Chhuanlam atan Hripui
Assembly session kan en chuan, kan chief minister Zoramthanga leh a minister dang ten an thusawi apiangah Covid-19 an telh zel emawni tih mai tur a ni a, a bik takin he hripui leng hi a theihna lai laiah chhuanlam atan an hmang niin a ngaih theih.
Hripui leng vangin khawvel a buai a, kan state pawh kan bang thei lo. Hri len tirh kha chuan minister pakhat chuan Mizorama hri kai tlem chhan chu kan CM-in Pathian a ṭih vang niin a sawi a, a ṭih ta lo deuh nge ni kan kai hnem ta hem hem hle, kai mek zel bawk.
Health Minister hian Mizoram hi hrileng do kawngah a ti ṭha, India ram state dangte ai pawhin ti ṭha kan nih thu a sawi fo, chanchinbuah kan lo chhiar ṭhin. Eng tehna nge an hman a, eng state nen nge min khaikhin tih erawh sawi lan a awm ngai lem lo, keimahni chauh kan inel a ni em lo turah ngai ila.
Kan CM pawhin hripui len hnuah, central aṭangina veibelchhe tel, sing tel kan dawn thu a tlangau pui bawk. Ngun tak chhut chuan, mizo mipui ten kan ze ṭha kan chhuah a, hri leng karah pawh Zonun zemawi lantirin kan in peizawn tlang thei viau niin a lang.
Mipuiin pawisa kan thawh a, ei tur kan sem chhuak hnem bawk. Kohhran leh tlawmngai pawl hnathawh phei chu sawi sen a ni lo, sokar pawhin a tih tur ṭhenkhat a ti ve bawk a, a la ti ve zel tur pawh a ni ang.
Hripui leng vanga mipuiin Mizoram sorkar sum kan hman hi a tam ang tih chu rinhlelh tur a awm lo. Mahse, mipui lamin kan pek let pawh a tam a, central aṭanga kan hmuh pawh a tam, a tam tu pawh a ni ve reng a ni.
Hmasawnna hna thawh theih loh chhuanlam atana hman reng erawh a rem lem lo ang. State dang pawhin hripui an tuar ve tho a, keini aiin positive pawh an ngah viau, sorkar hna thawh muan leh chet hleihtheih loh chhuanlam atan erawh an hmang ve reng lo niin a lang.
Zonet-in a zirlaite nena budget sawihona an hman kha kan en chuan, kum dang zawng aiin Mizoram hian nikum khan pawisa kan hmang hnem zawk tih kan hria. Sum hi a lo kalna tur aṭang chuan a lo kal reng a, a hman chhuah dan kan thiam a ngai zawk tih a lang chiang hle.
Duhsak zawng contrat pek nan pawisa a awm a, mipui mamawh leh thil ṭul dangah pawisa a awm leh si lo a nih chuan mipui lamin kan lo chhinchhiah ve zel ang a, vote hmangin nakkumah kan chingfel mai dawn a ni.
Kan sorkar hian a mualpho tur hliah nan leh chhuanlam atan hripui hi hmang zel lo se la. Hrileng karah pawh ram hruai turin an tling tawk a ni, tih hi min hmuhtir thei se kan duh hle.
- Sanga, Thlirtu