NUNGCHA TEN SIAMTU AN FAK

Nungchate chuan anmahni hunbi ṭheuhah siamtu an fak a. Reilote chhung atan hunbi a lo inher chhuak a, chu hun ropui, mawi leh duhawm takah chuan siamtu kutchhuak ropuizia nungchate chuan an rawn fak ṭhin.

Kan ramah hian hunbi pali... Thlasik, Fur, Thal, favang te chu an mahni hun ṭheuh zelah a lo thleng a, heng hun pui pali te zaia rawn awi turin nungchate chu an lo piang a, siamtu thilsiam mawina chu an rawn fak ṭhin.

Nungchate chu siamtu ang maiin an danglam ve lova, mihringte erawh chu kan lo danglamin fakna hla pe chhuak tur pawhin zirtir kan ngai ṭhin. Nungchate awrawl chu a mawi a, hriatna tura beng nei chuan sawiselna tur an hre lo. An awrawl mawi takte chu a tira siamtu in a pek original dik takte an la ni a. An chaw zawn nan ṭangkai lo mah sela, thilsiam mawina te an hmuhin an ngawih bo pui thei lo a ni.

Favang a liam ṭep a, losul therengte chuan feh hawngte chu kawng lakah zaiin an lo awi a, hlim takin In an thleng ṭhin.

Mizoramah rimawi a awm hma pawhin kan pi pute zaia lo awi tleitu an ni. Annin ram lamah fakna an pe chhuak a, keinin In lamah fakna kan hlan thung a ni. Dawlrem te, nipui therengte bakah uleuh leh ngirtling hram ngatte phei hi chu a ri a mawi a, rual u te lo awi tleitu an ni. Lunglenna inthup tlat, rilrua riak rengte chu a rawn kai harh a, kum tam liam hnua kan sulhnute kan hre chhuak a, chutah ngei chuan kan lung a va leng vawng vawng ṭhin.

Khuanu in a thil siamte fakna tura nungchate aw mawi tak mai a lo pekte chu mihringte siam chawp rimawi hian a tluk thei ngai lo. An thawm ri mawi takte chu kan bengin a lo hriatin, rilru a tiharh a, nun a tihlim a, chu chu taksa tan hriselna a ni.

Nungcha ṭhenkhat chu an tet em avangin an aw ki sang lutuk leh te lutukte chu mihring bengin a zuk hriatpui phak lo a ni. Mahse anmahni chenna khawvel zimteah chuan siamtu an fakna thawmte chu thil ri ring ber ang maiin hla tak aṭang pawhin an inhre tawn thei a ni.

Rannungte hi tih hlum mai mai tur a ni lo. Keini aiin siamtu an fak thiam zawk a, an aw rawl a chuai ve ngai lova, engkim siamtu chuan duat taka a lo enkawlte an ni si a. Hei hi ngaihtuah teh, ramhnuaiah chuan i hlamkhat bial lekah khan Lalpa’n a duh taka a siam rannung sang tam takte chhun zan zawma an khawsakna hmun a ni. Chulai chu an tan khawvel zau pui a ni a, siamtu thil siam hausakna ren rual loh chu kumkhuain tah chuan an chen a, mak leh danglam taka siam ṭheuh an ni si.

Keinin kan duh dana kan tihlum leh ringawt ṭhin hi siamtu duh dan a ni lo. An khawngaihthlak lutuk - hawh u nungchate hi i duat leh zual ang u. He leilungah hian anni te nen awm ho turin Lalpa buatsaih kan ni si a.

- H.Neihchungnunga, Durtlang North