Written by
Zonunsanga
Pawisa hman pawlh theih leh theih loh awm hi
Sorkar pawisa kalphung hi mipui nawlpui hian kan hre chiang lo a. Sorkarin thil bik tihna atan central aṭangin pawisa a dawng a, chu chu "Mirethei ṭanpuina atan hman mai awm," tihte leh, "Covid-19 dona atan hman zawk daih awm," tihte kan ching a, pawisa hman pawlh theih miah loh hi a awm ve a ni.
Hetihlai mek hian pawisa hman pawlh theih, sorkarin a mamawhna apianga a hman theih sum (untied fund) a awm a, chutah chuan SEDP sum vaibelchhe 700 vel zet a awm.
Mizoram sorkarin Virtual Anthurium Festival 2020 a buatsaih khan kan Chief Minister Pu Zoramthanga khan sorkar laipuia Ministry of Tourism-in festival hman nan kum tin Mizoram sorkarah sum a pe ṭhin tih sawiin, "He sum hi thil dang atan hman theih a ni lo a, Mizoram tourism chawikan nan kût huaihawt ngei ngei turin min ti a ni," a ti a. Hetia a thil sawi aṭanga thil hriatthiam theih lo awm ta chu Anthurium Festival sum kha chu Anthurium Festival atan chiah a hman theih, thil danga pawh pawlh theih miah loh sum a ni a. Anthurium Festival kha hman ni lo ta se, kha sum kha chu khawih chet theih a nih loh avangin central lamah a kir leh dawn tihna a nih hmel ta a ni.
Covid-19 hri len laiin Anthurium Festival an buatsaih tih te, Assam nen ramri buaina lian tham a awm lai takin Anthurium Festival an buatsaih tia an sawi an sawi chung pawha an han kut luih ṭalh chhan kha chu pawisa hman pawlh theih loh kha a liam mai an hlau va, Anthurium Festival hmanna tur pawisa a awm tho avangin an hmang ta a ni awm e.
Mimal tak chuan Anthurium Festival hri len lai taka hman kha chu duh lotu an tam ang a, pawisa hman pawlh theih loh kha a chhan a ni ta a nih hmel a ni.
Tichuan, pawisa hman pawlh theih, mamawhna apianga pawh pen theih zingah SEDP sum hi a awm a, hei hi eng vangin nge District lama TrueNat khawl leina atan an hmang mai loh le? tih hi Mizoram mipui zawhna a ni.
Mipui harsa ve tak takte pawh telin an thawh khawm CM Relief Fund kha chu ṭanpui ngaite ṭanpuina tur sum bik a ni. Sorkar Department, Health Department khawl leina atan an thawh khawm miah lo a ni. Sorkarin khawl lei a duh chuan SEDP pawisa hmang mai se, pawh pawlh theih a ni tho. Mipui pawisa hmanga Covid-19 dova, pawisa nei lo anga insawi chunga sorkar pawisa (SEDP) hmanga party mi a duhsak leh si a nih chuan inthlan lo awm leh mai turah SEDP dawng ve lo zawngin sorkar hi an chhuahchhal mai dawn asin.