I danglam bik ang u hmiang!

Ni tin chanchinbu-ah hian Krista leh a lal ram chhan nan thu hi kan lo chhuah ve zeuh zeuh tawh thin a. Hindu firfiakho RSS+BJP ten kan ram min rûn dan tur, Yoga hmang te leh, pi pu sakhua leh tih dan lama min lunglentir leh a, kan Kristianna tihdal riai riai an tum tur thu te, alang apauvin Hindu-ah inleh a, mandir-a va inthâwi turin min ti kher lo vang tihte kan sawiin kan lo aupui ve thin a nih kha. Tunah zet chuan RSS+BJP, Hindutva etc. chungchang, Kristiante tan a him lohna mithiam leh hre ril zawkten an rawn auchhuahpui ta chuah chuah mai a nih hi! An lal ahma hauhvin kan Berampu te inhnialpuiah an cho ang khur khur a. An colour a lang fiah zel e. Kan thupuiah lut tawh ila-

Hmana mi ang ni lo In­thlan­pui : Kumin kan ram inthlang tur hi a danglam em em dawn a, a chhan chu, Kristiante nuai ral duhtu RSS political wing BJP hi Kristian politician-te hian an lo nel ta a, kan chheh vel Kristian State te pawhin sawrkarna an siampui duh tawh a ni. Kan ram inthlan hmasakah kha chuan an la rairah ve hle a. Bâwmte chu hung ve bawk mah se an dahkham an chân ta hlawm niin ka hria? Thlahtute aṭang rénga Mizorama pianga seilian, Kristiante zingah BJP nih a zahthlak thin a nih kha hmanah chuan.

Hmana BJP tho kha tuna BJP hi a la ni a. An thuthlung pawh la ngai reng ‘Hindutva” niin, India ram aṭanga Kris­tianna pet chhuah duhtu an la ni reng tih hre reng chungin mipui leh politician (MLA) te hian an thlâwp/ thawhpui dawn nge dawn lo? tih hi tun inthlan hma chheh vela thu ri ring tak a ni. Kumin kan ram inthlan tur hi ‘Thlarau Indona’ a ni tih thlarauva mit meng chuan an hre ngei ang.

Presbyterian Puitling Sunday School Zirlai : Pres­by­terian Puitling Sunday School zir tur hi a hma kum 2/3 aṭanga lo ruahman sa niin, ‘Kan ram mamawh tak kan zir chat chat zel, Sunday School zir tur buatsaihnaah hian Thlarau Thianghlim a tel chiang a ni,’ tiin chhuang takin kan sawi

ṭhin a ni lo’m ni kha? Kuminah hian Juda lalte chanchin kan zir chho ta ngar ngar a. Zirlai Bung tawpna ber, December ni 23-a zirlai kharna hian Mizo mipuite fimkhur tura inralrinna dar a khawng tih kan hria em? Judaten an Pathian Jehova leh anmahni zilhtu Zawlneite thu hnâwla hnam dang pathian leh a betute lam an âwn tâk avangin Babulon sala hruai an nih thuin zirlai khar a ni.

Hman nia BJP President Amit Shah lo zin khan, BJP rorelna hnuaiah Mizo Kris­tiante hi kumin Krismas hi hmang tur niawmin min sawi a. December ni 23 Zirlai hnuhnung ber Judate Babulon sala hruai thu kan zir thlen hma leh, Amit Shah sawi Krismas ni thlen hmaa inthlan a lo awm hlauh tur hi a va tha em! Lalpan Kristiante vote hmangin Amit Shah sawi leh Babulon (BJP+RSS) sal tân hi kan ram tan dâwtah a chantir thei dawn a ni.

America President thlan kha : He thuchhuah ziak tura min tur chhuaktu Pathian hmanrua nia ka hriat chu, America President thlan kha a ni. America President chuh vetu Hillary Clinton kha a sakhaw biak ber pawh sawi ri duh tawh lo, a thuihruaite leh tantu tam takte pawh kha mi duk dak vak lote ni hlawmin, Bible kalh thil, neih inang inneih phalna pek mai pawh pawisa lo, mi thiangzau tak nia sawi kha tling thei mai dawna a lan chiah khan, America Kristian duh uluk pawl, (Evangelical Christian) te, Pastor ṭhenkhat leh Billy Graham chhungkuate ngei pawh chu an rawn tho chhuak ta suau a nih kha. A hmaa vote thlak ngai lem lote pawh khan an sakhua leh ram chhan nan mi fel famkim ni bik lo tak leh politic-ah pawh tawn hriat la nei lo Donald Trump an thlang tling ta hluah hluah a nih kha.

Evangelical Christian-te leh Franklin Graham-te chet dan khan mi hneh thar ta em em a, an vote an pe a, chu mai ni lovin Donald Trump kha an campaign pui hial a ni. Khang thil an tih avanga Pathianin Billy Graham chhungkua leh Evangelical Christiante a hrem thu kan hre lo, ‘America Great Again’ chu a thleng zâwk a nih si khu!

I danglam bik ang u : Tun hun hi Party atchilh bik neih hun a ni lo ve, thim leh éng indonaah kan lut mek a nih hi. Kan rin Krista thinhnunah hian an trishul (Hindu fei thianghlim)-in kan chhun tlang tir ang maw? Mipui leh kan MLA thlan tlinte BJP+RSS suma kan tawlhthluk loh nan kan Pathian i au ang u kan ti dawn nge? Kan thlan tlin sauh sauh hnua BJP+RSS te thawhpui leh daih duhtute kan thlan tlin loh nan mipuite min chhanhim rawh tiin kan tawngtai zawk dawn le? Engpawhnise tun hi tawngtai hun a ni; râlin khawpui an hual ta si a.

Kan chheh vel Kristian State ten an ram Map serthlum rawng (BJP chhinchhiahna)-a an colour tir ta vek ang hian, keini Mizo Kristiante hi chuan i ti ve duh lo vang u khai! BJP+RSS leh lallukhum a khum theih nana amah thawhpui duhtute kan vote loh ngam hi kan danglam bikna tur chu a ni. Lalpa zawn chhuah ram kan ni a, kan anpui chiah hi ram dang pakhat mah a awm lo. Chuvang tak chuan kan chheh vel State te leh India ram pum hian, ‘Mizo nge nge, an lo va Kristian uluk bik em!’ tia mak an tih turin hawh u, i danglam bik ang u hmiang!

- RTC Lalduhawmi