Milian awmpui 206 hlawh petu MPSC leh SAD

Milian awmpui 206 hlawh pek saktu MPSC leh SAD budget hi tun ṭum chu I belchiang ve ang aw...

MPSC
Milian awmpui 19 awmna MPSC hi belchiang teh ang!

Kum kallai 2021-22-a thawktu pangngai 67 leh thawktu dang MR 58 an neih chu kum thar 2022-23-ah hian thawktu pangngai 67 leh thawktu dang MR 58 neiin a pangngai a ni a. An MR zinga 19 hi an hotute awmpui (ina thawk) an ni.

Kum kallai 2021-22-a cheng nuai 847.74 an neih laiin kum thar 2022-23-ah hian cheng nuai 825.08 neiin a tlem sawt a. Thawktu dang hlawh (wages) an neih cheng nuai 115.81 zinga cheng nuai 26 vel hi an hotute awmpui hlawh tur a ni.

An pawisa hmanna tur te (cheng ziak tel lovin) chu:

Department leh thawktute chanpual nuai 819.28 (99.29%): hlawh (salary) nuai 607.97; thawktu dang hlawh (wages) nuai 115.81; damlo enkawlna (medical expenses) nuai 9.75; tualchhunga zinna (domestic travel expenses) nuai 2.25; ramdanga zinna (foreign travel expenses) nuai 0.10; office senso (office expenses) nuai 49.50; inluahman ilo (rents, rates and taxes) nuai 2.50; inrelbawlna (other administrative expenses) nuai 8.00; mithiam bik chhawrna (professional expenses) nuai 3.40 leh hnaruk thawhna (secret service expenditure) nuai 20.00 te a ni a. Belhkhawmin nuai 819.28 niin an pawisa hman tur atanga za zela 99.29 a ni.

Hnathawhna nuai 0.80 (0.09%): hna tenau thawhna (minor works) nuai 0.80 neiin an pawisa hman tur atanga za zela 0.09 a ni.

Mipui chhawr ve theih deuh nuai 5.00 (0.60%): lehkha chhuahna (publications) nuai 1.00 leh infak­mawina leh hriattirna chhuahna (advertising & publicity) nuai 4.00; belh­khawma nuai 5.00 neiin an pawisa hman tur atanga za zela 0.60 a ni.

MPSC-a ka vei tawp theih loh chu an hotute awmpui MR 19 mawlh khi a ni a, khing mite vang khian cheng nuai 26 vel kumtin hman a ngai a. Peon 29 lawih an nei pawh hi vei awm tak a ni reng!

Ramdanga zinna tura cheng sing 1 an neih khi buaithlak ting tang hian ka hria a. Hnaruk thawhna tur cheng nuai 20 an neih hmanna tur chipchiar hian hriat a chakawm a. Lehkha chhuahna (publication)-a cheng nuai 1 chauh an nei hi a mak ka ti bawk.

SAD
Milian awmpui 187 awmna SAD ve thung hi!

Kum kallai 2021-22-a thawktu pangngai 1,171 leh thawktu dang Contract 2, Co-terminus 74 leh MR 424 an neih chu kum thar 2022-23-ah hian thawktu pangngai 1,123 leh thawktu dang Contract 2, Co-terminus 74 leh MR 331 neiin an tlem zawk a. An MR zinga 187 hi an hotute awmpui (ina thawk) an ni.

Kum kallai 2021-22-a cheng nuai 12,574.00 an neih laiin kum thar 2022-23-ah hian cheng nuai 12,755.73 neiin a pung hret a. Thawktu dang hlawh (wages) an neih cheng nuai 505.16 zinga cheng nuai 255.81 aia tlem lo hi an hotute awmpui hlawh tur a ni.

An pawisa hmanna tur te (cheng ziak tel lovin) chu:

Department leh thawktute chanpual nuai 100%: hlawh (salary) nuai 11,581.12; thawktu dang hlawh (wages) nuai 505.16; damlo enkawlna (medical expenses) nuai 171.45; tualchhunga zinna (domestic travel expenses) nuai 90.00; ramdanga zinna (foreign travel expenses) nuai 2.00; office senso (office expenses) nuai 360.00; inluahman ilo (rents, rates and taxes) nuai 5.00; inrelbawlna (other administrative expenses) nuai 2.00; mithiam bik chhawrna (professional expenses) nuai 8.00 leh tul danga hman (other charges) nuai 1.00 te a ni a. An pawisa hman tur atanga za zela 100 a ni.

Heta ngaimawhawm em em chu an hotute awmpui 187 mawlh hi a ni a. Hei hi chu ka vei rei ta ngat ngat hle. MPSC-a awmpui ho kha chu daily rate-a chhawr an ni a, SAD ami ho hi chuan thla bi hlawh neiin IV Grade Level 1 an ni a. An hlawhbi hriain han chhut chhin teh u... Tam ve fiii ang! Chuan, kum danga an pawisa hman thin dan nena ena indaihlo tur sa an nei nualin a lang.

Mipui hian thil hria i la, kan hriatna hmangin sorkar hi i khalhngil ang u.

- Vanlalruata