Nuai 100 tamzia kan chhut a ngai

Ngaizawl khaw kawngpui chung chang hi kan ngaihdan lo sawi ve hi kan right a nih angin kan sawi ve dawn. Thu belhchian dawl lo mai mai sawi lova a dik tak sawi ka duh avang erawh chuan a dik hre lo ta chuan mi thu ziah sa ka rawn comment mai dawn a ni.

Social media lama sawi hlawh tak David Sailo hi tun thlengin tumah hian kan la hre thei lo a nih hmel si a, he pa hian thil a hre thei fu tlat a ni. A thu sawite hi Assembly House thleng thlengin an rawn khak tawh a, chuvang chuan kan sawi chhawn ve hi chu thil thiang a nih ka ring.

David Sailo 'inti' tiin ka han ziak kher ang a, a thu ziah aṭanga kan hmuh chu, "Khawzawl - Ngaizawl kawng siamna, Class I Contractor, Pi Collin Lalsangpuii hminga Pu Lalrinliana Sailo (Assembly Speaker) chhân ni a Ngaizawl All NGO te sawi, Pi Romuanpuii Zadeng thawh tak berah chuan kan Speaker chuan Romuanpuii lakah hian Nuai 100 a lo la niin Voice Record a darh leh ta! A tak a nih chuan he hna hi chu chhe ve tak tur a ni reng a ni," tih a ni.

He thu hi a dik leh dik loh lam sawi lovin nuai 100 tamzia hi a ni ka lo sawi ve duh chu ni.

Inpuhna satliah mai mai ni dawn se a voice record leak kha kan lo ngaithla ve tawh hlawm si a, Ngaizawl All NGO hian dawt phuahchawp voice record an ti leak a nih loh chuan khawiah emaw hian nuai 100 hi a riral ngei a nih hmel a, chumi lo eitu chu Speaker a ni emaw ni lo emaw hi ka care ve lo. Ka care ber chu cheng nuai 100 bo tih sawi chungchangah hian a tibotu (midang eia puhtu) hi man ni se, chuti chuan thu dik a rawn chhuak vat ang.

Nuai 100 a bo thu chiang taka sawi a nih hnu hian kan ngawi bo mai mai dawn em ni le? Khawnge kan Kohhran Hruaitute pawh hi an awm bo zawh tak le? Hetiang moral khawih thil pawi lian tham ni si hi ngawih bo san chi a ni lo e.

Home Minister ṭawngkam anga mit lo siai ve mai mai chi pawh a ni lo. Nuai 100 hi a tam si a, mipui pawisa a nih avangin chhui vat a ngai a ni.

- Lalthansanga