Written by
David Lalremruata
Virtual Festival siam kha a finthlak
Mizoram chang ni lo khawvelin hripui a tawrh avanga a in dawm kun ngawih ngawih lai taka mipui tana hri kai hlauhawm miah si lova Anthurium Festival thiam taka 'Virtual Festival' an ti ta kha ngaihtuahna an sengin Tourism Department an fakawm hliah hliah a ni.
Mi ṭhenkhatin a rem lo chung chungin ramri buainaa nuho che ṭha tak tak te thlalak leh Anthurium Festival hmangtu nuho thlalak an han dah khawm a. Chutah chuan comment chhe tak tak an han nei zui a, Mizorama mipui nuai 10 pawh kan ṭang rual thei lo hi chu a dik lo a ni.
Anthurium Festival hmangtu nuho khan ramri hi an vei lo bik a ni lova, mahse mi chi hrang hrangin tih tur hrang hrang kan nei angin ramri lama awm loten an tih tur an lo tih ve kha mai a hnawk viau em ni le?
Kan Tourism Minister leh Chief Minister te an dem phah hial pawh kha thil an ngaihtuah chian loh vang a ni. Anthurium Festival pawisa kha khami atan liau liaua an rawn pek a ni tih mipui nawlpui hian kan hriat chian a ngai.
Miin kawr leina turin pawisa an pe che a, chu kawr chu i hak leh hak loh pawh i thlalakah an lo en ve thei reng dawn a, kawr lei ta lova hnathawhna tur cement bag lei daih chu a remchang tlat lo a ni.
Anthurium Festival atan liau liau central-in pawisa an rawn pe chhuak a, chu chu Covid-19 dona atan hman theih a ni lova, sorkar hnathawk hlawh pek mumal theih loh laia kut lo hman tihte phei hi chu sorkar pawisa chet vel dan hre phak ve lo thukhawchang mai mai leh politics rimnam comment a nih avangin chhan ena en tur pawh a ni lovang chu.
Mipui tel ve theihna ni si, mipui a taka hri len laia an kal chhuah rem si lo chunga Virtual Festival tih kha idea ṭha tak a ni. Nagaland lama Hornbill Festival te pawh hian hetianga hman hi an lo tum daih tawh a ni.
Virtual Festival a nih kha chuan Mizorama lo kal kher lo pawhin tourist hip kan tum te khan state pawn aṭangin an lo en ve thei mai a. Tunlaiah YouTube, Facebook live vel aṭangin thil hi an rawn chhim theih tawh avangin Virtual Festival siamtute kha sawisel tur ni lovin fak tur an ni zawk.
Tunlai khawvelin 'New Normal' a buaipui tawh lai a, hri leng tih vanga in dawm kun reng tur kan ni lo Zofate pawh hi.