Suma lei mai theih Mizote

Khawiahnge kan rinna chu a awm tak? Missionary, India rama kristiante tawrhna thu ziak a, "An hmanrua ber RSS ho chu BJP political wing an ni" titu chuan, BJP a zawm pahin, a hlauhawm lo, a ti leh ta vel a. Chu lo pawh chu rawngbawltu pawimawh tak takte, thlem thluka an awmzia hi! Kan rinna fiahna chu hei ngei hi a ni mai lawm ni? Development hmachhuana insawi mawi, chhungrila pawisa dawn duh vanga sakhuana nghawng lo zawnga sawi mam. A therhlo um vang a, Mizo hlang awmna khuaah ngei pawh, India ram hi Hindu rama siam tumtu party chu “Majority kan ni ang" tia, zahpui miah lo va sawi ngam kan awm tawh.

MLA in candidate nana thlemna an hmachhuan nia an sawi "I account-ah Rs 20,00000/- kan rawn thun ang" tih te a ri nawk mai. Inchirhthehna hmanrua mai a ni em? Pan lovah tho a fu lo tih a ni, a par an vul mawitir thiam em avangin, rin loh pui puiin an bawm chu a nih hi.

Hei aia thlemna lian zawk tur chu, MLA lei nan sum tam tham tak an la hmachhuan leh dawn tih thawm hi a ni. Hmannia Minister pakhat titi ka benga lo lut chu. "Kan tlin leh mai chu a beiseihawm, mahse kan MLA zingah lei theih kan awm ang tih hi a hlauhawm lai chu a ni" a ti. State dangah pawh lei theih MLA te avangin, BJP sorkar a pian thu an sawi lai hian, kan ramah ngei pawh a danglam bik lo tawp ang.

Ka rinna a ti buai lo, tih chhuanlam hmanga, BJP sawi mawi a, Politics leh Sakhuana chu a dang hlak a ni, titute hian, India ram hi Hindu rama siam tumtu RSS kutke bera hmangtu Party an ni tih hi an haider lui tlat chu a nih hi.

Kumin October thla khan 80% Hindu awmna Nepal-ah anti-conversion law an parliament-in an passed thar a. Hetiangin:

1. Mahni sakhaw chanchin mi dang hnenah sawi phal a ni lo.

2. Tumahin an sakhuaah mi dang an inlehtir tur a ni lo, mahni sakhuaa an inleh duh nana mi dangte hip nana hmanraw hrang hrang hman khap a ni.

3. Chhutianga che an awm a nih chuan, kum 5 chhung lungin tan leh US dollar 50,000/- chawi tur a ni.

4. Foreigner chutianga man an nih chuan, hrem an nihna a zawh veleh, ni 7 chhungin an awmna ramah thawn haw nghla tur a ni.

Lo ngai reng rawh u, keini pawh Parliament-a majority vote an neih hun hunah, Sakhaw zalenna ram dan hi, tih danglamin a awm dawn khawp. Chutih hunah chuan sum kan um avanga sakhaw nek chepa kan awm hunah, a rah kan la seng tlang ngei ang le.

Khawvelah Hindu lal ram chu Nepal chiah a awm, Mislim leh Kristian lal ram chu zau tak a ni. 85% Hindu awmna ramah hian, sakhaw inleh khapna hi hman ve an chak lutuk. Nepal rama Missionary hna thawk mek hnenah, harsatna thar an tawk em tih ka zawhna chu, "Sorkar hian thil dang tih tur hi an ngah lutuk a, buaina thar chu kan la tawk rih lo chu a nih hi" tiin min chhang.

Nepal ram ang mai mai kan ni dawn lo, keini chu RSS te din Political party an ni miau a, kan chep khawp ang le.

Ramri leh mikhual cham rei problem kan neih mek pawh politics duhamna avangin kan tuar mek a, sakhaw zalenna kan neih pawh, politics avang bawkin kan tuar leh a nih chuan, chhuan lo awm zel turte tan, tuna kan tuh rah hi kan la seng tlang ngei dawn a ni. Sum ngainat hi sual tinreng bul a ni asin.

- Lalrinliana Colney