Eng vanga IAS pachal hek ngam nge a nih?

Mak deuh maiin a ram mi leh sa ngei IAS, pawn lam mi IAS-in a hek ngam mai hi thilmak tih loh rual a ni lo. Chutih rual vek erawh chuan kan hma lam hun hlimthla chiang taka lo lang ta hi kan bihchian a ngaih phah ta a ni.

Mizorama lal ber chu CM ni mah se, hotu lû ber erawh Governor a ni tih kan hria. Inthlan hun puan a nih hnu chiah aṭang phei chuan Governor hian check & balance kalpui kher a mamawh lua lem lo. Tichuan, he IAS inhekna kaihhnawih niawm i ngaihtuah tlang teh ang.

A hmasa berah chuan Central BJP mamawh chu vote niin chu vote hlu tak chu Mizo zingah beisei tam ngam rual a ni si lo. Chuvang tak chuan Mizorama chibing pathum, Hmar, Chakma leh Tuikukte lam hawi chu tihmakmawh a ni ta a. Chakma zingah chuan an hlawhtling nghal der tawh tih kan hre ta phawt a nih hi!

Mamit leh a chheh­vela Tuikuk vote nei, tlanchhe mekte hi a tam thei ang ber vote thlaktir tum leh chu tihmakmawh a ni leh lo thei lo ta a. Chumi tihhlawhtlinna tura kawng an zawn mek chu Mizo IAS hian a lo dodal ta hmak mai a ni. Chu ve leh remchanna remchang fahran mai chu BJP Governor hian a bawh ta chat ni tur a ni.

Tichuan, Council of Minister thuneihna awpbeh a nih lai takin sawrkar hnathawk lû ber chuan a thuneihna chu huai takin a hmang ngam ta! Model Code of Conduct hman a nih hma ni se, hetiang hian CS hian a thuneihna a hmang hauh lovang tih hi a rinawm em em a ni.

Tin, hei mai hi lo­vin RSS lamin Zo­ram pawnah ṭan lain Hmar leh Tuikuk tân Autonomous an tiam mek ta bawk a nih hi. BJP lo finzia hi a mak a ni! Hnamah kan inlungrual lovin Kristian ram ni mah ila, Pathian aia sum pathiantu kan tamzia leh mahni hma kan sialzia hi an hai mawlh lo a nih hi!

Chuvangin, he thil hi en liam satliah mai mai chi niin a lang ta tlat lo. Hemi kaihhnawiha thil pawi em em mai chu Party lian pahnih vote duh luat vanga ram leh hnam himna ngaihtuah phal lo khawpa mahni in hmangaih Congress leh MNF kan nei tlat hi a ni.

Mizorama BJP tundin tumna chu nâ takin kalpui a nih tak takzia kan hmu ta a nih hi. Kan hma lam hunah hian a theih dan kawng a kuak phawt chuan BJP hian an lal theihna tur a nih dawn chuan tih hreh pakhatmah an neih lohzia a lang chiang ta a nih hi.

Tichuan, a hranpa taka RSS mi hlun Governor-a an rawn dah chhan kha a takin tunah chuan kan hmu ta. Chuta lo lang chiang ta chu Mizoram bei tur hian ruahmanna namailo tak an kalpui mup mup tih hi a ni. Hmanraw remchang an hmuh apiang hman an hreh lohzia pawh a takin kan hmu ta a nih hi.

Tun inthlan hi in­thlan dang ang lo tak­in Mizo anga ṭan­rual hun, ram leh hnam vil hun, mahni aia ram leh hnam dah hmasak hun a nihzia kan hre lovang tih a va hlauhawm tak êm! Heti taka ringlo mi kan tihte'n min zuam ta mai hi ringtu intite tân chuan inenfiah a, kan dinhmun tihchian a hun ta a lo nih hi.

- Lalremliana Pachuau