Mizoram Assembly Budget Session Thlirna – II (CM thaha vauna leh Rodinliana man chungchang hi)

Tun ṭum kan Assembly Budget Session-ah Kamrul-a a langsar hle a. Kamrul-a kaihhnawihah Thingtlang Pa inti chuan Vantlâng Titina (social media) hmunah, “Kamrula Chhangte hming hawha CM Zoramthanga chetdan engkim chhuichhuah a ni vek tawh e. Inremsiamna lian tak an nei bawk. Kan CM hian a ngam a nih chuan duhtâwkin lo inchhek arbawm rawh se. A that turin engkim kan rêl fel tawh e. A hna hi a chawlhsan dâwn nge a nunna a ngaihlu zawk dâwn? Thla thum chhûnga a bang lo a nih chuan a nunna atân a pawi zawk ang” ti meuhin a rawn ṭawng chhuak ta!

He thil hi thil namailo zet mai niin, ualau taka kan CM-in thaha vau a tâwk ta hial hian, kan ram dinhmun a tarlang chiang ngawt mai. Thingtlang Pa hian duhthawh takin, “Chief Minister dawheh leh Mizoram Budget ei zotu hi kan ramin a tawrh phah dâwn ai chuan, a nunna hian tuar se a pawi lo zawk” tiin thu tawp a sawi hmak a nih hi! Eirûk hluarna ram, dânin kori a tùk lohna ram, mi retheite rahbeha an awmna rama thil thleng ṭhin kha, kan ram dinhmun a lo ni ve ta reng mai tih Zofate hian kan ngaihtuah thiam em?

Tichuan, nikum lam daih tawha ZPM mi leh sa TBC Lalvenchhûngate FIR thehluh, tun thleng pawha la bawhzui thei lo Zoram Police-te chuan, rang takin Thingtlang Pa inti, Rodinliana (Apuia Tochhawng) chu rang takin an man zui ta a nih hi.

Pu TBC-a hnenah Zoram Police-te chuan FB-a thu ziak chhui chhuah harzia hahipa an lo hrilh laiin, awlsam takin CM meuh thaha vautu chu an chhui chhuak leh thei lawi sizia, Pu TBC-a hnen aṭanga kan han hriatte hian, kan ram kalphung dik tak chiang takin min hmuhtir a. Kut hna thawktute leh mi retheite tân chuan han beidawn lohna chi a ni lo reng a ni.

Ngun taka han ngaihtuah hian, Kamrul-a hming hi mi tu emaw chuan contract nuai sing 11,643 chuang thawh nân hmangin, Kamrul-a ai hian hlawkna pawh a tel nasa zawk hle ang tih a rin theih ta viau a. Congress hun laia 50/50 tia contract thawh dan aia hniam leh tenawm zawkin, tun Ministry hnuaiah mi tute emaw chuan hlawk lehzual zawka eirûk dan kawng thar an rek pawp leh ta nia lo lang hi, Thingtlang Pa chuan ngaithei zozai tawh lovin, mahni lamina tawrh huam chungin kan CM meuh thahah a vau der ta niin a lang!

Tun dinhmuna kan kal danah, Zorama mi thiltithei rualte hian dân hlauhna leh zahpahna reng nei lovin, an chunga engmah thleng ve thei lo riaka ngai chung zelin an chaw bel an chhek vum belh sauh sauh a. Dik lo taka thiltih pawh chil chhak tluk lêkin an awlsam zo ta a nih hi. Kan Pathian thuin Jerusalem leh a chhûnga rorêltute chanchin, “Chu mia hotute chuan thamna beiseiin ro an rêl a, a rorêltute chu tlai lam chinghnia ang an ni a, a tuk thlenga ṭhial tur engmah an zuah lo. Dân chu an bawhchhe nasa a ni” a lo tih ang tak kha, kan ram dinhmun leh kan rama rorêltute nihna chiah a lo ni ta a nih hi.

Mahni lam inchhek lenna kawnga kan ram rorêltute themthiam sâwtzia­te hi kan hmu fiah thiam em le? “Thil ṭha lo tih nân an kut chu a themthiam a, hotute’n phût an nei a, rorêltute’n thamna an ngiat a, mi liante’n an duhsam sual an hril a, an thurual tlâng a. An zinga mi ṭha ber chu buar ang a ni a, mi dik ber pawh hnimhlingnei aiin a chhe zawk” tia kan Baibul-in Jerusalem leh a chunga rorêltute chanchin min hrilh hi, kan ram dinhmun dik tak a ni zo ta a. Chu chu ram hmangaihtu tak tak tân ngawi renga lo thlir liam ngawt chu, ram leh hnam phatsanna tenawm ber a ni reng a. Mahse, Kristian ramah chutiang mi chu kan tam êm êm si a nih hi!

Kan rama mi duham rualte thiltih sual zozai hian, nghawng a nei dâwn lo emaw tia zalen taka kan biak in hmun laili lai taktea zak map lova tual an chai ngam lai hian, mi beidawng tawpkhawkte chu an awm hle hle thei ta lo tih kan hmu ṭan ta a. Chân leh hloh belh chuan tur nei lo mi beidawngte aia mi hlauhawm, he khawvelah hian an awm tawh chuang lo. Chutiang mite chu kan ram rorêltute hian an thiltih sual kal tlangin an hring mawlh mawlh tih, eng chen nge an hai der dâwn le?

An chunga kutthlâk a nih hma loh zawng an harh chhuak thei lo a nih lêk phei chuan, kan ram dinhmun tur hi mangphan ngam pawh a ni ta lo a nih hi.

Opposition an nih laiin Pu Zoram­thanga hian an sawrkar hmasak chanchin sawi chhuakin, “Kan lo thiam tâwk lova ni e. Tunah chuan kan inzir tawh a, hmalak dan tur engkim lehkhabuah ka ziak chhuak vek tawh” tiin Zoram mipuite hmaah a rawn inzuar a nih kha. Tun thlenga Pu Zorama chetdan han thlir hian, a thil zir thiam thar chu eng nge tih hai rual a awm lo niin a lang. Assembly House-a an sawi chhuah ang takin, Financial Dictator nih dan rawn thiam thar sâwtin, nasa lehzual zawka eirûk dan kawng thar a rawn hre ta a ni mai lawm ni tih loh theih a ni lo. Budget kal tlangin Special Account-ah sum tam tak dahin, a ei theih tur zawngin a phi ruai a ni ber lawm ni?

Kan ram siam ṭhat har lohzia, Zoram mipuite kawng dika hruai kan awlziate hi mi pangngai chin chuan an hai mawlh lo. CM pakhat, ram leh hnam hmangaih tak taktu nei ni ila chuan, kum 5 chhûng lêk pawhin kan ram hmêlhmang hi thlâk danglam tháwk theih a nih laiin, chutiang taka ram hmangaih chu kan Politician-te tân vana lawn tum ang maia thil theih loh ang hial a ni lawi si a nih hi.

Chuvang chuan, kan ram sukthlêk ngun taka lo zir mite beidawnna chu a thûk ta tial tial a. Chu beidawnna chu thinrimnain a thual chhah tial tial a, thinrimna chu a taka lantir duhnain nasa takin a nawr tawt ta a. Chuvang tak chuan a ni, State khat CM meuhin thaha vauna hial a tawh phah tak ni!

– Lalremliana Pachuau