MNF leh BJP inzawmna...

November 9 khan Northeast Demo­cratic Alliance (NEDA) chungchang hi Vanglaini lamah hian ka ziak tawh a, kha article avang khan ṭhian ṭhenkhatte chuan min fak ve liam liam a, ka rin loh lamah MNF lam awn deuhte chuan min sawisel nasa thung a. Tunah hian ka thusawi ṭan chhan tur news report ngaihnawm tak ka chhiar fuh hlauh mai a, tunlai politics-a thusawi vir vel hi ka han tui hnih leh dawn ta a ni.

November 18-ah khan The Economic Times chanchinbu chuan, "Will MNF take Mizoram from Congress or will BJP surprise all with a post-poll alliance to storm to power?" tih thupui hmangin Mizoram inthlan tur thu ngaihnawm deuh mai an ziak a. Internet lamah chhiar theihin a awm a, Mizorama kan journalist-ten tih nachang na hriat loh leh an thiam loh, an peih loh ni bawk tur angin statistics ṭha tak tak an dah tel a. Bullet point-in awlsam taka chhiar theih an rawn dah bawk a, chungte chuan MNF leh BJP an thawhho thu leh inthlan zawhah inzawm an tum thu lam hawi vek a ni. Economic Times hi awn lam nei lo chanchinbu anga dah zinga mi a ni.

MNF chanchin a ziahnaah chuan - Since any pact with BJP will hurt sentiments in the Christian-majority state, MNF president Zoramthanga keeps on clarifying he is against BJP and Hindutva, lest he riles Mizo voters. Referring to his pact with BJP-led North-East Democratic Alliance (NEDA), he told ET Magazine: "Congress is our political opponent since the beginning. Since we can't be with the Congress, we are with the BJP, at the Centre. But in Mizoram no one will tolerate the BJP - they are anti-Christian." Even as both the BJP and the MNF are yet to declare an alliance, political circles are abuzz with talks they might support each other after the polls. - tih a ni a, anni hian MNF leh BJP inzawmna hi an ringhlel ringawt pawh a ni lova, Pu Zoramthanga an kawm hnuah pawh a thusawi hi an la ring thei lova, BJP leh MNF an inhnim hnai tih an ziak a ni.

MNF President zahawm tak Pu Zoramthanga hian BJP nen an thawh dun theih loh thu, BJP chu Hindu party an nih thu hi a sawi fo tawh a, mahse Pu Zortamthanga hian BJP din NEDA a chhuahsan duh miah si lova, hei hian BJP hnuaiah a la awm tih a nemnghet zawk a ni. Pu Zorama hian NEDA chunghang an zawhnaah NEDA ni lo NDA zawka tun hmaa ZPM leh MPC an tel ve thu kha a sawi thla zen a, anni pahnih hi chuan BJP din NEDA hi an zawm ve lo. NEDA list hi ka article hmasa zawkah khan ka ziak a, khatah khan Mizoramah hian NEDA hnuaia awm chu MNF leh BJP chiah an ni. NEDA hi BJP hotupa Amit Shah din a nih thu pawh kan ziak lang nghe nghe tawh a ni.

BJP chanchin an ziah ve dan thungah chuan - Like in Meghalaya, BJP is keen on post-poll alliances here also. A Tripura leader campaigning in Mizoram was heard saying that in a fractured postpoll scenario, MNF and BJP could come together. But, she added, MNF can't have a pre-poll alliance with the BJP for fear of a backlash from majority of the Mizos. Which mean till elections, both are single but ready to mingle later. - tiin an ziak a, hetah hian BJP-in MNF hi thawhpui an tum tiin a ziak tluk a ni a, a chiang viau.

Sawi zau ta ila. Meghalaya-ah tunah hian BJP chu 'roreltu' tiin media zawng zawngin an ziak deuh vek a, BJP in MLA an neih zat chu pahnih chiah a ni a, Meghalaya-a party lian ber chu NPP an ni. NPP sawi chuan BJP lam ṭang, BJP nena thawk dun an ni tih hi an ziah dan a ni. MNF sawi pawhin BJP lam ṭang an tih hi national media te ziah dan a ni a, Meghalaya hi tunah hian 'Saffronised' an ti tawh a, Meghalaya hi BJP rorelna hnuaiah a awm tawh, an ti a ni. BJP hian MLA eng zat pawh nei se thawhpui an neih avangin ro an rel tih a ni. Mizormah pawh hian BJP hian MLA an nei tam dawn lova, rorel an tum ngam chhan chu thawhpui an neih vang a ni.

Ka ngaih pawimawh chu BJP nihna hi kan hriat chian loh avangin hlauh nachang hre lovin kan lo tlawn niin ka hmu. India rama mipui nuai 10 vel lek hi min ngai pawimawh lova, an duh ber chu Lok Sabha leh Rajya Sabha-a roreltu niha India Danpui (constitution) ziah danglama India hi 'One Nation, One Religion' hnuaia dah a ni a, chu ram chu Hindu ram, chu sakhua chu Hindu sakhua a ni. An hnathawh tawh dan, Bawngsa ei thlenga an khap duh dan te hi kan hmu vek a, 'BJP an hlauhawm lo' kan tih hian Mizo tlemzia, BJP tamzia leh an thawh dan nunrawnziate hi kan chhiar zau lo hle tih a ni.

BJP hi Hindu sakhaw awn party ni se, ṭha takin hna thawk se a la ngaihdam theihin ka hria. Tuna BJP hi chuan Indian economy an tihniam zel a, thil man a pung a, kan eirawngbawlna gas (LPG) man san tawhzia, kan petrol leh diesel man pung leh kan pawisa (Indian rupee) hlutna tlahniam chak lutukte hi chhut ila sorkar ṭha, hnathawk ṭha titute hian sawi tur an nei em le? Chu chu an tawpna a ni lova, he BJP hian state tina rorela a tawpa India ram hi Hindu rama (Hindutva) siam an tum a ni. Hindu rama siam an tum zingah hian Mizoram pawh hi a tel a ni. Kan pastor te hian hei hi an hre chiang a, Pasator-te hi tun ṭum inthlan tur ang reng reng hian an la ṭang ngai lovin an la au chhuak tam lovang. A chhan chu Mizoramah BJP in a siruk lain an bei tih an hmu.

MNF hian BJP hi, "NEDA-ah leh Inthlan zawhah kan thawhpui dawn lo," tiin hming ziak hnan ngamin ti se chu Pu Zoramthanga thusawi hi a la pawm theih a, mahse NEDA-a an thawhhona aw apianga tehkhin thua a sawi mam ṭhin te, inthlan zawha BJP an thawhpui dawn nge dawn lo zawh apianga, "Ka nupui dam laia... i nupui thi ta se Lali saw i nei ang em?" tia hmanlai politician style-a fact sawi lova mipui hruai bo a tum

ṭhinte hian MNF leh BJP thawh dunna hi a tichiang zual a, Indian politics analyst thiam tak takte thuziak hrang hrang lak khawm pawh hian a chiang chho tawlh tawlh a ni.

Miin "Kan inzawm lo," an ti lawm lawm chunga an inzawm dan ziaktu nih hi ti kher kher leh mi dik lohna chhui zui ngar ngar chan pawh kan chang mai dawn. Ka ziah chhan chu an inzawmna thu, inzawm ngeia an lan thute hi Indian media-in an ziak si a, helaia mipui hre lo zawkte hmin tuma an inzawm loh thu sawi hi chu pawm chi niin ka hre lo. The Economic Times-in thu tawi te te an lak khawm a lema an dah hi en ila tu party mah ni lo lamin an sawi hi chu rintlakah ka ngai hmiah mai, hetah hian BJP leh MNF hi an inkawp tih an ziak chu a nih hi, a lem hi en ila a chiang mai a ni.

- K Lalthangliana