NIHNA

He khawvêla kan châm chhûng hian thil pawimawh êm êm a tel lova mihringte nundân leh khawsak phung buai vek thei a awm, chu chu 'nihna' hi a ni. Kan nihna a zirin mite'n min hmuh dân a hniamin a sâng fo si a!

 

Mi tinte hian nihna kan nei rêng em? Nihna awmzia eng nge ni? Nihna hian mihringte-ah eng ang chiahin nge thu neihna a neih? Nihna chelh tam lutuk hian mimalah leh chhungkuaah buaina leh harsatna a thlen thei rêng em? Nihna kan neih chhan eng nge ni? Zawhna dang tam tak a awm. Mi tinte hian nihna kan nei rêng em? Mi tin hian nihna kan nei ṭheuh, chu nihna chu thilsiam zawng zawngte zînga lal ber nihna hi a ni. Chu mawhphurhna min pêk chu leilung leh a chhûnga thil awm zawng zawng enkawla venhim hi a ni. I nihna angin i awm em? 

“Nihna awmzia eng nge ni?” "Nihna awmzia chu kan nihna ang taka a taka thiltih hi a ni. "Nihna hian mi­hringte-ah eng ang chiahin nge thuneihna a neih?" tih hi. Hei hi mi tinte'n kan hriat chian a ṭul hle. Zu rui ṭhin pawh rawngbawltu atâna ruat a nih chuan, "Zu rui tawh suh," tia kohhran miten an tih kher a ngai lo. “Ka nihna hian min thunun ta, rui thei ka ni tawh lo," tih nachang a hre mai tur a ni. Dik taka kan nihna anga kan awm a, thiltiha kan lantir ngam hian chu nihna chu nihna a ni chauh zâwk. 

Nihna a zirin thil a danglam thei hle. US President leh thingtlâng kilkhawra pa pakhat hian thu inang chiah sawi se, a darh zau dân leh bengkhawn a hlawh dân a danglam viau ang. Nihna ropuizia leh thil tihtheihzia a lang chiang hle awm e! Nihna chelh tam lutuk hian mimalah leh chhungkuaah buai­na leh harsatna a thlen thei rêng em? Chhanna chu, "Thlen thei tehrêng mai!" tih hi a ni. A chhan chu pawl tâna ṭângkai takte hi chhungkaw tân min hmanthlak lo leh mi hnawksak ber berte an ni fo. 

A theih hrâm chuan nihna chelh kawp loh hi a ṭha a, huaisenna tak tak nei tur phei chuan a ṭha leh zual. Loh theih lovin in­daih loh luat vâng te, mi thiam filawr, etc., nih avâng tea nihna chelh kawp deuh ṭeuh kan awm pawn dik takin thil ti i la, chu chu kan duhthlan tur neihchhun leh kan huai­senna theihna tur a ni. Nihna kan neih chhan engnge ni? Kan nihna leh kan nung­chang a inmil tur a ni. Kan nihna chuan min thununin kawng dik min zawhtir tur a ni. Nihna anga nung si lo, nungchang chhia kan neih chuan nihna aṭânga mite'n min paih hun nghak kher lova, huaisen taka bânsan ngam mai tur a ni. "Mi­in nihna an pêk che chuan rangkachak tlukah ngai rawh. Nang­maha rinna an nghah ngam avângin!" Hei hi i hre reng ang u, kan nihna chu a sâng emaw a hniam emaw kan nihna a ni tih hriain, kan nihna zâwn ṭheuhah huaisen leh dik takin kan nihna chu hmang ila, a ṭul chuan dikna avânga kan nihna pawh chân ngam turin i inbuatsaih ṭheuh ang u. 

- Centenary C. Lalzahawma