EVM ring lotu chu EVM hmangin kan vote ngam lo

Chief Minister kum 10 lo ni tawh Pu Zoramthanga’n kum 2008 leh kum 2013-ah ka tlin loh chhan chu EVM kha an tihchingpen vang a ni, a tih kha TV ka enlai pawhin ka zak chem chem tawh a, Mizorama Chief Minister nih tum thusawi kha a mak lutuk hi sawi ngaihna pawh ka hrethiam lo a ni.

EVM tihchingpen avangin new comer Pu TT Zothansanga kha vote sang chuanga hneh lo niin a insawi a, “Kum 10 kan sorkara mipui an lawm vanglai takin ka tla thei lo hrim hrim,” a tih khan mahni a inhriat chian lohzia a tilang bawk a, mipuiin an duh tawh lova, an paih tawh kha EVM vanga tla anga a insawi khan mipui min zah lo a ni.

Tin, 2013-ah Pu T Sangkunga hneh lo kha rigging vang a ti leh bawk a, “Kan tihdik loh vangin kan tla a, mipui ngaihdam kan dil e,” tih tak aruanga amah hnawltu mipuite duh lohna pawm lova, “EVM an tihchingpen vang’ a ti leh kher kher kha chu lehkhathiam chin tan chuan ngaihdam theih a ni lo.

Kum 2008 inthlan zawh hlim rilru buailai leh 2013 inthlana chiang taka an tlak nawn leh avanga party mipui rilru thawi damna turin chhuanlam lo zawng ve deuh chu ni se mipui pawhin an hrethiam ve deuh thei mai thei a, tunah chuan kum 2018 kum tawp a ni tawha inthlan kan hmachhawn leh dawn tawh. MNF President khan mipuiin an hnawlna kha pawm duh lovin MLA inthlan hmasa pahniha an tlak chhan kha EVM an tihchingpen vang liau liau niin a la puh hi zoram mipui min zah lohna a ni.

MNF MLA panga-te hi zawhna ka han zawt che u ang a: Pute- Vanlalzawma, K Sangṭhuama, Lalrinawma, Lalruatkima, Dr Beichhua-te kha EVM tihchingpen vangin in tling tihna em ni? In Party President chuan EVM kha an tichingpen a ti a, chuvangin amah (Pu Zorama) chu tla niin a in sawi a, nangni panga EVM kha an khawih ve lo hlauh nge ni an tichingpen chung chungin an titla ve zo lo zawk che u? Nangni panga hian EVM tihchingpen danna injection in lo la bik em ni zawk? 2013 MLA inthlana EVM hman kha tihchingpen a nih thu Pu Zorama khan a sawi si a, nangni hian EVM kha khawih chingpen niin in ngai nge ngai ve lo?

MLA ve meuh in ni si a, in party Presi­dent chuan in tlinna EVM kha Congress hovin an duh tawka an khawih chingpen a ni, a ti hmiah mai si a, chu chu in pawmpui nge in pawmpui lo? Congress tlinna tura an siam EVM-ah in lo tling ta bik hi enge a chhan, Pu Zorama in phatsan bik em ni?

Mi a nileng lo tan chuan MNF MLA pangate hi an tlin chhan leh an tlin dan hi awlsam takin a chhut theih a, chu chu heti hian a mal te tein han thur ta ila: Pu Zawma hi pa ṭha, YMA President hlui leh MP hlui a ni a, mipuiin an duh vangin a tling a, EVM vang a ni lo vang. Pu K Sangṭhuama pawh hi a khingpui ber ZNP President Pu Lalduhoma a ṭawng sual a, bial pahnih a vil sia bial a fang taima lova, Congress-in hmeichhe candidate an dah bawk zarzovin a tling a ni a, EVM a ni lo.

Pu Ruatkima pawh YMA hruaitu hlui leh pa taima a ni a, MLA-a a tlin hnuah kum nga chhung taima takin bialah a inhmang zui zel a, MPC leh MNF an thawh dun avangin MPC tamna bial an nih a chhawr tel bawka a tling, EVM vanga tling a ni lo. Pu Lalrinawma hian rin loh takin vote 20 velin Tuikum bial a rawn la a, a chhan an sawi chu Ziona Pawl vote a hui vang a ni; amah hi pa inngaitlawm mipui ngainat hlawh tak a lo ni bawk si a, a tlin chhan hi EVM a ni lo.

Pu Beichhua hi pa ṭha leh fel a nih bakah MDF-in MNF an support-a a tling a, EVM vang a ni lo. Heng MLA panga bakah MPC MLA Pu Thanliana leh Congress MLA 34-te kha EVM vanga tling ni lovin mipuiin an duha an thlan a ni. A tla zawng kha (Pu Zoramthanga tiamin) mipuiin an duh lova an paih a ni.

Pu Zorama hian amah leh MNF tlak chhanah EVM hi vawi khat pawh puh tawh lo se, amah hnawltu mipui vote hi zah ve tawh se; chuti lo chu mipui vote a pawm loh avangin 2018 inthlanah pawh mipui vote a beisei thei bik lovang. Mipui min ngai mawl lutuk leh ṭawngkam thiama mipui hi bum theihah min ngai em ni? MLA inthlan hma lawkah kum 2008 leh 2013 inthlana tlak chhanah EVM a la puh lui ngam ngat hian mipui hi min ngai mawla bum theihah min ngai ta tihna em ni le?

EVM ring lotu chu tun November 28 inthlan lo awm turah hian EVM hmangin kan vote duh dawn bik lova, EVM a rin loh avangin amah leh a party vote na atan EVM kan hmang ngam dawn lova, EVM chungchangah hian MNF party leh an president hian mipui hnenah ngaihdam dil phawt rawh se.

- Lalṭanpuia (ṬPA)