Eng vangin nge BJP an ‘confi’ chhan?

BJP hotupa Amit Shah chuan Mizo Kristian-te sa huatah tak rawn khawihin, “Krismas chu BJP rorelna hnuaiah lawm a ni ang,” tiin inthlan zawhah BJP chu roreltu zingah an tel tur thu a sawi. BJP chak tur sawi duhtawk lova Krismas kher rawn sawitupa hian BJP an sorkar thei lo tih a hre chiang hle a, Krismas-ah hian BJP thuhnuaiah MNF awmin MNF nen ṭang kawpa ro an rel tur thu a sawina a ni tih a chiang hle a ni.

Mizorama inthlan hnu­hnung berah khan Congress khan seat 34 an chang a, MNF-in seat 5 an chang a, MPC (MNF nen ṭang kawp) khan seat pakhat an chang bawk a, tuna thawm nei na tak BJP leh ZPM hian MLA an nei lo angin a sawi theih ang chu (MPC kha khatihlai khan MNF nen an inkawp avangin). Kum 2018-ah kan inthlang dawn a, seat 21 hi BJP hian eng ti kawng mahin an la dawn lo tih a hriat tawh a, ZPM pawh hi an boruak invawrh kang sang viau chung hian seat 21 chu an tlin lovang tih a sawi theih. BJP hotupa hian Mizoramah BJP-in ro an rel tur thu a sawi ngam chhan chu MNF a sawi kep a ni tih hi mi a nileng lo tan chuan hai rual a ni ta lo a ni.

‘Pathian leh kan ram tan’ titute hian sorkarna an chang dawn a nih chuan, “India ram hi Hindu ramah din kan tum” titute an thawh pui hreh lo hi a rilru nat thlak. Congress hi Vai pawl an ni a, an ṭobul pawh en ila Vai duh dana kal an ni tih hi kan hria a, kan sawi ṭhin dan pawh ‘Vai Pawl’ tih kha a ni lo’m ni kha? MNF chu Mizo pawl a ni a, “Pathian” leh “kan ram” an tih pawh hi kan “Van Pathian” leh “Mizoram” an sawina a nih hmel a, chutih laiin MNF President zahawm tak chuan Chakma Nation te min tiam a, BJP hnuaiah awmin NEDA-ah BJP hnung zuiin an inziak lut a, BJP pawhin lam ṭang pawl lian ve tak an neih chu chhuangin, “Christmas in Mizoram will be under BJP rule” an ti ta a, India hriatah an tlangau ta chuah chuah mai le.

Mizo mipui, party ṭan lam nei lote kha rawn harh chhuak ula, kan rin em em kan hnam party kan tih chu BJP uite ang an lo chang ta a, a ruka inthlun zawmna thuk tak an neih chu Amit Shah hian a rawn au chhuah pui ta pawp pawp a, December 25-ah hian BJP-in MLA 21 an nei dawn lo tih a hria a, mahse MNF MLA neih theih tur hi a chhut tel a, chumite nen chuan MLA 21 nei tlingin Mizoramah BJP rorelna (MNF MLA-te hmangin) an din dawn tih a puang ta piap chu a ni a, Mizo thinlung hi a na hle a ni.

BJP leh MNF inzawm rukna hi an inzawm loh thu an sawi uar poh leh a chiang ting mai si a, Mizo Kristian te hian vote thlak dawnah party ṭan bik nei lo pawhin BJP leh a thawhpui kan hnawl ngam a hun a ni. Tun hi duhthlanna hun a ni.

- MS Dawngliana