M O B

Tun hnaiah Mizo hnamin chhan a ngai riauva hriatna a sosang a. Hei hi mifing leh thil chik miten, hun liam tawh leh awm meka kan hnam leh ram awmdan an chhut neuh neuh avanga lo awm pawh niin a lang. Chuvang chuan kan hnam chhantu pawl ropui leh zahawm YMA a lo pen chhuak ta, a lawmawmin a thlamuan thlak ngei mai.

Dik tak chuan, YMA lo hi chu kan hnam security thil tak tak atan chuan rin ngam a har deuh va. Tuten emaw Ajino moto siam dan an sawi a, 'Ajino moto tlem an telh' an tih ang deuhvin, thildang tlem a tel ṭhin avangin. Kohhranin a hma han lak chiamna chi a ni mang si lo.

YMA chuan 'Hnamchhan Hnatlang' a ko ta rup mai le, a va lawmawm em! Mizo chanchin a hnatlang awm tawhah kan thawh ṭhat ber tum a ni awm e. Kei, Lawngtlai lamah rawngbawlna avanga ka zin lai a ni a, kawng lakah ka tangkhang kual ta mai mai a, rilruah erawh a cham reng mai. Mahse, hnatlang pui hma ni aṭangin kan awmna Kolasib lam chuan, Mizote vaw tur vai sipai phur tur motor dang turin hnatlang an lo tan a. Hetah hian ka nupui a lo hnatlang ve hlauh a, ka rilru a dam deuh huai. Hnatlan ni takin zing lamah Aizawl ka lut phei a, Aizawla awm kafate hnatlang turin an lo in peih a, an lo za zek zek tawh a, run ngai chhungkua kan nilo chu ka lawm khawp mai.

Kan han hnatlang ta a. Aizawlah a tam a tam mizo mipui an pungkhawm ta. Kan zai, kan lam, kan au rual, a ri a va mawi em! Yutube lam leh news channel ah a lang nghal chuai chuai a, khawvelin min hria, Mizoram sahthlak tumtu ten an hria. World trade center tihtluk a nih nia President Bush an zawhna pakhat a chhanna min tihre chhuak a. Mi pakhat a rawn au lauh lauh a, 'President min hre phak em?', "Ka hre phak che, khawvelin an hre phak che, he building ti tlutu te pawh hian an la hria ang che" a mawi ka ti. World Trade center ti chhe tute'n an hre chiang ta reng mai.

Sawi tur a tam, sawi zel a chakawm! Ka sawi tum zawk chu ‘mob’ chungchang zawk hi a ni. Ṭhenkhatin inti fing tawka fing takin chet a ngai, ruih loh tur, buaina siam loh tur, de de dei dei an lo ti ve ziah hi a ninawm riau. ‘Mob’ hi duh vang nilo va, lo theih lohna avanga mipui pung khawm, dan pangngaiin a thunun zawh loh kal khawm sawina a ni tih hriat loh hi a mawl thlak daih zawk.

Chanchin Ṭha leh sum tam taksengso va kan duat, kan hmangaih ten khawvel hmaah min hek a, min kher a, min timualpho va. Kan khum laizawl min chuh a, chu mai chu duhtawk lovin min nek chhuah an tum a lawm maw le! Kan duh vang reng ni hauhlo vin, chu chuan min tur chhuak a, thinur inhawrkhawm kan nia lawm. Kha hnatlang a Mizo mipui pungkhawm kha khawvela ‘mob’ smart ber a ni hial ang chu!

A epicenter, Mizoram khawthlang lam khawpuiho hi ‘Nopui’ i hlan ang u. Kolasib, Mamit, Bairabi, Kawnpui, West Phaileng, Phuldungsei, Kawrthah, Rengdil, Zawl­nuam leh a chheh vel khuate u, in hming a mawi. Hnam chhantu, kan hnam tana daitheutu, ral vengtu in ni. Keini chuan ti hian

ṭawngkamin kan ti ve chauh a ni, nangni chu a takin in che chhuak thin. Kan khawthlang lam tlangvalte an che rang

ṭhin a, a lawmawm. Tun ṭum pawh Aizawl lam kan inrin hma daih khan motor lut leh chhuak thlithlai turin nula tlangval an lo duty tlaivar reng tawh a lo ni.

Fb ah @Matana Pachuau in, Kolasib a hnam chhantu hna­tlang zingah zu lo nam deuh an awm avanga mawl a tih thu a rawn ziak hi pai daih a har. Chuti ang awm miah lo tura ‘mob’ beiseitu hi a mawl viau zawkin ka hria. Kola­sib tlangvalho thawh ṭhatzia leh thawh ropuizia hi a taka hmutu ka ni. An zarah dan lova Mizorama vote neihtirho pawh ennawn tur a tih a nih tak hi.

Khami ṭuma hnatlang zawng zawng, an za vai tak­meuhin, mifing mahni ram leh hnam chhanna chang hria an ni. Khawvel ram ropui zawng zawngte chanchina be tlat chu ‘Mahni ram leh hnam din chhuah nana sual (fight)’ chanchin hi a ni.

- Rev. Jh. Za Hluna