Hmangaihna mak tak chu a lo ni!

Kum 2013 khan MNF hian Cong­ress Minister Pu Lalrinliana Sailo chu khehpuama inhnamhnawiha puhin press con­ference an kova, chumi hnu chuan Pu Rinliana hi a insawi thiam ve nghal a. MNF zawngin an puhna hi an awih a, Congress zawngin a insawi thiamna an awih thung a.

Pu R Lalzirliana hian Assembly House-ah MLPC Act an put luh dawn khan Mizoram tana zu zawrh mai ṭha a tih thute thiam taka a sawi pahin, “Kohhran kan rawn dawn lo,” a ti zauh a. He thu hi tun hnaiah Pu Lalsawta (Pu Zira veng, Armed Veng awmna bialtu MLA) chuan a sawi chhuak zauh tawh. Pu Zira tho hian tun hnaia MNF-a a luh hnuah zu a duh lohzia uar takin a sawi leh ta a ni.

Pu Zira thusawi hmasa khi Congress a nih lai a ni bawk a, Congress-in an awiha MNF-in an haw em em thung. MNF a nih hnua Pu Zira thusawi hi MNF-in kut bengin an lawm hluah hluah a,Congress-in an nuih ve leh thung.

Heng thil pahnih aṭang ringawt pawha kan hmuh theih chu political party mi leh sate hian ram kan hmangaih tak tak lova kan party chiah kan hmangaih a, kan party thusawi chu awihawm lo deuh pawh kan awih zel a, kan el puite thusawi chu thu dik ngei nia lang pawh kan awi duh lo tlat thung tih hi a ni.

Kan ram hma­ngaih dan hi ram ni lovin party chin chiah hi kan hmangaih tih he thilah hian chiang takin a lang a ni.

Kan Home Mi­nister bang ta lamah bawk han lut leh ta ila. Kum 20 zet MLA a nih chhung leh kum 10 dawn lai Mizorama thiltithei ber pawl a nih chhung khan a bial hi District capital atan lo nawr tak tak chu nise inthlan dawna party thlak hial khawpa ‘bial hmangaih thar’ hi a ngai lo tur.

Chu Saitual Dis­trict chu Cabinet Meeting lamah leh Assembly House-ah a sawi thu hriat tur awm lo chungin a ban chhanah a han sawi leh thut a, a awihte chuan mittui tla khawpin an awih a, Saitual biala a awih lo vek vek chuan, “Mai maia chem, lemchang i ni,” tiin an kawk zui ve bawk a, kan thil thlirna hi kan party thlirna tarmit ang angin a ni.

Politician dangte pawh hi thur chhuak dawn ila sawi tur a tam thei viau tho ang. MNF President-in Chief Minister kum 10 a nih theih hnua sorkar in­thlanna kalphung hre chiang ber turin, “EVM vanga chak lo mai mai alawm kan lo nih,” a tihte kha EVM kalphung leh sorkar inrelbawlna a ring lo tihna a ni a, ram hmangaih zia tak tak a ni thei lova; Pu Lal Thanhawla’n kawng chhia a hmu lote kha ram hmangaih zia a ni thei lo.

Ram kan hma­ngaih titu kan poli­tician tam zawk hian party an hmangaih a, ram tak tak hi an hmangaih phak lova, Mizorama political party ten ram kan hmangaih an tih dan hi chu hmangaihna mak tak mai chu a lo ni.

- Lalmuanpuia