Tunge ka Vote dawn? Ka Buai!
En teh, a thlâwna sem ruala a thlâwna sem leh tumtute aia a lêta tam mah sem intiamtute; laptop sem hial inphaltu rawn inlârna pâwl te... mai pawh ni loa hmân aṭang tawha mâu leh sawhthing la sawi bâng thei lotu te; zu zawrh tihtâwp tum ho rawn inlârna chu, a lehkhapuan (manifesto) nen lama an rawn chhuah meuh hian, kei, Vâl Lungmâwla dàwn hi a tâwi leh tut zêl a - a tûa te tak tan nge maw ni he ka vote 'hlu tak', a hralha ka hralh phal lék loh tur hi ka hlan ang tâk ang maw aw - tiin ka buai mêk a ni.
He ka buaina namai lo tak; a 'zawrha zawrh phal'-te tana thil 'namai' tak ni lawi si hi ka ui thlâwt a; ni e, kan India ram President emaw Prime Minister nen meuh emaw pawha chan inang kan neih chhun a ni miau a; han ui loh chi ziazáng ni hian ka hre lo! Hetiang thutiam hmang mai maia min bàwl tumte tana ka vote hlu tak mai hlàn tur meuh chuan ... (a! ka lo chapo deuh vang pawh a ni ang e!) ka inphal hlawl lo!
Chéng ... a nuaia nuai chuang chu sem ta se la ... Instalment lehnghalin! Central budget pûk chawp lehnghalin! A dawngtu nih ka zak e a! SEDP te pawh chu le ... ka zahna a tih nasat zual dan tur chu maw . . . 'a zau deuh deuh ang!' Laptop emaw taplet emaw pawh chu ... game khelh nan bâk ka hmang lovang a. Chu laptop, a thlâwna ka dawn avang ngawt chuan thiamna puak chhuah tur ka nei chuang lo ang a; a thlâwna min petu ten hnâ min pe dawn azeng a ni si lo ang a; fin phah nan aiin lêrh phah nan ka hmang palh hlauh thei a; chû ka thil dawn - a thlâwn lehnghala ka dawn chuan 'khî-ah' min thlen ngawt dawn dèr si lo! Mi pangngai, sum leh a hmanrua-in a tihtheih anga an chhâl avanga buai ve ngam loa 'mi huaisen' nia ka inchhâl ve ṭhin amg khan ka rem ve tawh lo ang a; chutiang dawngtu nih chu ka zak dawn tlat si a, ka dawng lo leh mai ngam dawn si. Ka dawn loh chuan ka vote lo leh mai dawn bawk si a - ka buai ru riau!
Mâu leh sawhthing ... thlai thar ... policy thar enga pawh hi ... a sum pawh - a dawngtu azir a ni! Vawk vulh grade, NLUP dawng - zu zuar ta te; a thlâwna an sum hmuh, ruih nilèn nana hmangte khawvêla chêng ka ni miau a - a tû hi nge maw ka vote tâk ang le? tiin Vál hi ka inbûk buai mêk a nih hi!
Mahni intodelh tura hmá là a, entrepreneurship lam min tuipui a hneha; a thlâwna sem policy hmanga intodelh min tuipuitu te policy-ah hian kei, ka leng ve ta lo! A thlâwna sum leh eng ilo sem tum te, sawhthing leh mau hmanga min intodelh tuma min bàwl tum mêktu, kan politician te hian, kan vawiin Ṭhalaite Khawvêl hi an va'n man lo teh kher em ve aw! Kum khati zat ram rawngbawltute khan rawng chu khawiah nge maw an lo bâwl teh meuh le?
E le - an in leh lo ramah! Chu chu a chhànna kan hmuh chu a ni si! An mi bàwl âta awm zel tur hian i la inphal meuh em? I thu a ni a - chu i thu nemngheh nan chuan i vote hlu tak, a leia lei zawh loh khawpa hlu kha i hmang dawn!
Kei chu, he ka vote hlu tak hi, Information Technology ṭhang mêka Bill Gates-a leh Steve Bezos-a te inûm zek zekna khawvêlah hian, laptop hmang emaw, tablet emaw, cheng nuai sawm-sarih leh pasarih leh ... tih vêl mai mai ai chuan, he ka ram, ka hmangaih, ka pianna; kawng chhiat em em ber lai pawha 'Aw, Zoram nuam,' ka lo tih ve ṭhin min siamṭhat saktu tur atan hian ka vote hlu tak mai hi thlâk ka nûam zâwk e!
- Zirsangkima