Bike ri ring bawk kha

Traffic lam hawi hi a pawimawh si, Traffic Police an hah bawk si, chutihrual chuan mipui him-na leh hriselna a pawimawh bawk si; dân kengkawhtute ṭan leh zual nan Traffic lam hawi bawk hi han ziak leh teh ang.

Hman deuh khan Traffic Police lam chuan double overtake chu dan bawhchhiatna a nih thu an chhuah a, kan zâwm ṭha hle mai. Traffic jam karah pawh tlân a nuam sawt viau mai a, a him sawt hle.

Traffic police-te hian proton ri ring chi vuah an phal loh thu an chhuah tawh ṭhin a, man theih an nih thute pawh chan­chinbuah kan chhiar a nih kha.

Khami hnu khan bike ri ring chiho hi an tîm phah chuang vak lo niin ka hmu a, police zingah ngei pawh, bullet bike, mi nghawr dur dur chi khalh ka la hmu nual mai.

Tlang dung kawng hi chu a phei a, a tlân chak theih lutuk lo bawk a, bike ri ring chi pawh ni se bike accelerator pump nat a ngaih loh avangin a ri a ring a ni tih hriat a har. Tlêma kawng chho deuh chinah bike ri ring chi hi a tawrh a hrehawm hle a, a bengchheng hle.

Traffic lam en­kawltute hian hma hi chak zawk deuhin han la se la, mipui leh nunau kan him a, kan thlamuan zawk theihna turin bike ri tih-rin chawpho hi chak leh zualin han vai se nunau tam tak leh hrisel lo zawkte tan chuan a thlamuan thlak ngawt ang.

Lung lam ṭha lo, kawngpui bul hnaia awmte tan chuan hetiang lirthei tih-rin chawp leh bullet bike ri, nghawr dur dur theite hi an huatthlala viau a, phût zawk zawkna tham a ni.

Kan khawpui hi mi ram khawpui ang a ni lo tih kan hriat a ṭha. Mi khawpuiah te chuan an kawtthler a zau a, a ri ring chi an lo hmang a nih pawhin chênna hmun aṭang chuan a ri a ziaawm viau tawh ṭhin. Keini ramah hi chuan kan inhnaih si a, kawtthler a chêp a, kawngpui kan khuap bawk si a, hetiang lirthei ri ring chi hi a tawrh a hrehawm a ni.

Veng ṭhankhatin sairawkherh nena an lo perh ṭhin pawh hi a mak lem lo viauin ka hria. Traffic lam enkawltute hi han khirh deuh se, mi­hring hriselna nghawng thei thil a nih avangin ṭan han la sauh sauh teh se.

- Lalkhawngaiha