Contract hralh chhawn nghawng a nâ
Kan Chief Minister berin Kamrul-a contract hmuh tamzia an zawh khan hming hawha contract an thawh ṭhin thu kha a sawi chhuak mai a. Kan CM hian thu dik awm sa a sawi chungin dan bawhchhiaa contract hming hawha inpek chhawn a rawn sawi mam kha a ni ber mai a, kha mi nghawng kha kan tuar mek a ni. Kha mi nghawng lian tak pakhat chu nuai 100 eirua puha kan Speaker hming a lo lang ta chiah ang chi hi a ni.
Cheng nuai 100 hi kan fanghma no ei mai mai a nih chuan kan ram hi ṭha chi a ni lo. Tuna mi hi chu voice record leak tih a ni. Speaker hian nuai 100 hi a ei ka ti ve lova, mi voice record leak aṭanga thutlukna lo siam thawt thawt pawh ka tum lo; mahsela hetah hian contract hralh chhawn chu a awm ngei a, chumi tuartu chu Ngaizawl khua hi an ni ta chiah a ni.
He khaw mi hi ni ila chu a tawp thleng turin court hial ka kal duh ang. Mahni pian leh murna khua pi leh pute lu phumna khua pawh turin kawngpui siamna pawisa central aṭangin a lo kal a, chutiang pawisa chu tute emaw hian an lo insem kual daih a, a bang aṭanga kawng an siam a nih ngai chuan lungawi chi a ni hauh lo a ni.
Kamrul-a bawk hi han sawi leh ta ila. Kamrul-a hmingin contract an thawk niawm taka ngaih theih khan an sawi zauh zauh mai a, Kamrul-a hming lo pawh hawh tur a awm dawn tho laia engtia he pa hming kher kher lo 'hawh' nge an nih tih te pawh hi chhui vat a ngai.
Kamrul-a chu an duhsak bik lova, an duhsak lo bik hek lo a. Chuti a nih chuan Zoramchhana pawh an duhsak bik lova, an duhsak lo bik hek lova, contract an hmu tam deuh bik mai mai a ni.
MNF hun rei tak lo ni ve ngar ngar, sorkar huna contract hmua mahni insiam ve tum tun thlenga beisei ang contract la mu ve lote pawh hi an duhsak lo bik lo a ni ngei ngei ang.
Contractor ni si lo contract hna thawk tlat, a hmutu tur hre saa tender chhuah an tih an tih ang, patling eizawnna dang nei lova politics hmanga eizawng kan tam chhan chu contract hralh chhawn hi a ni. Hei hi kan ram ṭhanmawh bawk lian ber, kan hmelma a ni.
- Vanlalsawma