MLA nih tuma eiru leh Khehpuam inlar hi
Hman zanah Whatsapp titi pakhatah chuan MLA inthlan lo awm turah eiru chiang bang, thubuaite pawh lo nei tawh eng emaw zat an awm bakah Khehpuama inhnamhnawih an sawi theih mi pali vel an awm a nih chu mawle! Hei hi a sawitute hian an hre chiang si a, kan inthlang tur hian mang a ti ang a ngawt mai.
Eiruk thubuai nei han tih hian eirua puh an ni tihna a ni a, chumi awmzia chu miin eiru angin an hriaa thubuai an ziak lut a ni a, eiru heti zat awmna rama thubuaia ziah luh tawh chin hi chuan an eiru ngeiin a rin theih a ni. Midang aia fing fal leh thiamna sang bik nei pawh ni lova project siam thiam em em anga awmte hi chuan a tihlawm tur apiang kha an tilawm zar zar tihna a ni bawk, an ti lehzel a, ngaih a ṭha lo ru veng veng a nih hi.
Khehpuam hi han sawi ta ila, mimal tak hian tun thleng hian pseudoephedrine hi ka la hmu lova, hetiang thila inhnamhnawih te hi an hausa em em
ṭhin a, chu an hausakna pawisa chhuang chuan politics-ah an zuang lut a, an pawisa neih chu an han sem kual a, chu chu mipui chuan “thilphal, retheite hmangaih” te an lo ti a ni awm a, mang hi a ang chho zel a ni.
Zep tur pawh a awm lova, MNF-in Congress mi a nihlaia Khehpuam ah a inhnamhnawih tia an sawisel nasat em em pawh kha tunah MNF hian an kuangkuah thei a, hmanah khan dawt sawiin an lo tifiam mai mai tihna a nih loh chuan he pa hi khehpuama inhnamhnawihah MNF hian an puh tawh chiang tih Zoram mipuiin kan hria a ni; a nih loh chuan MNF khan dawt mai mai hmangin mipui min bawl tihna a ni ve thei bawk.
Han sawi ta zel ila, kan ramah hian eiru hi kan hua a nih chuan Home Minister an nih laia hausa chak uchuak pahnih kan neihte hi kan hnawl mai dawn lo em ni? Chief Minister an nih chhunga hna dang sum lakluhna an thawh kan hriat si lova hausa uchuak Chief Minister ni tawh pahnihte pawh hi hnawl ngam kan nih loh chuan eiru haw tak tak lo kan ni mai si a. Chutiang bawkin Education Minister a nih laia hausa ta em em mai, ‘mi hausa’ tia sawi tura awm thut thei politician te pawh hi paih thla ṭhak ngam ila.
Khehpuam leh eirute pawh kan thlan tlin chuan Mizote hian eirukte leh khehpuam hi kan lo haw tak tak lo a ni dawn tihna a ni a, ngaihtuahna fim kan put a ngai ta a ni.
- John Zothanpuia