Aizawl Thupuan leh Zoram Politik

Nikum lam tawh khan thingtlang lam mi pa pakhat hi zingah kan inah a lo leng a, ka hriat ngai mi pawh a ni lo va. A titinaah chuan, "Inthlan a awm leh hunah chuan ........chu C.M a ni an a ti a. Hei hi hriatna neia sawi nge a nih a duhthusam tih pawh ka hre chuang lo va, a thusawi chu rina rin loh ngaihna pawh ka hre lem vak lo.

Inthlan dawn te hian hetiang lam thupuan hi a tam duh an tih hi a dikin a rinawm a; Pathian pawhin A duh chuan A puang thei a, ramhuai pawhin dik lo tak pawhin a puang thei bawk.

Chutih lai erawh chuan kan rama politik Pawl hruaitu ṭhenkhatte thusawi ve thung chu, eng emaw zawl ang hrima, "Kan Pawlin sawrkarna kan chang dawn, chu mite pawl chu an tla dawn," ti hiala an sawi fo

ṭhin hian rilru a hneh hran lova, duhthu an sam mai a ni a; mahse an sawi chu a tak anga an sawi avangin mi a hip hran lo chauh ni lovin a Kristian lo a ni. Chu ai chuan tuten emaw, 'Kan Pawlin sawrkarna kan chan hlauh chuan" tih hian mi a hneh awl daih. Mizo Kristiante chuan, "Lalpan rem A tih chuan chumi khami kan ti ang" ti tur kan ni (Jakoba 4;15)

Chu lovah, "Mahni insawi mawi kan ṭan leh 'dawn ta maw?' tih ang ziazangin (2 Korinth 3:1) midang sawi chhiat leh mahni insawi mawi hi, Kristiante tana tih dan awm tawk a awm thei; a ṭhalo lai insawisel hi chu, politik thu lovah pawh, a ṭha zawk zawnna turin a ṭul thei a; mahse chu pawh chu mi chhiatna zawnga insawi chhiat kher phei chu a Pathian thu lova; mahni insawi mawi aiin (2 Korinth 10:18) mahni pawl thil tum ṭha nia hriat zawrh chhuah mai hi a mawi a ni. Pawl lehlam thil tih ṭhatte pawh infakpui liam liam se, ram tana ṭha te pawh chu chhun pawh inchhunzawmsak ni se mipui chuan mi puitling tiin kan hrethiam vekin a rinawm.

Kristiante hi chuan kan Politik beih danah hian, kan sakhuana leh nitin nun hmasawnna thuah Pathian thuneihna vek a ni tih hriain, Pathian thua mawi taka tih a nih chuan, amah Pathianin mal a sawm ṭhin a, mi chapo leh politik thiltih chhuanlama Pathian zah lohna thiltih chu hlawhchhamna a ni. Kan rama Politik hruaitute zingah te khan mi sawisel kher lo, a ṭha chu thawk mai an awm mek zel a, chung chu an fakawm a ni. Insawichhiatna hi, a inreltawna te pawhin an hria a, chiang taka hretute chuan, 'Zawl buka e tang ve ve,' an ti duh lek! Infak tawn zawk se Pathian A lawm zawk ang a, A duhzawngin kal se mal A sawm zel zawk a ni.

Ring lo mite tih dan, a chhe lai berte hi entawn a hlauhawm. Tute lim emaw inhalsak te ang te hi eng nge a awmzia? Anchhia inlawhna a ang a, mimal inhuatna a ni a; tin, mihring taksa lem/ lim/ hniak a chhe zawnga insiamsak a, an hriat loh hlana insawisak hi anchhe inlawhna dawi lam thil a ni a, kan Mizo pi puten an duh ngai reng reng loh niin ka hria.

Tin, Mizoram te pawh huamin, India ram hi Hindu rama chantir tumna te a awm ta an ti emaw ni. Mizorama Lalpa ringtute hi ṭang fan fan turin i insiam ang u. Goliatha kha chak hlein lang mahse, a tihṭhaihna pawh hlauhawm hmel hle mahse, Pathian a chet phawt chuan Davida, tleirawl, beram vengtu mai tan khan Pathian lama a ṭan chuan, sairawkherh/ virvawm pawh ngai lovin, a beram ven tiang mai pawh khan a hawlh thlu tawp thei ang.

Kan rama politik kal­hmangah hian, a ṭul chuan Pathianin thupuan leh hrilh­lawkna pawh A pe chawp thei a. Mahse A thu kan neih tawh saah hian, a tlangpuiin thil lang chiang sa a awm. Chung thu ah chuan, kan Lalpain min thlir danin, "Kan a- in kan lo ngawng" palh thei a ni, (Luka 24:25). Ram politik thuah te hian Pathianin Amah ringa A thua kal ngam turin min duh a. Zoram chuan kum za aia rei Pathian thu kan lo kawl tawh a, chuta kal ngam tur chu kan nih tawh laiin, zawl dang ngaihven tawk hi an lo awm leh ṭhin. Tholeh Lal Isua chuan A thua innghat ngam lo chu a A ti a, A zawlnei thua inchhut chiang duh lo leh awih nachang hre lo chu ngawng A ti mai a ni.

Pathian thua kan kal ngam chuan harsatna awm thei pawh, "Chungnungbera thiltihtheihnain," A tifel zel ang. A malsawmna dawng turin A thua kal a ṭul a, thu satliah mai ni lova a taka kal ngam hruaitu hmangin Pathianin Zoram hi malsawm A duh a ni.

Israel hnam chu an hruaitu leh mipui Pathian thua an kal chuan kum sawmli lai thlalerah chhang thar, sa leh turin A chawm a, ramtiamah A hruai lut a. Keini ringtu Israel tharte tan pawh hian, "A thiltihtheihzia entir nan" kan ram politik kaihruaia mal min sawm hi A ti thei a, chu chu A mi duhsak dan a ni a, kan rin athu a ni. Inthlan thuah pawh pawl boruak leh sum hmanga vote leitir aiin mahni mimal zalenna hi Pathian hnena

ṭawngṭaina nen hman ngam a ṭha. "In hmaah malsawmna leh anchhia (A thu zawm leh zawm loh) ka dah a (Deut: 11;26 ff)" leh "Mi chapote chu an inngaihtuahnain A tidarh ta a," tiin hnam tlawmte chu chawimawi A duh a ni (Luka 1:51).

Baibul politik chu "A ram leh A felna chu zawng hmasa zawk rawh u, tichuan, Jentel-te (ringlo mite politik duhthusam pawh) A pek belhchhah dawn the u nia,” tih a ni. (Lal Isua thusawi - Baibul).

- Rev. Rokhuma, Mission Vengthlang, Aizawl