Slab chim an hrem lo ang

Lengpui airport zauhna tur slab chhun chu a chim rup mai a, sum tam tak a kal ral. Stab chhun nana tha thawh senso tamzia te, cement, iron rod, balu leh rawra te chhut chuan cheng nuai tam fe a ni ngei ang.

Hmanni khan sawi hlawh tak Airport zauhna tura chim ta chu ka zu en ve a, kha slab chhun nana a rel an siam reng reng mai kha dawl zo chi ni hek lo. Contractor pangngai chuan rinawm theihtawpin a rel an siam a, a banah pawh thir te an hmang a ni ngai a.

Tuna kan sawi mek slab chhun nana a rel an siam dan kha chu rit han chawi zo chi ni miau hek lo. Kha slab chhunna tura a ban an hman te kha a lan dan chuan mau leh thing dawrawm tak tak ni maiin a lang.

He hnathawktu hi Chief Minister Pu Zoramthanga fatlum, Kamrul-a a ni tih mi zawng zawng hriat a ni a, airport-ah hian cheng vaibelchhe tam tak man hna chi hrang hrang a thawk mek a ni. Chuti khawpa contract hna tam tak CM-in restricted tender (restricted tender awmzia chu an mi duh ten an thawh ngei ngei theih nana ruahman sa tihna a ni ber) hmanga a pek liau liau a ni a, hmun dangah pawh a pe ṭeuh nghe nghe.

Kha slab chhun kha cement dealer leh iron rod zuarten an endik khan a dik lo hle tih an hmu a, iron rod pawh hman tur aia te fe zawk an hmang tih an sawi. Cement pawh a hman dan tur dik takin an hmang lo niin an sawi.

Khati khawpa hmanraw chhia an hmang chung khan hrem a ni lo tawp ang.

Hrem a nih loh chhan tur chu Chief Minister, PWD changtu ngeiin a hna hi a pek a nih hmel a, amah CM pawhin airport cute ber siam tuma a hmuna a tlawh tlut tlut ṭhin kha a ni a, eng vang mahin kha contractor kha hrem a ni dawn lo tih hi 'ka beng' ti khawpin ka chiang. Hrem tura nawr chi a ni hauh lo.

Eng ministry-ah pawh hian CM hi an thu ber a. MNF sorkarah pawh CM Pu Zoramthanga hi a Minister dangte chuan a thil tih dik loah pawh an sawisel ngam lo. A sawiseltu chu Minister aṭanga chawlhtir a ni mai dawn si a, sawisel ngam chi a ni hauh lo. Zawite te-in an phun ru sep sep mai zawng a nih hi.

Party worker tin hian an sorkar ve chuan contract hna an beisei vek a, mahse hah taka thawktute ai chuan pawisa an hmuhlet leh theihna tur mihring duhsak an ni fo. Hei hian party chhungah in­nghirnghona a awm phah niin a lang.

Chuvangin, Leng­pui airport zauh­na tur slab chhun chim vangin contractor hi hrem a ni lo ang a, hna dang pek belh a nih leh zel a rinawm zawk a ni.

- Lalkhirhvela