Ram leh hnam tan hnam party

Mizoram political history chhui tan chuan kum 2018 inthlanah hian tling thei pakhat chiah an awm a, chu chu ‘Pathian leh kan ram tan’ titu party MNF an ni. MNF hian kum 10 an sorkar chhung khan he ram tan hian thil ropui leh hmantlak tam tak an hnutchhiah a, chuvangin MNF hi kan ram din chhuahna thlentu chu an ni.

Congress leh ZPM te hi MNF chuan khak kher ṭul ti lovin an sawiselna karah pawh an ngawi kar reng a, an tum ber chu Mizorama sorkarna ṭha siam a ni a, party dang angin midang sawi chhiat hmanga vote zawn an tum ve lo.

Tunah hian MNF President hi a thlalakte chei danglamin a cartoon te siamin beih chi tin rengin an bei chung pawhin Pathian leh kan ram tan titu zia dik tak nen chhel takin a ding tlat a, he party bawk hi sorkarna chang turin a hruai thleng leh law law dawn a ni.

Chakma ADC nthlan dawn khan political party dang ang thovin MNF hian sorkar an duh a, an campaign-naah ‘Vibrant Chakma Nation’ tih an lo tar a, chu chu MNF President kha a bulah ding mahse ama sawi danin a hmu ve lo hrim hrim a ni. Engpawhnise MNF hian Chakma vulh len an tum tihna ni lovin CADC chhungah chuan sorkar ṭha tak siam sak an tum tihna a ni a, kha kha inbeih zuina tur a ni lovang, MNF hian ngawi rengin an dawh, sorkar tur che zia a ni.

MNF hian SEDP an zuar mek a, hei hi NLUP te ang mai mai ni lovin cheng nuai thum pek theihna tur policy a ni. He policy ropui tak, retheite kawk ran mai policy hi ram damna tur a ni. NLUP pawh an sem theih chuan MNF tan SEDP sem theih loh chhan tur a awm lo, hei hi Mizoram miretheite innghahna tur a ni.

MNF President-in mau a la tuipui tlat hian a rilru nghehzia a tichiang. Tuina thlak kual ve dem dum chi ni lovin a tui tawhna a la vuan chat reng hi a ngaihsanawm a, mau hi a la champion pui ang tih a rin theih a ni.

- Zarzoliana