Sum chauh hi em ni?

Zawngte te hian an mamawh ai tam eitur chhek khawl se, zawngte dang chu ei tur tlachham leh rilṭamin hrek ta vak mai se; chu zawngte chu zawngte duham leh pamham tak a ni tih mithiamte rawn kher loin ngaihdan kan siam mai thei awm e.

He zawngte duh­am tak ang bawk hian kan mihring­puite chanai kan chhuhsak a, ril ṭam takin kan hrek bet zawk? Midang chanai eizawhsaktu mihausa tawntawte chuan ngaihsan an hlawh let thung a, chawimawi leh mi chunga en an ni fo mai hi keini thiam loh tho hi a ni tih hi chhut chiang ve mah teh. Kan ṭawngṭai hian nitin eikhawp aia tam kan dil ngai lo a, beng muka liam zawih zawih nei turin kan dil ngai hek lo.

Nimahsela, kan khawsa zia chhui­chian meuh chuan a chuang liam chhek khawl tumin mihringte hi kan va hmanhlel tawh si em. Duhamna te, midang chan ai chhuhsak te, eirukna te leh ṭhenawm khaw­vengte rilṭama an awm laia eisen rual loh kan khawl khawm a nih chuan kan inenfiah viau a ngai tihna a ni.

Inngaihsak tawn hi a ṭha a, mihring min ti hlutu pawimawh tak pakhat a ni. Khaw­thlang rama mihausa tawntawte chu magazine cover-ahte chuangin, milar leh mi hriat hlawh kai tak takte pawh an ni hlawm a. Chutiang bawkin khawsak harsa, chenna in nei lo, nung ve ṭawk ṭawk lah kan lo ralkhat hriat ve leh lawi si.

Khawthlang rama dinhmun inthlau zel khu Mizoram pawh hian kan hlat tawh lo a, kan thleng zawk hial pawh a ni tawh mahna. An hausak chhan kan hriat loh leh chhuichhuah hleih theih lohte thuhnuaia kan awm hun hi kan hlat tawh lo thei a, kut tling loa hausate khawtlanga an in lulin hun leh ram rorelnaa a fawng chelhtu an nih hun hi kan thleng thuai thei a, heng mite khaw eng hmu ngam lo khawpa ensantu pawh kan ni thei; kan kut vek a ni e.

Ram siam ṭha turin tih theih ka nei lo tingawt lo la, poli­tics chu ka tui thlawt lo a ni, ti ngawt hek suh. Politics chu ngaihven lo eng ang mahla, democracy ram lian bera kan i awm chhung chuan politics hian a tui che tih theihnghilh hauh loh ang che.

Sum tam tak aiin hmingṭhat hi thlan zâwk tûr a ni a, Tangka leh rangkachak aiin duhsakna a ngainatawm (Thufingte 22:1). Sum chauh hi em ni kan thlan dawn tih uluk taka inzawt chungin kan hmalam hun i ngaihtuah ang u le.

- Lal M-a