Assembly Session in ka bei a ti dawng
Keini ang ak zat hnih hnuai lam rawng lo lehnghal, mahni venga VC ah pawh in candidate ngam lo tur hian Mizoram aiawha thlan tlin mi 40 te ka duh khawp lohzia ka rawn sawi dawn a, a inthlahrunawm ka tih rualin kan roreltute chet dan ka en khan ka inthlahrung buai duh bik lo.
A hmasa berah chuan cheng nuai 100 eia inpuhna thu hian bul i han ṭan teh ang. Ngaizawl khaw kawng laihna turah cheng nuai 100 hi Asselbly Speaker-in a lo ei ve hmiah niin Ngaizawl NGO lam chuan voice record an nei. He mi kal zelah hian opposition chuan Speaker kaihhruaina hnuaia rorel an duh loh thu an sawi a, an chhuak. Chhuak tau ni lovin Mizoram rorelna in a zahawm zawkna tur leh, nuai 100 zet ei nia inpuhnaah a fihlim tih finfiah hmaa a hnuaia ro rel an duh loh thu an sawi hi chu a dik hle.
Assembly Spaker hian a ei pawh a la ni lova, an puh a ni. A dik leh dik loh finfiah thei se a ṭhat nen Opposition chhuak tur lo zak miah lova bye bye duh tawk MLA khati zat neitu state kan ni hi a zahthlak a ni.
A pahnihna - kan MLA zingah contract hralh sawi chhuak an awm kha a pawi ka ti. Mi hminga hna an thawh ṭhin leh an hminga miin hna an thawh ṭhin lam hawi zawnga thu sawi duh kha chu kan rama dan kan pawi sak lohzia tichiangtu a ni.
Kan rorelna in sang a nia an sawina hmun kha, khatiang kha kan hotute an nih chuan contract hralh te, mi hminga contract thawh te, contract a ei lo neih ve zel mai te hi thil thiang a ni ta em ni?
Kan opposition MLA ṭhenkhat kha an hawi ve mai mai lulai deuh bawk a, sawi tur an hre lo. Thiamna lamah an sang bik lo a nih pawhin kan dem lova, nimahsela an inzir lovin an inchhiar lo lutuk deuh em ni? tih tur khan an awm tlat. Session dawt lehah chuan inbuatsaih ṭha deuh se ka duh a ni.
Sikul building sakna atana sum kal dan thlir hian a dik lo tih chu School Education Minister pawh khan a pawm tih a thusawiah a lang. Vairengte kawng laihnaah hian compensation-ah thil fel lo lian tak a awm tih chu a pawisa a lo chhuah hunah tute nge hausak belh? tih lo en ila a chiang ang.
Keini level pawhin pass siam chawp leh Revenue office staff-te titi kan hre ve phak chunga kan Minister leh ruling MLA ṭhenkhat thusawi duh dan kha a zahthlak a ni.
- Mamuana, Kolasib