A hun hmaa bomb puak a pawi
Sangha man nikhua hian gelatine bomb hi a hun hmaa a puah dur chuan sanga bomb hman lovin a bomb vawmtu zawkin hliam an tuawrh phah a, thih phah hialte pawh an awm ang bawk hian, politics-ah pawh hian ahun hmaa bomb puak hi a pawi thei a ni tih mizoram politics dinhmunah a lang chhuak chho mek a ni.
Pu R Lalzirliana leh Pu Lalrinliana Sailo te hian MNF hi a rukalo dawr reng tawhin Congress meeting hrang hranga an thurelte pawh an lo hrilh chhawng daih tawh chu lo niin, an ni pahnih leh MNF hian bomb kam an neih chu inthlan puan a nih hnua vawi leh khata Congress chhuahsan thuta a boruak san lai taka inthlana Congress vuak chhiat a ni. Congress lamin eng tin emaw an lo rhiat ruk avangin Pu Zira hi insawi fiah turin an ko ta a, tichuan an ban chhunzawm ta bawk a, an tum angin inthlan puan hnuah chuan thil thleng se Congress tan in siam ṭhat na hun a awm tawh lovang, an bomb kam a puak hma hret hi a ui dawn a ni.
Pu Zira ban dawn khan Block leh Unit hruaitute ko khawmin zanriah a kil pui a, mittui tlain a ban tur a hrilh a, Congress Block leh Unit hruaitu tam tak kha an nghing a ni. MNF tana uih-awm tak thleng chu Ṭawi Bial Congress hruaitu te khan Pu Zira kha an zui nghal mai lova, boruak a kal chho zel a, District politics khel lovin amah mimal survival politics mai a lo khel tih an hriatin an chhuak ta lova, Pu Zira bomb puak hi a thawh nat tur angin a thawk na lo a ni. MNF lam hian Ṭawi bial leh Chalfilh bial hi Congress an nih laia a ruka an dawr te tan hian an lo dah ṭha khiau a ni.
MPC MLA neih chhun Pu Than-liana pawh hi amah thlangtlingtu party MPC lam thilah a lang duh tawh si lova, in-thlan dawnah MNF-a luh tuma ruahmanna neiin MLA Fund a neih te pawh MNF lam duhsak takin a hmang a, MPC leh ZNP thawk hovin ZPM an siamah a tel duh tawh lova, in-thlan dawna chhuah a tum chu boruak dang vangin a hun hmain a chhuak ta a ni.
A hun takah bomb tipuak se chu insiamṭhatna hman awm tawh lovin kan in-thlang nghal dawn a, a hun hmaa a puah dur avangin a thawk nêp dawn ta a ni.
- Lalthanpuia Hrahsel