MPF leh political party thawhhona thuthlung ṭobul

MPF leh Political Party-te thawhhona thuthlung bawhchhiat chungchang ni tin chanchinbuah a lo lang ṭhin a. MPF Constituency Forum-ten an huam chhunga thuthlung bawhchhiatna chu puangzarin, ni tin chan­chinbu ṭhenkhatin lo la chhawngin, mipui tam zawk chhiar theiha puanzar a lo ni tawh bawk a.

MPF General Headquar­ters hotute pawh thawk chhuakin thawhhona thu­thlung bawhchhiaa puh, Party Headquarters-ah leng kualin hetianga thuthlung bawhchhiatna hi a awm tawh loh nan ṭan lo la tur leh an mite pawh thawhhona thuthlung zaha zawm tlang vek tura lo inhriattir turin an ngen thute ni tin chanchinbuah chhuah a ni bawk a. Political Party lam pawhin MPF hotute chu ṭha taka lo dawngsawngin anmahni lam pawh lo inhrilhfiaha hma lak dan turte an lo ngaihtuah tur thu an lo hrilh bawk a.

Thawhhona thuthlung hi a awmzia kan hre fuh tawk lo deuh niin ka hria. MPF lamten Political Party hrang hrangte an lo check-na tur leh an control-na tur thuthlungah kan ruat deuh tlat a. Party mite chet chhuahna kawng hrang hrangah hian ‘MPF-in an phal lo’ tih hi kan sawi chhuah dan a ni deuh ber mai a. Thawhhona thuthlung hi MPF leh Poli­tical Party hrang hrang inthurualten Mizoramah inthlanna thianghlim leh felfai tak a awm theih nan an

ṭanhona tura inlungrual taka an siam, President ṭheuhten hming an ziah hnan thlap, an pawm tlan a ni a. Thuthlung bawhchhia an lo awm a nih pawhin a bawhchhe ve lo party zawngte leh MPF ten lungrual taka an do tlan tur leh puanzar a ṭul pawh a hma an lakhona tur a ni.

Ni 21 June 2006-a MPF a lo din khan an hmalakna hmasa ber chu Political Party hrang hrang hruaitute nena inkawmna buatsaih a ni a. MPF General Headquarters hotute chuan Party te nena hmalakho dan tur ngaihtuah turin Political Party President ṭheuhte sawmin, Synod Office Committee Room-ah meeting an nei a. MPF hruaitute chuan kan inthlan hi a bawlhhlawh tak em avangin kan ramah inthlan thianghlim leh felfai a lo awm theih nana hma la turin MPF kan lo ding ta a, engtin nge hma la ila min duh tiin an rawn a. Party hruaitute kal khawm chuan MPF lo ding ta chu lawmawm an tih thu leh huai taka kal tura an beisei thu te an sawi a. Hetiang hian thurawn chi hrang hrangte an sawi ta a ni:

1. Kum 2003 inthlanah khan inrikrapna leh hel inlarna te, etc. a awm a, hetiang zel a nih chuan kum 2008 inthlanah chuan thisen a chhuak ang tih a hlauhawm.

2. Kan tlinna tur a nih ringin sum tam tak kan seng a, mipuiin an dawng duh zel bawk si a, kan tih loh chuan kan tlak phah anga a tite an tling si ang tih kan hlau.

3. Sum tam tak kan sen thinna house to house cam­paign hi khap tur a ni.

4. Ruai kan ṭheh hum hum a, Block conference leh candidate te an kalna khua apiangah ran an lo talh a; a senso chu candidate rulh tur a ni zel si a; chuvangin, ruai ṭheh hi khap tur a ni.

5. Buh leh thing inphurh­sak te, tui inchawisak thlengin kan ti a. Motor lian nei lo pawhin mi ta hire a ngai ṭhin a, a hautak em avangin khap tur a ni.

6. Sum sen hi a tam tawh em avangin kum 2008 inthlan hunah phei chuan nuai 100 tal nei tan lo chuan candi-

date nih ngam a ni tawh lo ang.

Hetiang thurawn chi hrang hrangte hi umzuiin MPF chuan thawhhona thuthlung an duang chhuak ta a. Political party aiawhte nen enhoin siam ṭhat ngaite an siam ṭhat hnuah Party Headquarters

ṭheuhah an lo zir chian turin an pe chhuak leh a. Party Headquarters tinten an pawm hnuah MPF President leh General Secretary te leh Party tin President ṭheuhten hming an sign hnan tura pek chhuah a ni a. Mawhphurtuten hming an signed vek hnuah thawhhona thuthlung hi hman theih tura puan zar a ni ta a.

MLA inthlan dawn kum apiangin he thawhhona thuthlung hi ennawna siam thar zel a lo ni ta a ni. Party-te hi thuthlung neitu an ni a, a bawchhetu ni loa bawhchhetu tur vengtu turte an ni.

- Upa Lalramthanga