Mission Field-a Kristiante nekchepna thleng zel hi...

Kan bu zawla lal duh vanga BJP kan lo ṭan vel lai hian, kan Mission Field lamah chuan tuarna a thleng mek a, nitin deuhthaw chanchin ṭha hril harsat thu, Missionary-te ka aṭangin kan dawng mek.

Kumin October thla khan, Patna Mission Field pum huap Convention neiin, sum tam tak senga hun an hman mek laiin, RSS mi 30 rualin tihbuai tumin, buaina an tawk tawh a, an programme pawh hmang tluan thei lovin, an ṭin ta ringawt mai kha a ni a.

Tun hnaiah, Dt.15/11/2018, tlai dar 3:00 PM khan Patna South Biala Bihta khuaa Evangelist Lalawmpuia te nupa leh Field worker 2 in harsatna an tâwk leh a.

Hun danga an tih dan ṭhin pangngaiin Bitha-ah house church nei turin an kal a, an thlen hnu minute 10 velah patling 3, an inkhawmna kawtah lo kal tlangin an rawn en a. "Enge in tih" tia an zawh chuan, "Kan leng mai mai, ṭawngṭaina te kan hmang dawn" an ti kha, an rawn pawr nghal viau ringawt mai. "Dharam Parivartan (sakhua inlehtirna) in ti a ni maw?", an ti nghal a. Pawna chhuak turin an ti a, an rawn pung khawm nghal ṭuk ṭuk a, chhuah mai chi a ni lo tih an hriat avangin an chhuak duh lo a, Pankaj (field worker) chu pawh chhuah tumin an beng nual a, mahse an pawt chhuak chiah lem lo.

Anmahni lam zawk khan Thana-ah kal ang, an ti a, police an phone nghal a. Police lo kal hma chuan an I.D leh Adhar Card te an chhuhsak lui a, thla an la bawk. RSS te chuan an hruai chhuak a, kawngpui sirah an ṭhut tir a, "Jai-si ram... " tiin an au khum a, kross sipai pasal ṭhi awrh (rosary) chu an pawt thla a, an pawt bung a, chil an chhak a, anchhia an lawh bawk. An thla te uluk takin an laksak bawk.

Dawt hlira puhin, "Pawisa in sem, force convertion in ti. 'Gamchha (serthlum rawng ang kha) hi leiah paih la, nuai 1 kan pe ang che in ti', kristian-ah inlet la nuai 5 kan pe ang che in ti' tiin Police hnenah kan report dawn" ti tein, ṭawngkam chhe tinrengin a ankhum bawk.

Chutia an buai lai chuan Police lo kalin, zan dar 7 vel thleng lock up-ah an kawl a. Pu Robert-a IAS punin, a

ṭanpuina azarah chhuah lehin, zan dar 11 dawnah Field Office an thleng leh ta a ni.

Heting boruak hi kan la tawng zel dawn. Mizoram BJP party chuan insawi mawi nan, "Congress sorkar laiin tihduhdahna a nasa zawk" an ti. BJP sorkar-ah hian sawi sen loh buaina, Missionary-ten an tawk tawh. Chutih laia sum duh avanga, BJP sawi mawi tum hi a Mizo Kristian lo lutuk.

Social media-ah Mizo Kristian chhuanawm an vawrh darh kha, hetiang hian an sawi. "Aizâwl tlangvâl, Nursery Venglai, Tv. David Lalrinawma chu hun rei tawh takah khân BJP-ten a background zawng zawng an chhui a. MA (Hindi), Ist Div-a pass a nih thu te, ṭawng thiam leh vengva, tlangval fel tak a nihna hriain an Office-a thawk turin, chêng nuai tam tham tak leh car 2 pêk nghâl tiamin an sâwm a. A chhân mai loh avangin hun eng emaw ti hnuah, an pawisa pêk tura an tiam chu a leta tipungin an thlêm nawn leh a.

Nasa taka ṭawngṭaiin Pathian an râwn a. Zan mut theih loh chang pawh a nei. A nu thu a ngaichang ta ngawt mai a. A nu, kohhran Hmeichhe OB ni lai chuan, an chhung Inkhawmnaah ‘Pathian hmingin kan hnawl e’ a ti chhuak ta tawp mai a nih chu.

Suma lei theih Mizo eng emaw zat kan awm laiin, Tv. Davida leh a chhungte chuan, Hindu-na nen in mawngzawm an duh ve lo va. Mi hausa an ni bik lo.

Rev te, Missionary pension tawhten, BJP hlauhawmzia an auchhuahpui hnuin, an hlauhawm lo tiin an thu an zuk leh ta mek a. BJP MLA candidate atana lei theiha an awm laiin, Tv. David-a erawh chuan, tunah hna thawh mumal pawh a la neih hmain, Krista a rinna avangin sum tam tak chu a hnar ngam a, a va chuanawm tehreng em.

He thu hi dawt thuthang a nih chu a rinawm lo. Eng chenin nge kan rinna fiahna hi ka tawn zel dawn le?

- Lalrinliana Colney