MIZORAM AGAINST CORRUPTION KAWIAH NGE?

Kan ram, Mizoramah hian mi nâwlpuiin kan hriat leh kan rin phâk bakin corruption hian zung a lo kai nghet hle tawh a, kan hriat chhuah ve meuh chuan phengphehlepa khua kan tlai zo tawh fo ṭhin. Corruption leh dik lo taka thiltihte chu kan nitin nunphung pakhata bet tel ve ang hrimin kan ngai ta hial em ni aw tih theih khawpin, kan theng-thawngah a thawk bawk hek lo.

Eiru thei leh dân bawh­chhiaa dik lo taka thil ti te chuan sum (pawisa) an ngah tâwk phawt chuan kan endawng ngam meuh lova, endawng a hnekin kan hlau ti tih tlat tawh. Hei hi nunphung nghetah kan nei chho a nih vaih chuan, kan ram hi mi dik lote leh eiru hausate tân nuamtâwlna lammual a ni mai dawn.

Eirute, hre reng chunga dik lo taka thil tih chingte kan hnualsuat ngam lo emaw, kan do ngam loh chuan kan chan hian maian chan a tluk loh hun hi a thleng mêk a ni. Eiru leh dik lo taka thiltih chingte do ngamtu leh action la ngamtute lah chu, kan thlawp ngam lo lek lek fova, a dik lo zawk ang maia kan chhuah chang lah bo lo. Hetianga corruption leh dân pawisakna nei lova palzam mai maite do ngam, mi tlêmte kan neihte hi i thlâwp ngam teh ang u.

Hman kum khan T.V news ka en laiin, Mizoram against corruption din a nih thu kha ka lo ngaithla ve a. Awmhmunah ka lo lawm ve hle a, chak tak leh vung takin hma an la chho turah ka ngaiin, ka beisei a. Amah­erawhchu, kha Mizoram against corruption kha tun hunah hian a reh ta vang vang ni hian a lang a, enge an tih a, khawiah nge an awm? tih hi tunlai chu ka ngaihtuahnaah a rawn lut thar thut a. Kha kan against corruption kha a la awm a nih chuan hmalakna tur a va tam tehlul êm.

Tun huna kan ramin corruption do ngam kan neih mi tlêm tête hian, anmahni mimal ṭhahnem­ngaihnain theihtâwp chhuah lo phei sela chu kan chhangchhe zual hlein a rinawm. Huaisen taka a langa pâuva corruption do ngam a, thil dik lo haih chhuak ngam kan neihte hi kan ram tân an hlu takzet a, anmahni avang hian mipui chanvo tam tak bo hlen tur kan hmuh lêt leh hi a awm nual âwm e.

Kan ramah hian corrup­tion leh dik lo taka thiltih a tam thawkhat a ni tih leh chutiang mite chuan kan hriat loh hlanin ram mipui tam tak an lo hruai kawi mêk a ni tih a lan chian êm êmna pakhat chu, mi dik lote'n thlâwptu leh thlavang hauhtu an ngah viau zêl hian a ti chiang hle.

Hetiang thu han sawi hian, sorkar ding lai sawi bîknaah mi tam takin an lo ngai leh maithei, chutiang chu a ni bîk chuang lo. Khaw tinah, vêng tinah corruption hian bu a khuar a, mahni theihna zawnah kua kan hreuh tih theih mai turin corruption hi a huangtau mêk a ni.

Corruption titute leh dik lo taka thiltihte han sut deuh hlek lah hian, an inhawrkhawm a, an lo tam angreng viau mai zel si a, anmahni su ngamtute (corruption do ngamte) chu an dik ta lo zâwk em maw ni le aw? tih tur khawpin do hneh an har tlat tawh nia.

Tun huna kan ramin kan mamawh chu, huai taka corruption do ngam leh mi huat pawh hlau lova mahni chauh pawha thil dik lo bitum ngam kan mamawh.

Hmâna Mizoram against corruption pawh kha, kaihthawh zawh loh khawpa a lo muthlu tawh a nih pawhin, kan hun tawng mêk hian han kaiharh teh se. Kan ram neihchhun hian corruption do ngam kan mamawna a sâng ta êm mai.

- M.C. Lalthianghlima