Telhawng enga tan tak ni maw?

Assembly ṭhut­khawm neih mekah Agriculture Minister chuan Sangau khuaa chhungkaw 50 te chin tur kum 2019-2000 chhungin Telhawng chi lei nan sorkarin cheng nuai 30 a dah thu a sawi.

Telhawng hi thlai chikhat chu a ni ve tehmeuh mai, mahse mitin duh chi a nih loh bakah ei tak tak tur chuan sawngbawl a ngai nasa hle a, eitur sawngbawl ngai nasa ber a ni hial awm e. A tui ti tan erawh tui ve tak a ni lawi si.

Chutih laiin Mizo­­ram sorkar Agri­culture department chuan SEDP sum aṭangin cheng nuai 30 lai mai telhawng chin nan hian a lo seng reng chu niin, a tharchhuah hun lah chu kum thum vel lai a ni lehnghal a. Engtiang takin nge he department mithiamte hian an ngaihtuah ni ang le tih chu zawhna lian tak a ni.

A chi man lah hi a to uchuak em em mai lehnghal a, kg khat Rs. 500 lai a ni a, thlai chi ah chuan a to uchuak fia fia hle a ni. Telhawng hi a siam sa bazara an zawrh hian kg chanve ang vela an fun hi Rs. 50 te a ni vel chauh a, chutih laia a chi kg khat man Rs. 500 lai mai chu eng ang taka tui tur nge maw ni dawn ni.

Agriculture depart­ment hian Lo neitute tan sum tam tak tak a lo seng tawh ṭhin a. Leilet siam nan ringawt pawh hian cheng vaibelchhe engzat tak seng ang maw? Chutiang taka sum seng tam si hi leilet buh lei tur reng reng bazarah hmuh tur a la awm lo.

Africulture depart­ment aṭang indang, Horticulture department chuan sum tam tak seng ve tawh mahse a hlawhtlinna bazarah kan hmu tam tawh hle a ni. Horti hmalakna vang hian off season lai te'n tomato tui tak tak kan hmu thei thung ṭhin si a ni. Tomato chang a ni lo - Dragon fruit te, Alu te, Zikhlum leh Bawkbawn thlengin an thar chhuak a, kan hmu a ni.

Chuvangin depart­ment hrang hrang hian mipui tan enge an thawh chhuah theih tih hi an in en fo a ngai ta a ni. Telhawng chi pawh hi Minister duhthusam ngawta an chin tir a nih chuan a hlawhtling kher lo ang. Mithiam te'n an zir a, a market thlenga an hriat chian hmasa a nih a, a thartute tan a ṭha dawn nia an hria a nih erawh chuan ṭha turah ngai i la.

Chutiang ni lem loa SEDP sum hman ve hrim hrim nana Telhawng an chintir a nih chuan thing anchhe dawng ang chauhin a fuh lo viau ang tih chu rin hriat theih sa a ni.

- Lalkhirhvela