BJP thawhpui leh thawhpui loh
"BJP thawhpui in tum em?" tih zawhna chu thiam tak leh nuihzatthlak takin tehkhin thu nen MNF President zahawm tak Pu Zoramthanga chuan Zonet TV ah a chhang. Kha a chhanna kha Youtube-ah vawi hnih vawi thum ka en a, "Kan thawhpui lo ang" a ti ngam lova, fiamthu khan a tawp ta a, tuna Mizo mipuiin kan zawh chian ngai chu, "MNF hian BJP hi inthlan hmain emaw, inthlan zawhah emaw thawhpui in tum em?" tih hi a ni.
‘Vibrant Chakma Nation’ tiamtu hi ni kher lo se MNF hi hnam party tiin Mizote hian kan la ngaina tlang dawn si a, tunah chuan Chakma vote duh luat avanga Chakma ram leh hnam thiltithei tak (Vibrant Chakma nation) tiamtu party an ni tih Mizo mipuiin kan hre ta si a, thuk tak hianin a pawi a ni. An candidate ṭha tak takte vote hi Mizo mipuiin kan hreh phah a ni. Tun hnai thil thleng vang hian kan duh lo lehzual tawh a ni. He kan hnam party tia kan chhalte hian tuna kan duh loh rawn, tun hnaia kan ramin an zia dik tak kan hriat chiante nen hian an intiam rual a nih ngat chuan Mizo mipui rilru hi a thlep hnawp dawn a ni.
MNF President khan tehkhinthu thiam takin BJP nen an thawh dun loh tur thu khan a chhang a, "I nupui awmlai reng khan i nupui hi lo thi ta se la, saw lai nuthlawi Lali saw nge i neih ang Liani saw tih ang deuh a ni a. Ngawi teh u, Lali neih pawh ka tum lova, Liani neih pawh ka tum lova, ka nupui pawh a thi bawk lovang," a ti a, an nui dar dar a - pa titi thiam eltiang a ni chiang khawp mai. Mizo mipuiin an hriat chian duh chu tehkhin thu lam ni lovin chiang takin, "BJP hi engti kawng zawng mahin kan thawhpui lovang," tih an sawi tur a ni.
Tichuan, chumi nemnghet tur chuan India hmar chhaka BJP in thawhhona lian tak a din NEDA aṭang hian an inhnukdawk bawk tur a ni. NEDA-a an tel dan an zawh khan, "A... NEDA-ah hian BJP hnuaiah kan awm tih hi chu a dik a. BJP hi kan thawhpui a ni," ti se mipui hriat sa thil thu dik a sawi dawn a, kha mi a chhan dan kha tehkhin thuin han sawi chhawng ve ta ila. Naupang theihai ru an man a, "Theihai i ru em ni?" tiin an zawt a, "Thanga pawhin a ru a, Mawia pawhin a ru ve tho," ti ang deuh khan 'chumite pawh chu NEDA an ni' tiin a chhang pial ta a ni.
Ṭawngkam a thiam avangin nalh takin interview-ah thu kha vawthla zel mah se, India hmarchhaka NEDA tih hming vuaha Hindutva din tumtu (pastor rualin an sawi chhuak fo ta) BJP hnuaia kûn MNF hian Mizo mipui leh Kristianna zah vang hian, "NEDA leh NDA aṭangin kan inhnawkdawk a, state-ah, India hmar chhak leh central-ah pawh BJP hi kan thawhpui lo," tih an puan ngam hma chu a ruka inzawmna an neih hi mipui rin dan a la ni reng tho a ni.
- David Lalremruata