I NAUPANNA TUMAHIN NGAI NEP SUH SE

Hman deuh khan kan ṭhianho titinaah KTP hruaitu, a bikin Group hruaitute an naupang lutuk deuh nia kan hriat thu kan sawiho a. Keiin, "Ngawi teh u, keimahni zawk hi kan upa lutuk tawh zawk a ni lo maw? Tuna an naupang lutuk deuh kan tihte hi kum 24/24 an ni fur tawh a nia," ka lo ti zauh a. Kan han inchhut chiang a, keini ṭhian ho kha KTP over hnaih tawh vek kan lo ni tak tak zawk a. KTP Group hruaitu kan nih ve lai khan tuna naupang kan tih em emte kum ang tho hi kan lo ni ve reng si a!

Tlem laia Mizoram chhim lama kan zin ṭum khan politician senior tak pakhat nen kan inkawm a, ka kum zat min zawt a, kum 40 ka tling ṭep ka ti mai a. A ni chuan, "In la naupang a, hmanhmawh reng reng suh u," min ti ta daih mai a. Kei chuan, ka han zawt chik deuh a, kum 20 pelh hretah MDC (Member of District Council) a thlan tlin niin naupangtein kum 30 velah CEM a lo ni a. MLA a nih pawhin a lo la naupang khawp mai. Chutah keiin nui hawk hawk chungin, "Ka pu chu i ti fair lo angreng hle mai a, kum naupangtein nang pawh chutiang chu i lo ni tawh a, thlan tlin i nih ṭuma i kum zat aia kum 10 chuanga upa daih tawhte tunah naupang chhia min ti leh daih a," ka ti a. A ni pawh chuan, "A... i sawi takah chuan a ni khawp mai. Keiniho zawk hi kan upa lutuk tawh zawk a ni tak ang a," a ti ve mai bawk a! Kan hlim dun ta phian a...

A ni, Mizorama awm chu nise, Ukraine President lar tak Volodymyr Zelenskyy, kum 44 chauha upa hi "naupang lutuk" tiin mi tam ber chuan CM atan pawh kan pawm lo nasa ngawt ang. AAP Spokesperson Raghav Chadha-te hi Mizorama awm chu nise, kum 26 lek a la nih avangin eng anga lehkhathiam pawh nise eng Party mahin Spokes­person atan kan hmang duh lovang. Georgia ram hruaitu Irakli Garibashvili pawh khu kum 2021-a Prime Minister a nih khan kum 39 chauh a ni a, Mizoram chu nise Chief Minister atan kan la pawm lo a ni lo ang.

Ram dang hruaitu sawi duah pawh a ngai lo; Mizoramah pawh example ṭha tak tak kan nei. CM ni rei ber Pu Lal Thanhawla kha kum 35 a nihin MPCC President a lo ni tawh a. Kum 1984-a CM a nih khan kum 46 chauh a la ni. Pu Zoramthanga ngei pawh hi MNF Vice President a nih khan kum 35 chauh a la ni a, Cabinet Minister a nih a, Finance leh Education a chan khan kum 43 chauh a la ni. CM a nih pawh khan kum 54 chauh alawm maw a lo nih le.

ZPM Leader Pu Lalduhoma pawh hi MLA election-a a tlin loh hmasak ber te, State Planning Board Vice Chairman a nih leh MPCC President a nih te, Lok Sabha MP atana thlan zui a nih kum, kum 1984-ah khan kum 35 chauh alawm a lo la nih! Chuvangin, kum lama naupangte hi an kum a tlem deuh avanga hnawl ngawt tur kan lo ni miah lo.

India ram chhungah leh khaw­vel ram dangah pawh hruaitu senior rual karah hruaitu naupang tak tak, ṭha tak tak hi an ther fur tawh a ni. Hetiang lamah hian Mizoram mipui hi kan harh thar a ngai viau a ni. Hetia kan sawi hian senior-te hnawl tur tihna a ni lo, ṭhalaite khawvel man pha, khawvel danglam chak lutuk man pha, kum lama naupang zawkte hi senior-te karah in phum ve fur tawh rawh se tihna zawk a ni. A naupang lam apiang ṭha zawk tura ngaihna te phei chu a dik hauh lo; an rilru a lo dik loh hlauh phei chuan a pawi thui ting a ni mai.

Hruaitu atana ṭha hi kum lama teh tur a lo ni ringawt lo; mihring zia leh nunphung (personality) hi a pawimawh ber zawk a lo ni.

- C. Lalhriatpuia