Joint Platform-ah ka kal ve a...

Aizawl East-II Constituency MPF Forum te chuan ni 9 Nov, 2018 khan Dawrpui Multipurpose Hall-ah Joint Platform an buatsaih a, hlawhtling taka hun hman a niin a hmuna ngaithla mipui pawh an ṭhahnem hle. He programme hi DDK chuan National Programme-ah vive telecast coverage-in an pe chhuak a, MPF Forum te inbuatsaihna a ṭha hle a, East II chhunga tlawmngai pawl hrang hrangte pawh an fakawm. He hun hi kumina joint platform neih hmasak ber a niin mipuiin an hlut a, Aizawl khawpui chhungah pawh hmun laili bera awm te’n hetianga programme an buatsaih hi an fakawm hle a ni.

East - II Constituency MLA can­didate mi palite an tel kim theiin rorelna fawng chelhtu INC candidate Pu Lalsawta a ni a, Ṭangrual Pawl (ZPM) candidate Pu B. Lalchhanzova a ni bawk a, MNF candidate Pu Robert Romawia Royte niin BJP candidate Pi T. Malsawmi a ni. MPF lamte chuan candidate te hi an programme hrilh lawkin inbuatsaihna hun an pe a, a bika an party manifesto ṭheuh aṭanga zawhna an siam pawh an hrilh lawk bawk a, common questions pali ṭheuh an siam pawh an pe lawk bawk a ni.

Chung Common Question te chu hengte hi a ni:

1. Kan rama ṭhalai hna nei lo lo pung chho zelah hian ṭhalai nawlpuite din chhuahpui theih tur belhchian dawl eizawnna nghet hmachhawp tur enge in neih?

2. Kut hnathawktute hamṭhatna leh chawikanna turah a tak ram thleng thei ngei tur, ban phak maiah project chenfakawm tur eng nge in party-in thehchhuah tur in neih?

3. District Council thar siam/pek zel chungchangah party-in eng rilru chiah nge in put?

4. CADC chungchanga in Party ngaihdan dik tak min hrilh thei em?

First Phase leh Second Phase-ah ṭhenin a hmasa zawk­ah hian candidate-te tan minute 20 chhung thusawina hun siam a ni a, second phase-ah hian zawhna leh chhanna hun hman a ni. First phase-ah hian thusawi hmasak dan tur pawh a ni a, za­len takin an duh zawng an sawi.

Thusawi hmasa ber BJP candidate T. Malsawmi chuan, East II Constituency a candidate a nih chhan te leh East- II bial chhung a awm a nihnate leh bial chhung tana a ngaih pawimawh chi hrang hrang a sawi. Chumi hnuah MNF candidate Robert Romawia rawn ding lehin politics hi a tuina a nihzia sawiin BA, MA leh Ph.D ah pawh Political Science subject a lâk thu a sawi a. Tun hnai lawka MNF Party-a a inpek thu sawiin politics a luhchilh tak dan a sawi. Sorkar kan hrawn mek Congress party dik lohna leh kawng hrang hranga an tlin lohnate a sawi bawk. B. Lalchhanzova chu rawn ding velehin Social Worker aṭanga politics lama a kal chhoh dan a sawi a, tun hun hi ṭhangtharte khawvel a nihzia sawiin East II bial chhunga a din chhante a sawi a, mi in hnuai luah aṭangin MLA nih a tum a, a khingpuite lah chu Minister ni laite leh Zoram mi hausa ber ber zinga hming lang thamte an nih thu sawiin Pathian leh East-II mipuite zara a tlin theih ngei a beisei thu a sawi.

Second Phase-ah zawhna leh chhanna hun hman a ni leh a, common question pali hmangin minute 36 chhung ṭheuhh hun an hmang a, chumi hnuah private question pakhat ṭheuh minute thum chhung bawk zawh an ni leh a, chumi hnuah tlipna thu minute thum ṭheuh an sawi leh bawk a ni.

Ka thlirna

He hun pawimawh tak hi neih a ni dawn tih ka hriat tirh aṭangin tel ngei ka tum a, a hmun ka thleng a, mi an lo ṭhahnem hle mai a, bial pawn aṭanga rawn tel an awm nual bawk a, heti tak hian a ni maw politics hi kan lo ngaihven ni ka tih phah hial a, lawmawm ka ti hle mai. A bik takin East-II Constituency phei chu Aizawl hmun laili lai ber a ni bawk a, enge maw ti zawng takin a pawimawh em em a ni.

Pi T. Malsawmi, BJP candi­date kha a rawn ding hmasa ber a, hall chhung boruak a zo lo em aw? tih turin a zam nghal deuh mai niin a hriat. Tunlaia Zoram mipuiin BJP kan hmuh dan a hriat ve tho avangin BJP rawn fak mawi chiam kha atan a rem lohna a awm vangte pawh a nih a rinawm. Point lak tur teh chiam a sawi lo.

A pahnihna atan MNF candi­date Robert Romawia a rawn ding chhuak leh a, a zawna ṭhu a supporter-te chuan kut pawh an beng ring kher mai a, thawm a

ṭha nghal. Sorkarna fawng chelhtu Congress Party chu point hrang hrangin a rawn sawisel nghal a, mipuite pawh an nui dur dur a ni. Public debate emaw a ti ni berin a hriat a, ṭawngkam bungrua pawh a hnehsawh ang reng viau. Political Science la a in ti a, politics chungchang chu hre viau turah ngaih ni si kha kha ti taka a ṭawng chiam kha ngaithlatute beng a thlep deuhin a lang.

Congress sorkarin zu an zawrh chungchang a sawi a, zu zawrha hlawkna teltu ber chu Lal chhungkua an nihnate sawiin corruption chungchang a sawi bawk a, Congress Party chu kawng hrang hrangin a sawisel. Sport chungchang pawh a sawi tui viau a, MNF Party-in sorkarna a siam hlauh a niha MLA a thlan tlin a nih chuan Sport Minister-ah dah ngei sela, a sawi anga a hnathawh hmuh a chakawm hle.

Pathumnaah ZPM candidate B. Lalchhanzova a rawn ding leh. Ani hi kum hmasa lawka Zotlang aṭanga Dawrpui-a rawn awm chho a ni a, a hming leh hmel hi East-II candidate pali zingah chuan langsar lo ber a ni hial awm e. Nimahsela, belhchian a dawl fu mai a, Social Worker a nihnate pawh a ni ang a, politics lamah tawnhriat ngah lo mah se la social worker a nihna aṭang pawhin hnathawh tur tamzia a hria a, East-II chhung mamawh hrang hrang a hre chiang hle a ni.

East II chhunga chhungkaw tinte ka tlawh chhuak vek tawh a ti a, tunah a vawi hnihna atan ka tlawh chhuak leh ṭep tawh a ti nghe nghe. A mawng a zan hmel hle mai a, kum 43 mi a ni a, Dawrpui Jail venga mi in hnuai luaha khawsa mah ni se la huaisen taka MLA ni tura a beih dan chanchin a sawi chuan ngaithlatu beng a verh hle. A khingpui tur zinga pakhat Pu Lalsawta a fak a, midang sawisel loin ZPM Policy sawiin fiah takin a sawi a. MLA ni tur hian sum leh pai neih kher a lo ngaih lohzia a sawi a, tunah pawh in tinah, an tapchhak zawlah mi ka kawm a, thinlung hneh a awl zawk a ti a, East II tana a vision chi hrang hrang a sawi chuan kut beng thawm a ring kher mai.

A hnuhnung berah Finance Minister Pu Lalsawta a rawn ding leh a. MNF candidate-in a sawiselna kha a la na viau niin a hriat a, “Ka hmaah khan corruption chungchangte sawi an awm a, a sawi tur âwm hi chu kan awm maw le, Pu B. Lalchhanzova te hi chuan sawi sela an inhmeh ang a, kei pawhin sawi ila ka inhmeh ang. Kum 1995-a Second class contractor, khatih laia a contractor puite’n tuna bill tang buaipuia an phet an phet laia a hausak dan pawh hriat theih lohte hi chuan sawi lo se la a ṭha. Kan MPF hruaitute hian hun pek belh sela, insawifiahna hun tlem pek belh teh se,” a ti chu mipui lam aṭangin kutbeng thawm a ring ṭha hle mai.

‘Zaninah hian thi thut dawn ta ang ila,’ tiin zanina a thusawi a dah pawimawhzia a sawi a, thu tluangtlam pangngai takin a sawi a, nuih dur durna tur leh kut ben hluah hluahna tur lam a sawi lo a, thutak deuh a sawi a, veteran a ni tih a hriat. Kawng hrang hranga sorkarna an chan chhunga an hnathawhte sawiin East-II chhunga an hmalaknate a sawi bawk a, Armed Veng check dam chungchang pawh sawi riin tuna an thawh mek thu a sawi a, thawh chhunzawm zel an tum thu a sawi bawk a, confi takin ‘Congress party hian sorkarna kan chang leh dawn,’ a ti. Zu zawrh chungchangah eraawh chuan khatih laia Excise Minister chu, “Ani khan inrawn khawmna pawh kan neih hmain ‘Kohhran kan rawn lo ang,’ a lo ti hmanhmawh alawm,” tiin a khak zauh thung a, Congress Minister dangte chu filhim ta an ang viau a ni.

Common Question an chhan danah chuan an inang tlang viau hlawm a, hei hi chu a hmalama inbuatsaihna hun pek an lo nih tawh bawk avangin a ṭha thei ang berin an sawi hlawm ni berin a hriat a, danglam teh vak a awm lo. CADC chungchanga zawhnaah erawh BJP lam chuan ngaihtuahna la nei lo angin an chhang thung a, midangte chhanna chu a inang tlangpui.

- Mahmuaka Chhakchhuak