Mipui rin loh tla theite

A thupuiah “mipui rin loh tla theite” tiin ka han dah a, mipuiin tling tura an rin si tla thei dinhmuna ding mi langsar ṭhenkhat bial chhui chianna hi statistics aṭanga teh dan chu hetiang hi a ni:

Pu Hawla: Pu Lal Thanhawla hi Serchhip Bilah hian hneh theih loh anga ngaih a ni ṭhin. Tunah hi chuan MNF hian candidate ṭha chu nei se Pu Hawla hi awlsam taka tihtlak theih a nih tawh hmel a, tuna an candidate Pu C Lalramzauva hi a fuh vak lo chungin tling thut thei a ni. Inthlan hnuhnung berah Pu Hawla hian vote 5719 a hmu a, MNF Pu Ramzauva hian vote 4985 a hmu a, ZNP in vote 2899 an hmu. MNF-a vote bet ṭhenkhat hi MPC an nih avangin ZPM lamah an kal ang.

Pu Hawla ninna a nasat chuan Pu Duhoma hi tling thut thei a ni a, Pu Ramzauva pawh hian chance a nei. Zoramthar, PRISM bakah NPP tihte an din ve nawk avangin an vote pawh hek tur hi Pu Hawla vote a nih avangin Pu Hawla, Ramzauva, Duhoma hi tling vek thei an ni. A lehlam zawngin Pu Hawla pawh a tla ve thei tihna a nih chu.

Pu Zorama: Kum 2008-ah bial pa­hnihah a tlak hnuah kum 2013-ah vote 700 velin a tla leh. Pu Zoramthanga tan tun hi last chance a ni a, chutih mek lai chuan ‘golden chance’ pawh a ni tel thovin ka hria. A dinna bial Aizawl East I hi term hmasa pahniha Congress tlinna a ni a, 2013-ah khan Congress-in 6221 an hmu a, MPC (MNF nen ṭang kawp) Pu Lalhmangaiha Sailo khan vote 5799 zet a hmu a, ZNP mal dinin vote 4291 a hmu a ni.

Congress hian Zemabawka pa Pu K Vanlalrawna dahin vote tamna veng mi an dah a, ZPM hian an hotu zinga mi chanchinbumi Pu K Sapdanga an dah thung. ZNP-in 2013-ah vote 4291 an hmu a, MPC nen ṭangkawpa ZPM an nih tawh avang leh neutral vote avangin ZPM hian chance sang tak an nei. Congress hi an tam sa hrim hrim a, Zemabawka vote a hlawm chuan chance an nei bawk a, Pu Zorama hian chance chu a nei teh meuh maia mahse he bialah hian tling thei pathum an awm ta a, chuvangin Pu Zorama hi tla thei dinhmunah a ding tel tlat a ni.

Pu Mama leh Pu Ruatkima: Congress minister thawk ṭha bera sawi theih Pu Zodintluanga (Mama) hian 2013-ah Thorang bialah vote 6423 zet a hmu a, amah hnaih bertu Pu Joseph Lalzawmliana, MNF in vote 3919 a hmu.

He Congress bial him ni ṭhin hi tunah BJP in an chuhpui mek a, Joseph-a hian MNF chhuahsanin BJP a zawm tawh a, BJP hruaitute’n Chakma leh Bru an birh tlut tlut sia Pu Mama hi tla thei dinhmunah a ding a, tling chiang sa a ni tawh lo.

Pu Lalruatkima, MNF hian 2013 khan Aizawl West II-ah vote 6575 a hmu a, Dr Lalmalsawma Congress-in vote 5945 a hmu a, ZNP Pu C Ropianga’n vote 2530 a hmu. Hei hi MPC hotupa Pu Ṭhenphunga bial ṭhin kha a ni a, 2013-ah hian MNF hi MPC nen an ṭang dun a, 2008-ah chuan Pu Ruatkima hi pathumna a ni phak chauh.

Kuminah hian MPC hi ZNP nen ṭang dunin ZPM-ah Pu Hmangaiha Sailo (Pu Ṭhena fapa) an dah avangin chance an nei a, 2013-a MNF vote zat hi innghahna ngam a ni ta lo.

Tichuan, Dr Mal­sawma hi taima, hausa leh inpe tak a ni si a, he Congress rawlthar hian MNF leh ZPM inpawhna karah hian Pu Ruatkima hi a phet thla thei. Pu Ruatkima tlin tur a chiang lo; a tla thei tihna a nih chu.

- C Vanlalthanga