Kan Police-te an che rang

Tun hnaiah Mizo­ram chief minister Zoramthanga chu social media kaltlanga vau a ni a, kan ram lal ber hi, "Thla thum chhunga a bang lo a nih chuan a nunna a tan a pawi zawk ang," tia vau a ni hial.

Hetianga social media kaltlanga kan ram lal ber huaisar taka vau a ni ta mai hi a zia lo takzet a, mi dawihzep deuh tan phei chuan chhiar zawng pawha ṭim uai uaina tham a tling mai thei.

Kan Mizoram Police-te pawhin chu­tianga kan ram lalber meuh vau a ni ta chu, rang takin hma an la a, a titu man chhuak tur pawhin hun an duh rei lo hle tih kan hria.

Kan Police-te chet ranzia leh, kei­nin man chhuah harsa tak tura kan lo ngaih, social media kal­tlanga mi vautu an man mai theite hi an chhuanawm em em a, kan home minister Lalchamliana pawhin a chhuang hle a ni ang, a twitter-ah Mizoram Police-te a chhuan thu a tarlang hial a ni.

Chutihrual chuan Mizoram Police-te an fakawm em em laiin, rilruah thil dang a lo awm lo thei lo a, kan Police-te hian ṭum dangah hetiang tak hian hma an lo la chak tawh ṭhin reng em? tih hi a ni.

Mizo politician pakhatin kan home minister a chhanna pakhatah chuan, "2020 a Cyber Police Station a FIR hmasa ber ka thehluh kha vawiin thlengin thu zawh fiah emaw man emaw an la ni miah lo mai a. Facebook a thuziak chhui a har zia kha min hrilh nasa mai a. Hei a lo har lo chu anih dawn hi? Mizoram Police an thawk ṭha hle mai," a ti a ni.

Hei chauh a ni lo - nikum lama Cham­phai kuhva tawlh chungchanga buai­na a awm khan kan social activist Pi Van­ramchhuangi FIR thehluh chu kan Police-ten an register lo nia sawi a ni bawk.

Kan Police-te hian tuna hma an lak chak reng ang hian case dang pawh rang takin bawhzui ṭhin se, vawiin Mizorama social media kal­tlanga hnathawk tur inbumna te, sum leh pai tam tak inchhuhsak a, sum­dawnnaa inbum­na te, sum inpe lawk chunga hna pek intiama inbumna te hi a reh thei ngeiin a rinawm.

Hei chauh a ni lo - political party ruih­chilh tam takin thudik chanve leh dawt thu leng hmanga social media-a an inchir thehna leh intih­hmingchhiatna tam takte pawh hi kan mangṭha thei mahna. Kan Mizoram Police-te han ṭang zel teh u.

- Zoramhmangaiha