AW KAN ZORAM TAK HI CHU AW ENGTIN TAK AWM ZEL ANG I MAW?

Mi dik lo zawkten tual chai nan an hmang a, mi dik zawkte chu zalen lo takin an tawmim zota maw! Kan Lalte rorelna fel tak kha a va ngaihawm ta em.

Khatih lai kha chuan mitin intluktlang thei ang ber khan ro an rel a, khawtlangah mi hnawksak an awm lo tih theih a ni. Engti zia ta nge ni ngai, a va rapthlak em tualthah invau thawm sawi ri te a lo awm nen chhuanthar te tana chenna tlak loh khawpin kan siam ang tih a va hlauhawm ta em!

Eng vang nge ni ta le? Kristian ram a lo nih hnu hi chuan an zirtir dan a fel tawk loh vang em ni ang Kristian rama thleng awm lo kan tih ṭhin hi Kristian rama thleng awm rêng a lo ni zawka ngai an piang ta nual zawng a nih hi.

Kan pi pute khan Pathian thu an sawi ve vak vak lo a, an nunin an zirtir mai a ni. Kum 100 chuang fe Kristiannain min ṭhut chilh a, hawina lam apiang a fel lo fai vek mai hi chu a rilru nat thlak lutuk ta. Kan Kohhran ber lah nise Pathian thu aiin sum thawhlawm a tlem ang tih hlauhna hi a lian ber zawng a nih hi. Sual do chu khawi lamah mah han phut chhuah chu sawi loh a Kristian lo em mai tih a ni zel mai si a, sualna hi an vulh lian a ni ber mai.

Kan VC/LC te hi khua leh tui dik tak hre chiang­tute an nih avangin khua leh tui dik tak ni ve lote chu Electoral Roll-ah thun loh ni se a ṭha khawp mai. Tin, kan politician-te lah hi vote duh vanga dan bawhchhiat pawh tim miah lo an lo ni leh zel mai si a, kan Advocate/ Ukil leh Magistrate te ni se an sum hmuhna tur a nih dawn chuan an hmel en reng reng pawha Mizo an ni lo tih hriatreng te Mizoa hming thlak nan affidavit lo siam sak ṭhin te hi tun hnuah tih tawh loh ni se a ṭha khawp ang.

Hetiang ang chi hi a lo chhuahna bul nia lang chu kan Kohhran lamin an rawngbawlna hmuna hnamdang Kristian a inpete Mizo hming an phuahsak a, Mizo hminga Birth certificate an siam sak ngawt ṭhin vang te hi a ni. Birth Certificates hi Mizoramah chuan kum 1985 aṭang khan hman ṭan a ni a, he thil hi Mizoin kan chhiat pui ta a ni ber mai. Non-mizo ten hmun, tam takah Mizo-te hamṭhatna min chuh puiin kan tluk lohte an lo ni ta zel a ni a, a pawi ṭhin khawp mai.

Tin, kan Mizo hmei­chhiate'n hnamdang pasal a an nei hian min tibuai thui hle bawk fa an nei a, an fate kha Mizo hming an lo phuah a mahse Non-mizo anni tho mai si a. Hengte avang pawh hian engkim mai hi a felfai lo zo vek a ni.

Kan hun kal zel dan tur ka thlir hian Zoram hi a lungchhiatthlakin, kan tu leh fa te chenna tlak lohin kan siam ang tih hi ka hlau ta a ni.

Kan Rorel tute lah hian bei an tidawng chiang bawk si. Kan state boundary te vawiin thleng a chinfel loh a la ni hi British min awp laia kan ramri chin kha kan la claim dawn lo'm ni? Naupan lai a kawr, puitlin thleng a hak theih a ni si lova, kan lal leh pasalṭha ten nun chán khawpa an lo martar chhan Zofate luah chin ram hi Zofate tâ a ni si a, hnamdangin min humhim sak dawn si loh avangin keimahni ngei hi a mawhphurtu kan ni a, hei lo hi "Ka Ram" tih tur kan nei lo.

Chuvangin, ngaih­tuahna thar nen, ṭhahnem ngai takin kan mithiam zawkte'n hma thar han la teh u khai, Zofate kan boral zawh hma hian. Mizo ram leh hnam dam reng rawh se.

- Zoramenga