RBI leh BJP Sorkar (Inchapcharna ngaihnawm chu...)

Mihringin mahni chauhin kan thil mamawh zawng zawngte kan neiin kan siam vek thei lo a. Lo neitu chuan a hmanrua tur tuthlawh te, chemkawm te, favahte a mamawh. Chutiang bawk chuan, pûma thirdreng pawhin a denna tur meihawl te, chemkawm chherna tur thirte a mamawh. Tichuan, thil inleisak tawn tur chuan, mamawh leh mamawh dan intluk a ngai ṭhin a, hmanlai kan Mizo pi leh pute pawhin an tih ṭhin ang khan (a hnu leh deuha pawisa kan tih ang deuh hi chu hmang tho mah se), pawisa emaw ngai kher loin mamawh leh mamawh chu an inthleng ta ṭhin a, hei hi 'barter system of exchange' tiin economics ṭawngkamah chuan dah. Mahse, he'ng hmanga mamawh inphuhruk tawn hi chu a buaithlakin a harsa takzet a ni.

Hriat theih chinah, kum BCE 1000 vel daih tawh khan, he'ng kan thil mamawhte awlsam zawka kan neih zung zung theih nan pawisa kan tih mai hi Chinese-ho khian an lo hmu chhuak tawh a. He ta pawisa anga inthleng nana an hman hi thir aṭanga siam a ni a, hun a kal zel a, BCE 740 bawr velah phei chuan, Tang Dynasty rorelna hnuaiah tuna kan pawisa hman tlanglawn ber, lehkhaa siam (paper currency) hi an lo hmuchhuak tawh a ni.

Pawisa kan han tih hian, amah hian hlutna pakhat mah a nei hran lo. Kan thil inthlengtawn nana kan pawm tlan (medium of exchange) a nih vang chauha hlutna nei a ni. Tichuan, ram tinte hian an ei leh bar, sumdawnna leh iloa an ngelngheh dan azirin pawisa kan tih mai hi a siam ta ṭhin a. Chu'ng pawisa chungchanga thuneitu lian ber chu Central Bank (CB) a ni. Khawvel history-ah Central Bank hmasa ber chu Sweedish central bank, Sveriges Riksbank (Nobel prize for economic science petu) a ni a. Kum CE 1668 daih tawh khan an lo din tawh a ni. Tichuan, ram tinin a sum leh pai dinhmunte vawng a, enkawl tur chuan CB a nei ta ṭheuh a. India ramah ngei pawh, Kumpinu'n min awp lai, kum 1935 April ni 1 khan Reserve Bank of India (RBI) hi din a lo ni ta a ni.

Tun lai khawvel economy kal dan, kan ram a ṭhanna te, thil man a san chhan te leh a dang dangte hi sawifiah tur chuan, nguntang chen dawna chhah ziah a ngaih dawn avangin kan sawi vek seng lo ang. Mahse thil chiang tak awm erawh chu, CB hian ram sum dinhmun leh ṭhan dan azirin sum che vel hi a thunun a, ram economy hi nghet thei ang bera a awm theih nan theihtawpin hma a la ṭhin a ni. Ram chhunga Bank leiba ngah deuh leh thawk ṭha lote chu a zilhhau ve ṭhin.

Kan rama foreign investment tam tak rawn lut tur a awm theih nan, investors te rilruah Indian economy an rintawk theih nan, kan sum che vel leh sumdawnna thilte hi nghet thei ang bera dah a tum ṭhin.

Kan hriat ṭheuh angin November ni 8, 2016-ah khan BJP sorkar chuan India mipuite min barakhaihin 'sugical strike’ a nei a. India rama pawisa note Rs 1000 leh Rs 500, a hun laia pawisa leng vel zaa 87 chu puan lawk leh sawi lawk awm miah loin a ti thi ringawt a. Kan buai phah hle a nih kha. Tin, ram tam takin kum 10 chuang fe an zirchian hnuah leh, uluk taka a hman dan turte an duan fel hnua leh an hman hnu pawha uluk taka an vil, Goods and Services Tax (GST) chu BJP sorkar hian July ni 1, 2017 aṭang khan India ram pumpuia hman turin, kan constitution122nd Amendment bill, 2014 hmangin, a ti a nih kha. Demonetisation kha a hlawhchham chiang hle a, rethei leh ni tina ei chawp dapte tana harsatna a siam nasatzia chu kan sawi chiam tawh kha. Tin, GST pawh hi a thuphung chuan NLUP ang maia ṭha leh pawmnahawm ni mah se, hmalak leh chhutzuina (implementation) lamah a hlawhchham hrih avangin, harsatna chauh min la siam a tih theih.

Hetiang boruak leng vel vang hian, India rama foreign investor-te chu an awm hle hle thei tawh lo a, an inla chhuak chur chur ta mai. Kan economy ṭhanna pawhin san lam aiin hniam lam a pan zel a. Nakkum maiah Lok Sabha inthlan pui kan neih dawn avangin, hei hi BJP tan chuan luhaina belhchhahtu a ni. An flagship program ṭhenkhat (Start up India, Make in India adt.) chu Public Sector Banks (PSBs) loan hmanga kaltir mek a nih avangin leh, hetih mek laia he’ng PSUs te hian Non Performing Assets (NPA) an ngah em avangin, loan pe thei lo turin RBI hian 'prompt corrective action' (PCA) an tih hmangin a thunun mek a. Hei hi central lama sorkar BJP leh a sangawi zawnpuite chuan an duh lo takzet a ni. Chu mai bakah, RBI hian kan financial market a ngheh theih nan hian sector tam tak lakah khawng takin 'monetary policy' a kalpui mek a. A tuartu lian zual chu power sector hi a ni. Hetah hian sumdawng lian tak tak, politician-te ṭhian ṭha an kat nuk a, an lungawi loin Allahabad High Court-ah an zualko ta a ni.

Tichuan, India rama la thleng ngai reng reng lo, RBI Act of 1935, Section 7 hmang turin court hian central sorkar lam chu thurawn a pe ta a. Section 7 hian RBI hi Autonomous Body ni mah se (ECI, AG, Supreme Court adt. te angin) “issue of Public interest” ah chuan RBI hi a duh dan anga thurawn pe-in a kaltir thei ang tih a ni. He dan hi kawng tam taka sawifiah leh hmansual theih tak a nih avangin, vawi khat mah hman chhin a la ni lo. He dan sawifiah a harsat dan tur chu, Michael Lalmanzuala leh Robert Romawia inchapcharna aṭang khan kan hrethiam tlang mai awm e. Public interest chungchang bik chu kalsan i la, zawhna lo lang ta chu, engati nge he thil hi hman tum a nih? Tih a ni ang.

Sawi tak angin demonetisation leh GST vangin India ram economy namen loin a tlahniam a. Chu mai bakah inthlanpui a lo hnai nen, Modi hian RBI reserve 9.59 lakh crore aṭanga 3.6 lakh crore vel chu a ît ta tlat mai. Hemi hmang hian loan tam tak MSME (Micro, Small scale and medium enterprises) sector lamah PSUs through hian sem chhuah a duh a. Chu mai bakah he’ng PSUs te NPA hi ngaihdamsak a duh bawk a ni. Hei hi a thuphung chuan ṭhat hmelin lang mah se, The Caravan-in Indian economist lar tak Mohan Guruswamy a kawmnaah chuan, “Chhungkaw ro hralh a, halpuah hal tura Diwali-a kal ang vel a ni,” tiin na takin, tehkhinna hmangin thiam takin a duh lohzia leh kan economy atana a ṭhat lohzia a sawi ve thung a ni.

RBI kalhmang leh hmachhawp reltu, RBI Board of Directors 21 zinga pahnih hi BJP sorkar hian a thunun theih tur, Swadeshi Jahram Maneh (SJM) RSS economic wing hruaitu S Gurumurthy leh Sathish Marathe te chu kumin August thla khan a ruat a - anni hi finance lam hre miah lo an tih theih a, hei hian mak tih a hlawh hle a ni. (Dan naranin sorkar dangah pawh sorkar hian board member a ruat ṭhin a, mahse rilru fîm tak pu-in, finance lam thiam leh, an mi leh sa ni lote ruat an ni tlangpui.) BJP chet dan inluling tak hi hetiang hian RBI Governor chhuak ta, BJP sorkarin a umchhuah titih Raguram Rajan (University of Chicago professor) pawhin na takin a sawisel a. RBI inrelbawl dana sorkar inrawlh fo ṭha a tih loh thu heti hian a sawi, “RBI hi car-a seat belt ang a ni. Driver chu sorkar hi a ni a, accident thleng palh thei hmu lawkin sorkar chu seat belt hreng turin thurawn a pe thei a, chetsualna a thlen pawha tihnep theih a nih nan,” tiin. Tuna BJP sorkarin RBI reserve lak chhuah a tum pawh hian kan economy-ah inflation (thil man sang) leh investors te-ah uncertainty (rilru chi-âi-na) bak a thlen dawn lo niin a sawi.

Hetiang boruak leng vel karah hian kan RBI Governor Urjit Patel leh deputy governor pali te chuan sorkar duh dan hi a tawp thlenga dodal an tum a. Tun November ni 19 hian RBI Board meeting hi neih a ni dawn a. Sorkar duh dan an pawm loh chuan Governor hian ban leh um chhuah hial a tâwk thei a ni. Thuthar lakhawmtute hnena a sawi dan chuan Pu Patel hian sorkar duh dan chu a tawp thlenga dodal a tum thu a sawi bawk.

He’ng boruak leng vel hi eng vangin nge kan ngaihsak ang kan tih chuan, RBI reserves hi vawi te khat mah chhuhsak a la ni ngai lo a. India ram Kumpinu-in min awp a, indopui II-na laia sum a harsat lai pawh khan khawih chet a ni ngai lo. Kum 1962-ah China nen kan Indo ṭum khan, lak chhuah tum a ni a, rin aia boruak a daih leh hma tak avangin ṭhulh leh a ni. India ram economy chhiat lai ber, kum 1991-ah pawh khan RBI reserves hi khawih chet a ni lo. Hei mai piah lamah hian, a reserve neih bak chu RBI hlepte hi sorkar-ah chhun luh zel a ni a, nikum pawh khan crore 5000 vel lai chu a bo a bang awm loin chhunluh a ni. Loh theih lohna avangin CB reserve hi ram ṭhenkhatah lakchhuah a lo ni tawh a, Argentina leh Guatemala te khuan tun hnaiah an la chhuak a, mahse economy-ah a ṭha zawngin nghawng a nei tehchiam lo.

BJP sorkar hian autonomous body kan tihte hi an thuneihna a laksak mek zel a. Chu mai bakah a thunun theih tur mihring he’ng hmunah te hian thuneitu lianah a dah deuh zel bawk. Public Universities (Central Universities) te pawh an academic zalenna laksakin, dan maksak pui pui UGC through-in a tuksak a, mi retheite leirem rah theih vena awmchhun, zirna chu privatise a tum mek bawk a, rapthlak tak a ni! Zirna run sangah pawh Surgical Strike day tih vel mai mai serh tura thupek kan ni. BJP leh a sangzawi zawnpuite hian Hindu sakhua leh ram, Hindutva din an tum a. Fascist sorkar din a tum mek niin a lang.

Tun lai khawvela ram leh hnam ropui tehna ber pakhat chu economy-a a ngelngheh leh ngheh lohah a ni. Kan ram economy hmabak chu November ni 19 hian bûk a ni dawn. Sorkar duh dan hi put tlang luih ni ta se, hausa­te’n an tuar dawn lo; rethei leh kuthnathawktute, ni tina eichawp daptuten kan tuar dawn. Hetianga chhiah chawitute sum tling khawm (taxpayers' money), a duhsak zawng leh sumdawng liante ba ngaidamna tur mai maia khawral tum sorkar hi sorkar ṭha tih chi a ni dawn em ni?

Congress political pawn nia ngaih theih deuh reuh, Pu Chuaungo-a kan thlawpna kan lantir luih luih lai hian, keini central drip khai state hian, kan ram economy chhe lutuk leh ngaihtuahawm lutuk tur ngai ngam loa, India rama thiltithei ber dan tum a, luhlul lo chhuah ngam ngattu hi kan thlawp ve ngam dawn lo em ni? Kei leh ka chhungte leh ka ṭhiante zawng chuan Vai pachal Patel-a hi a ni kan thlawp dawn.

- Seiji Research Scholar, Department of Economics, MZU