Inthlan leh mipui rilru
Mizoram inthlanpui kan hmachhawn mek a, mipuite hian zalenna kan nei a ni tih hi inhre thar leh ang u. Mahni zalenna hrek bet zawnga party-a inhman hi mahni intihhrehawmna a ni. Party hi ramin a damchhuahpui kher lovang, sorkar ṭha leh dik, kawng dik zawh ngam hi ram siamtu a ni zawk. Mahni chhia leh ṭha hriatna hmang thei turin mifing pangngaiah inngai la, tu thuhnuaiah mah i awm lo tih ring ngam ang che. Mahni ngaih dan pawh ring ngam lo nih a hun lo vang.
Rethei lutukah inngai suh. Vawiinah hian i eikhawp i nei a, tute sum beitham te te emaw vang khan in chhungkuain eng in nih phah dawn lo. I dinchhuahpui tham a awm dawn lo. I hlawkpui tak tak tham lah a awm hek lo. Chutianga ti ṭhinte chhungkuaah hian a takin i hmu reng a ni lawm ni?
Pathianah aiin candidate leh Minister tih velah rinna i lo nghat zawk fo em? An hnar chauha thaw mihring rinchhan hi bansan tawh rawh u (Isaia 2:22). I vawi khat hmeh zeuh khan i hmalam hun tha a her chhuahtir thei asin.
“Candidate-ten thil sem se, ka la zel dawn. A bak beisei tur a awm chuang lo” i ti em ni? Sorkar-ah i beiseina siam dik la, beidawng suh. I beidawn lohna tura siamtu tur che thlang thei turin inbuatsaih la, chutiang ti thei turin candidate-te dik tak leh huaisen takin hmachhawn la. “Ka ramin eng nge min pek tih aiin ka ram tan eng nge ka tih” tiin inzawt fo zawk rawh. I ram tan thil tha ti la, i ramin thil tha a pe ang che. A ram ber a ṭhat loh chuan a chhungah eng nge hlawk tak tak chuan ang le?
Ram siamṭhatu i ni thei. Mi pakhat thil ṭha tih avangin ramin a dinchhuahpui a, dikna ṭan tlat ngam leh fel taka ti ngamtu avangin Hnam humhimin a awm thei tih hi Bible aṭangin a chiang tawk. Mi dangte rinawm lo leh dikna tan ngam lo tura i ngaih tlatna kha nangma rinawm loh vang leh tlanchhe sa i nih vang mai zawk a ni. I tih theih kha ti la, dik la, rinawm la, mi dang i ring ngam ang. I tih theih loh i tih loh avangin hnual kher suh, a titheitu tur an awm alawm. Ngaihtuahna pawlawh taka i awm avangin i hma hun tichhetu i ni thei.
Kan ram hmasawnna tur leh kan politics siam tha tur hian kawng hnih chiah zawh tur kan nei. Chief Minister ṭha neih a, mipuite ngaihtuahna leh thinlung pawh siam tha ngam roreltu tha neih. Chu chu tunah hian a thlen theih i beisei em?
A dang leh chu mipui dik leh rinawm neih a, mipui thatna avanga roreltu dik tun din leh rorelna dik kenkawhtir a ni. Nang erawh chuan tih theih leh nih theih pakhat chiah i nei, a hnuhnung zawk khi. I nih theih awm chhun i nih duh loh a, i tih theih awm chhun i tih duh loh chuan beiseina zam thui lo mai rawh. Tuma’n an pui tawh lovang che. Tumah i dem thiang hek lo vang.
- Rev. R. Lalnunenga, E. Lungdar Venghlun