ENG MIZIA (PERSONALITY TYPE) NGE I NIH LE?

Pathianin mihringte min siamdan hi hriat zawh senrual loh a ni. Chutih rual erawh chuan Pathianin mihringte hnena finna a pek hmang vek erawh chuan mifing leh mithiamte thawhrimna a zarah engemaw chen chu kan hre thei a. Mizote’n nau piang hmun pawh an inang lo an tih ang chiah hian khawvela mihring tamzia ngaihtuah a, hmel inang chiah chiah awm miah lo te hian Pathian themthiamzia a tarlang ṭhin. Hmel leh landan a inang lo ang chiah hian kan mizia pawh a dang hle hlawm a nih hi.

Mizia (personality) tih hian kan rilru puthmang, nihphung, keimahni nihna tiin sawi ta ila a dik mai awm e. Thup chin nei mah ila, kan nihna, rilru puthmang hi chu keimahni ṭheuhah hian a lang chhuak tlang vek mai. Kan mizia kan tih hi kan nundan, awmdan leh thiltih danah a lan chhuah ṭhin avang hian eng ang mizia nge kan nih a hriat theih ṭhin.

Mizia inhriat chian te, midang mizia hriatsak te hi nun hona leh thawhhona ah te hian a pawimawh hle. Inhriat chian loh avanga inhmuhdan dik lo hi a tam hle thei awm e.

Mizote hi lehkhathiam tamna ram kan nihna hi ziak leh chhiar thiam tam tihna a ni ber. Hei vang hi a ni mai thei, thil chikna, thiamna tak tak kan nei tawk lo tlangpui. Tin, kan thil kalpui/ nun dan hi a nawlpui anga tih kan la tum zel vang te, kan thlirna leh tehna te pawh buklung khat a la nih vang te pawh a ni bawk ang.

Nu leh pa tam berin kan fate kan enkawl danah pawh inang tlang vekin kan thlirin kan enkawl ṭhin. Eng ang mizia nge an nih tih lam hi kan ngaihtuah loh avangin an mamawh ang tak enkawlna leh kaihhruaina kan pek loh phah ṭhin. Kan khawtlang leh a ram pum ang pawh hian thil tiho dual dual, inang tlang deuh pet peta awm tum tlat kan la ni a. Kan la tlem vang te pawh a ni mai thei e, nundan tur tlangpui kalkhat tak (stereotype) in kan la nung a. Kan intih changkang viau lai hian kan thil thlirna leh tehna te hi khawte rilru a pel thei meuh lo.

Mize ropui leh ngaih­tuahna ril (logical thinker) hmang kan tlem avangin hetiang mizia neite pawh hi kan hmu mak deuh hial zawk niin a hriat. Zirna inah pawh hei tho hi kan kalpui mek dan a nih avangin zirna kan uar viau lai hian national leh international level a invawrh chhuak thei kan tlem hle. Kan tehna hi Mizoram chhung chiah a nih avangin national level ah pawh hian kan lang thei meuh lo a ni e. Thlen chin apianga thil ṭha thlentu (change) thei tur khawpa inbuatsaih a ṭul tawh hle.

Zirna uar tura kan kalpui mekah pawh hian national leh international thlir pha chunga kalpui a hun tawh takzet mai. Chuvangin, kan tu leh fate mizia zirchian a, an mamawh ang enkawlna leh kaihhruaina pek hi kan hmalakna atan a pawimawh ta hle mai.

Aizawl College a ka thawhlai khan Inter-College Sports-ah Hrangbana College nen kan inel hle ṭhin a. Tum khat chu Foot­ball an khelhnaah buaina chhuakin, zirtirtute pawh an phusa viau mai a ni awm a (hemi ni hi ka kal loh ni a ni). Inkhelh banah pawh Bus ah te pawh an la in umzui in khaw chhungah pawh buaina a awm zui hial a ni. Hemi tuk hian hma takah College ka thleng a, pa thil hria leh rawntlak Pu T. Lalthangfala nen kan titi a. Hemi buaina leh Police lam pawhin bawhzui an tum deuh a ni awm e tih te min hrilh a, ka ngaihdan te min zawt zui a. Chuta ka chhanna chu, buaina hi a ṭha lo khawp mai, mahse hriat atana ṭha ve chu, ṭhalai thisen lum an ni a, ṭan a na bawk si a, hriatthiam chin neih a ṭul. Seraphim pawh an ni hlei nem maw le.

Pro-Pastor ang veka khawsa tura beisei chi an ni lo. Tihian ngawihsan ila, a reh ve mai ang. Boruak kan ti punlun mai mai. Oxford leh Cambridge University zirlaite pawh an in el nasa a, lawngte (rowing competition) te nei ṭhinin, BBC te pawhin live-in an pe chhuak ve ṭhin a ni. Sports ah chauh ni lo academic ah pawh inel ila, a ṭha ang chu’ tiin.

A chian lehzual nan mah­ni chanchin han sawi ila. Ka personality type hi INTJ (Introvert, Intuitive, Thinking and Judging) a ni a (Myers and Briggs Type Indicator). America rama an zirchiannaah chuan mipa ah za zela pahnih (2% of the population), hmeichhia ah za zela pakhat (1% of the population) chauh an awm.

INTJ hi ‘Master­mind’, ‘Architect’, ‘Thinker’, ‘Visio­nary’, ‘Strategist’, ‘System Builder’, ‘Conceptual Planner’ ti-a hriat an ni bawk (Google, YouTube hmuh theih; Stigma Male/ Lone Wolf tih pawhin koh ‘nicknamed’ an ni). Ka personality leh nihna dik tak hi keipawhin ka hriatchianna ala rei bik lo.

Ka nu leh pa te ṭawngkam aṭang pawhin ka naupan lai aṭang pawha danglamna nei ka nihna hi ka hre ṭhin. Ṭawng tlem ka nihna te (ṭawng nachang pawh hre lo tih ka hlawh fo), ka feeling ka sawichhuah ve ngai loh avang te, ka ngawih reng laia thil ka ngaihtuah nasat dante kha an hrethiam lo. Ka thil tawn ṭhenkhatte (khatih lai khan sawichhuak lo mah ila), ka puitlin hunah chuan midang/fate chungah ka ti ve ngai lo ang tih ka ngaihtuahte kha min hriatthiampui lo. 

Ding em em a ngaihtuahna ka hman ṭhin avanga mahnia ngawi renga ka awm ṭhinte kha an hrethiam lo. Pawl ruk ka zirlaia kan veng Games and Sports Association in meeting an kohah, a hun taka thleng tura in ka chhuahsan tawh chu ka pa (taima rum rut mai) in min ko let a. A hun taka thlen ka duh ka tih a, tu mah an kal chuang lo vang tia hna min thawhtir leh avanga ka tlai tak avanga ka rilru nat dan leh beidawnziate (engmah ka sawichhuak lo) kha ka la mitthla thei. Kha'ng hun lai aṭanga hriatthiam lohna ang kha tun hun thleng pawha he khawvelah hian INTJ mizia hi mite hriatthiam loh (most misunderstood) a la nih tho avangin ka nu leh pate’n min hauh phah ṭhin kha a lo mawh lo ve.

Ka nupui ngei pawh hian he INTJ mizia a hriatchian hnu hian min thlir dan leh beisei dan tur a hriatthiam phah a, a hahdam phah hle. Tunhma deuh khan Chhinga Veng-a Mizo nu fel leh keipawhin ka ngaihsan Pi Thanpari Pautu (RIP) khan ka nupui hnenah “Sanglura hi a fel fai si a, neih a hahthlak viau lo maw” tiin a lo zawt a lo ni. Serampore College a ka thawhpui ṭhenkhat pawh min hrechiang duh chuan INTJ personality zirchiang turin ka chah ṭhin.

Hetiang leh a aia nasa hi khawvel puma INTJ personality te tawn ṭhin a ni. A chhan tam tak a awm, chung zingah chuan, thil reng reng fel fai (perfection) taka tih an duh te, hmasawnna tur an hmuh zel avang te (have talent for seeing possibilities of improvement; hetah hian an mahni pawh an inbihchiang nasa ṭhin), an awmna apiang leh telna reng rengah a system dik lo an hmuh chak avang leh a siam ṭhat dan tur an hmuh nghal ṭhin avangte (system builders, highly analytical, problem-solvers), an ngaihtuahna thuk leh chik tak (critical thinking) an hman avanga ‘outside the box’ ah an ngaihtuah ṭhin avang te, khawtlang inkaihhruaina leh inrelbawlna (social hierarchy) in a phuar ve loh avang te, midang ngaihdan leh thlir dan tur aia ngaihtuahna ril (logical) an ngaih pawimawh zawk avang te, an bul vela thil thleng hre lo khawpa an ngaihtuahna an sawrbing nasat laia ‘death stare’ an tih mai an neih ṭhin vang te, an nuih khât (they don’t always smile) avanga hlim lo an nih loh dan te, mi ‘serious’ tak an nih laia an chhungril nun erawh ‘open minded’ an nih te, an IQ a sangin an fingin (intelligence) an inringtawk (confidence) em em laia eng emaw titi/thunawi sawi (small talk, chit chat) an ngaihnat loh avanga mi inhawng lo nia ngaih an nihna te, introvert (an tuina leh duhnaah chuan extrovert angin awm thei) an ni chunga an duh leh ṭul an tih chuan eng leadership role (born leaders) pawh an hlenchhuah theih si te, an ngaihtuahna sawrbing leh zirchiang (analyse, processing information) tura mahnia hun hman (alone) an mamawh ṭhin avang te, private life an ngainat avang te, an ngaihtuahna a chak avanga midang aia step nga hmalam (five steps ahead) a an ngaihtuah ṭhin avang te, an ṭhian/nel tur an thlan uluk (selective, very picky) zia leh ṭhian (inner circle) tawh te hnenah erawh damchhunga an rinawm (very loyal) dan te, emotional aia ngaihtuahna fim tak (logically correct) an ngaih pawimawh zawk avanga chumi hmanga thutlukna (decision) an siam ṭhin avang te, popularity leh limelight an ngainat loh avang te, thupek an ngainat loh ang chiaha midangte pawh thupek an duh loh dan te, mi zawng zawng hi enhranna awm lo (equal treatment) an pek/en avang te, mi nihna (designation) avanga an awmdan/thlir dan danglam (don’t differentiate) lote leh thil dang tam tak a ni.

INTJ personality neite hian ngaihtuahna thuk tak hmanga thil thar ngaihtuah chhuah theihna (combine creativity with logical reasoning) an neihte hi eng hna leh mawhphurhna an neihah zo tak leh ṭha taka an hlenchhuak (highest standards to their work) zel ṭhin avangin an thawhpui ṭhenkhatte tan harsatna a thlen thei. Dinhmun pangngai (status qou) ringawtah an lungawi ve ngai loh avangin hmasawn turin an thawkrim ṭhin a, an awmna apiangah hmasawnna a thleng ṭhin. An bul vela midang te, thil awm leh thlengte an chik (highly observant & scanning) ṭhin hle. An thil hriatte hi anmahniin sawi an duhna (intellectually stimulating) ah lo chuan an sawi lang ngai lo. Hetiang hmunah lo chuan ngawih (silent, rarely bother to explain) an duh zawk ṭhin. Hetih lai hian an thurawn (advise) an pekte hi mite’n an zawm lo fo ṭhin, a chhan chu an thurawnte hi step sawm hmalam (ten steps ahead) te a nih ṭhin avangin a inzawmna (connections) mite’n an hmu thiam thei ṭhin lo. Heng INTJ miziate hi an tum vang ni lovin, anmahnia bet tlat, an ‘original trade mark’ a ni.

Tunhma lam aṭang khan a chang chuan mi nawlpui ngaihtuah dan ang tawka awm ve hi a ṭha mai em tih ngaihtuahna ka nei fo ṭhin. Mahse, he INTJ personality nihdan leh nihphung ka hriatchian hnu chuan Pathianin min pek nihna hi pawmin, lawm takin hmalam panin ka kal ta zel a ni. Chuvangin, ka Mizopui INTJ personality neite pawh Pathianin min pek theihna (unique sets of skills and abilities), danglam bik leh vang tak (one of the most rare) te kha in awmna apiangah hmasawnna thlen tura hmang chhuak turin ka fuih ve che u a ni e.

- Vansanglura