Telhawng an ti leh tawh...

Vanglaini chan­chinbuah khan Lalkhirhvela tih thuziak kha ka lo chhiar fuh a. Assembly ṭhutkhawm zawh takah kum 2019-2000 chhungin Sangau khuaa chhungkaw 50 te chin turin Agriculture department chuan SEDP sum aṭangin cheng nuai 30 lai Telhawng chi lei nan dah a nih thu an sawi.

Telhawng hi kum thum hnu velah a thar chauh a nih hmel a. Engtiang takin kan mithiamte hian an ngaihtuah tih chu zawhna lian tak a ni, a rawn ti - kei Telhawng expert ni lo zawhna pawh hei tho hi a ni.

Ka lo hriat ve dan chuan Telhawng hi hrawk tithaktu mai a ni; mi pangngai tan ei tlakah pawh ka ngai lem lo.

Hetihlai hian Telhawng laina hnai leh Telhawng manṭang ei thei tur nia lang te chuan Mizo native plant Telhawng ṭhatna lam an hre thuk leh viau tawh a. Foreign mau lak luh aia Telhawng buaipuiin lukhawng a neih dan tur te chu an titi tui ber a ni leh der tawh.

Telhawng hi kum tinin a nu leh a paa a insiam ṭhin thu te, natna chi hrang hrang dotu a nih vanga a rate a tlawm theih loh thu te, China, Thailand leh Indonesia velah hralh a tlak em avanga kal pawh ngai loa an rawn lak vek duh dawn thu te hi kan CM thusawi ai pawhin a rintlak zawk thu an sawi ngam sak nia!

Telhawng manṭang ei thei tur zinga mi pakhat sawi leh dan chuan, Telhawng hi pharmaceutical com­pany lamah demand a san em avangin chakai farm siam aia a hlawk zawk tur thu hi an hmu fiah kuar.

A bikin Mizoram telhawng hi gluco­mannan content a sang a, hei hian a hralhna tur lamah nasa takin min pui dawn tih a sawi. SEDP sem hun nghah tlawk tlawk aia Telhawng chin nghal hlawk dan tur hi a hmu lawk chiang viau a, court-ah a ṭan ngam tur thu a sawi.

Economy-a Mizoram khai chhuahna tur scheme hrang hrang kan hlawhchham pui nual tawh. Scheme hlawhchham a tam poh leh a fawng lam chelh phak zingah mi hausa thar an pung a, a tuartu erawh kuthnathawktute zel an ni.

Tung, teak, sawh­thing, aieng, oil palm leh thil dang tam takah kan hlawhtling lo tawh a, kan buaipui mek mau pawh hi kan la hlawhchham pui tluang zel rih a. Mau hmanga Mizoram economy thlak danglam tumtu kan Chief Minister pawh hi kuthnathawktu ni loin a fawng vuantu lawk a ni, mahse a ni hi chuan Mizo mipuite hmakhua ngaiin mau/ rua a luh chilh a. Luh chilhah duh tawk loin a at chilh a, amah tak tak ala â lo hlauh erawh a state pum anga kan la mualpho loh chhan a ni.

Telhawng thakzia leh saum tho ṭha tak nena nawr chilh chakawmzia lam chu nakina sawiah khek ila. Telhawng chingtu tur an thlang ta nual bawk a, a khingpui tur saum industry din turin ka officer hna hi bansan ka tum rilru.

- Vohbika Pa