miah loh tur a ni.

Aizawl khawpuia traffic jam tih reh tumna kawnga tuna kan Chief Minister sawi ngaihnawm em em mai kawng chhawng ngei kha kan hmuh chak leh nghahhlelh a ni.

Kum 2018 inthlan dawn khan tuna kan Chief Minister hian TV interview ah khan chiang em em maia kawng chhawng a dream dan. A kalkhang inphan dan tur chenin a sawi tawh a, kha interview ngaihnawm kha chuan vote tam tak a lei chhuak ngei ngei ang tih a rinawm.

Kha interview a a sawi ka la hriat ve reng pakhat chu Aizawl khawpui hi India rama traffic jam awm lohna state capital awm chhun an la tih tur thu lam hawi kha a ni a, ti hlawhtling ngei se a lawmawm dawn a ni.

Kan pu thusawi kha han sawi zau leh ta deuh ila. A sawi chu Aizawla kan kawngpuia thui tak maia lehlem lehlama concrete ban phuna inzar zawma dawh phei pût mai a ni a, a hlawhtlin theih vaih chuan kan khaw­pui traffic jam hi a thawlin a thawl hawk mai dawn a ni.

Hetianga kan Chief Minister-in a sawi ang taka kan tih hun zet chuan traffic jam vanga kalkawnga hun tam tak kan khawhral ṭhin hi a reh tawh ang a, kan tlan ve par par thei tawh dawn a ni.

Tun hnaiah hian Vaivakawn leh Bawng­kawna fly over siam tum a ri feih feih a, hei hi chu kawi tina state dang pawhin an neih theih thil awlsam tak a ni. Kan beisei kawng chhawng kha chu a la ni lova, sawi pawlh loh tur leh hriat pawlh loh tur chi a ni.

- Maremmawia