MLA ṭhenkhat chet dan kha
Tunlaiah media a ṭha tawh a, kan MLA 40 te chet dan kha kan lo thlir ve reng thei tawh. Assembly Session ah khan chhuanawm tak tak kan hmu a, zahpuiawm tak tak kan hmu bawk a ni. An ṭawngkam hman duh danah khan kan mizia dik tak a lang a, khati taka kan chet duh dan en khan mipuiin MLA ni zel tlak tawh lovah ṭhenkhat kha chu kan lo chhinchhiah che u a nia.
Minister ni ta, opposition MLA an nih laia ṭha ve fu tura kan ngaihte kha an lo nep em em mai tih kan han hmu thei a, a zialo a ni. Opposition MLA nih laia lei chima a thleng hma hma ni si, thil dik lo haw em em anga lang mahse Minister nih hnua a chan department chhunga sum lama hmingchhe zui ta kan neite hi a va han vanduaithlak ṭhin ve le.
Sorkarna chan laia Minister chhunzawm takte pawh eptu an han nih meuh chuan an nawi ve leh nak tih pawh a lo lang bawk a, inbuatsaih ṭha lo MLA sawi tur hre lo te pawh kan lo chhinchhiah fak fak a ni. ZPM lamah pawh MLA ṭha an awm a, MLA thusawi tur hre vak lo hi an ṭha lo tihna a ni kher lo chungin zawhna tur pawh nei mang lo, sawi zawm tur pawh nei mang lo MLA nih ringawt hi chu a ho ve khawp mai.
MNF MLA te khan an thu sawiah khan Chief Minister chak tak an han fak te te a, hei hi chu kan tihdan ṭhan thil ropui lo tak a ni tawh a, Chief Minister chak tak kan nei lo tih tichiangtu chu an fak zawh chiaha an bial tana thil an han dil zui leh chiam chiam khan a nemnghet. Engkim mai hi mi pakhat hnen aṭanga dil chhuah tur angin kan sorkar hi a inrem a, Congress hovin Financial Dictatorship an sawi hi thil dik tak a ni. Budget lama pawisa nei tam aiin a nei tlemin an dil chhuak tam zawk bawk si a, tu emaw duhsak leh duhsak loh chu Speaker ding lamah an ṭhu khawm a, chhungrilah lungawi miah si lovin lungawi hmel deuhin an awm a ni.
Khawvel hriata mualpho kumkhua tawh turin 'hektu' an ni chungin an bial a mawm ve si lova, hek ve lo bialah pawh pawisa neitu chuan a chhung lut zel si tihte hi kan sawi kan sawi mai dawn a ni.
- Mamawitea