BHAGWANT SINGH MANN, PUNJAB CM ATAN LAK LUH A NI TA

MARCH 16, 2022 :

Punjab Governor Ban­warilal Purohit chuan Chief Minister thar tur duh dan ang ngeiin India ram freedom fighter Bhagat Singh pianna khua, Khatkar Kalan khuaah Nilaini March 16 chawhnu her dar 1:25pm khan Bhagwant Singh Mann chu Punjab Chief Minister 18-na atan rinawmna thu tiamtirin a la lut fel ta.

Amah chauhin lakluh a ni. March 17 hian Assembly ah MLA thlan tharte lak luh an ni ang a, hemi hnu ṭun kar Inrinniah Minister dang te chu lakluh an ni ang.

Hetianga Cabinet minister dangte a ruala lak luh ve an nih loh avangin AAP MLA te chu Chief Minister lakluhnaah hian dawhsan vei lamah an ṭhu a, AAP mi pawimawh dang Arvind Kejriwal te chu dawhsan ding lamah an ṭhu thung.

KHATKAR

KALAN KHUA

He khaw hming hi Punjab CM lak luhna atan hman ni lo se, hriat a hlawh viau kher lo ang. Punjab state khawthlang lam Pakistan ramri hnaiha awm a ni a. Mihring chenna in 409 leh mihring 1811 (2011 census) awmna khua chauh a ni. State capital Chandigarh aṭangin 90 km vel laia hla a ni a, mikhual mihring nuai teh teh meuhin he khua an tlawh vawikhatna a ni ngei ang.

RAWNG ENG INTHUAM

AN NGAP

Bhagwant Singh Mann hian CM a lakluhna a tel turte chu Punjabi diar (turban) rawng eng (mipa) leh hmeichhia puan bah (dupatta) rawng enga inthuam ṭhin party worker leh mipuite a lo ngen tawh angin an lakluh ni hian rawng eng - yellow colour) a inthuam an ṭhahnem tham mai ni loin Punjab chhung hmun tinah an ngap tuar a ni ber mai.

ENGTIN ZEL NGE?

Punjab Chief Minister thar lakluhna khua hi thing­tlang khaw lian lo tak a nih avangin CM lakluhna inkhawm dawl zo tur hi hall, ground lian tawk a awm lo. A chhan chu Chief Minister thar lakluhnaa tel tum hi March 15 chawhma lam thleng khan nuai 1 an pel der tawh. A tir lamah chuan mi sing 4/5 vel tel tura beisei an ni a. Mahse tel tum an tam avangin chawpchilh takin CM lakluh hma darkar khat la awmah pawh hulhliap (pandal) zar leh ṭhutna remin an la buai hle a, hun tiam lawk aiin darkar khat aia rei mahin an tlai phah a ni.

Hetiang a nih avang hian pandal chhung leh dawh­sanah chair nuai 1 dah tura ruahman a ni a, thlavengah 50,000 dah a ni bawk. Ṭhutna hi mipui kalkhawm zawng zawng daih ngaihtuah sen a ni ta lo reng a.

Ground awm sa hetiang zat mipui dawng zo a awm lo a. A tirah Shaheen-e-Aazam Bhagat Singh Memorial and Museum bul hnaia thlai chinna hmun 13 acre vel ngai tura ngaih a ni. Mipui kal tum an tam avangin tihzau belhin 40 acre, 50 acre a zauh belh zel niin, a tawpah 150 acre chu buatsaih a ni. Farmer te hi Rs. 45,000/ acre pek an ni ang. Farmer te hian he thil pawi tih leh dodal a hnekin an lawmah a tla thung a ni.

CM lakluhna pandal chhungah hian big screen 10 dah a ni a, pandal pawn lamah hian big screen 12 dah tura ruahman a ni a, mipui tam dan a zira dah belh zel tura ruahman a ni.

LAK LUH A NI TA

Chawhnu her dar 1:25 pm khan Bhagwant Singh Mann chu Punjab Chief Minister 18na atan Governor B. Purohit chuan chhia chhamtirin a lalut ta. Punjab Chief Minister ni tawh zingah Mann (48) hi a naupang ber dawttu a ni. Parkash Singh Badal kha kum 1970 a CM atan lak luh a nih khan kum 43 mi chauh a ni a, Punjab CM naupang ber record a la ni.

ENG THU NGE

A SAWI LE?

Hei hi mi tam tak hriat chak a ni. Chief Minister atan lakluh a nih hnu hian amah lawmpui tura lokal AAP party worker leh mipuite hmaah Bhagwant Singh Mann thu a sawi nghal a, amah lawmna kut beng leh hlim au thawm pawh a ṭha tham hle.

MARCH 16, 2022 :
Thu ropui tak leh mipuite hnena thu tiam (hlen theih loh tur) ṭha tak tih tur a sawi hranpa lo. A thu sawi chu, "Hma thar la tur hian kan tlai hle mai, mahse vawiin aṭang hian chu zinkawng thar thui tak chu kan zawh ṭan dawn a, hna hmu nei lo tih tàwp kan tumna kawng chu kan zawh ṭan a ni. Naktuk mai aṭangin kan ti nghal phut thei bik lo ang, agriculture a kan dinhmun kan siam ṭha ang a, India buh leh wheat zem kual kan zauh ang, hospital kan thuam changtlung ang, education kan siam ṭha ang," a ti.

Education-a hmasawnna leh zir dan phung dik leh ṭha zawka thlak danglam (qualitative change) chu tih makmawh a ni. Punjab Sorkar school te chu Delhi khawpuia an tih ang bawkin zirtirtu ngai reng hmanga hmel thar leh zirna ṭhain thlak danglam (transformative quality) ni turin ngaihsak leh tuaihnum a ni ang. Punjab ṭhalai khawvel ram danga hna thawk tura chhuak te chu hetah hian an tan hmun a awm ang, Chief Minister chuan a ti.

PARTY WORKER TE HAWIHHAWM ṬUL A TI
AAP Chief Minister thar chuan CM lak luhnaa party worker lo kalkhawmte chu rinawm taka an hna ṭheuhte thawk turin a ngen bakah midang laka ṭawngkam hriam leh deuhsawhna leh chapo taka ṭawng hmang lo tura a ngen a, hawihhawm tlat turin a chah bawk a ni. " Politics a kan elpuite hi tu dang mah an ni chuang lo, kan mi te tho tho an nih tlat avang hian kan zah tlat tur a ni", a ti.

A sawi zelnaah "AAP party mi leh sa te chu Social media a hawihhawm tur te, thil ṭul lo leh ṭawngkam hriam leh dengkhawng tak tak hmang lo turin" a chah bawk a ni.

YOUNG BLOOD
Punjab MLA thar 117 zingah hian ṭhangthar, hriatna lama hriam tak tak leh thisen thar kum 35 hnuai lam 11 lai an awm. An zinga naupang ber chu Sangrur Assembly constituency aṭanga thlan tlin Congress minister nilai khing tlatu Miss Narindra Kaur Bharaj kum 27 mi hi a ni.

MLA 29 te pawh kum 36 - 45 inkar an ni a, MLA kum zat hi chawhrualin kum 50 vel ni tura ngaih a ni. MLA zingah kum 65 aia upa 8 chauh an awm a, an zinga upa ber hi term liam taa minister Tript Rajinder Singh (78) a ni a, BJP MLA 2 zinga pakhat zawk hi kum 74 mi a ni bawk.

AMERICA AṬANGIN AN PA CM CHIBAI TURIN
Bhagwant Singh Man fa te pahnih : Seerat Kaur Mann (21), Dilshan Mann (17) te hi USA lamah an nupa kum 2015 a an inṭhen aṭangin an nu bulah lehkha zirin an awm a, a pa Punjab Chief Minister a lakluhna hmang tur hian an rawn thlawk haw vang vang a ni. A nupui hlui Inderpreet Kaur chuan, "A tan ka ṭawngṭai reng a, ka ṭawngṭaipui zel ang, kan fate hi apa Chief minister a lakluhnaa tel hi an chakin an helhhawlh hle a, hemi hnu hian zirna chhunzawm turin an lo kir leh thuai ang," a ti.

HEI VE THUNG HI
1. Mizoramin nakkum tawp maiah MLA inthlan kan hmabak reng tawh a, Political party leh mipui te hian inthlakthleng leh danglam (change) rilru hi kan pu ngam ang em?
2. Young blood - mithiam, hriam leh ram hmasawnna a tuihal ṭhalai rual (budget la pharh ngai loten) ram kaihhruai hna an kuta pek ṭul kan ti nge, mi hlui (old guards) budget pharh ṭhangte hian min la hruai tleng tleng rih se ṭha kan ti zawk le.

Source :
The Tribune, March 16, 2022
The Hindu, March 16, 2022
Indian Express

- Huna Kawlni Kawlvawm